கார்த்திக், கவுண்டமணி படத்துக்கு முன்னோடியாக அமைந்த சிவாஜி, சந்திரபாபு படம்

சிவாஜி கணேசன் நடித்த ரொமான்டிக் காமெடி திரைப்படங்கள் எக்காலத்திலும் ரசித்துப் பார்க்கத் தகுந்தவை. அதில் முதல்வரிசையில் வருகிற படம் சபாஷ் மீனா. பி.ஆர்.பந்துலு தயாரித்து, இயக்கிய படம்.

இதில் சிவாஜி பணக்கார வீட்டுப்பிள்ளை. எந்த பொறுப்பும் இல்லாமல் ஊர் சுற்றுகிற அவரது உற்றத் தோழன் சந்திரபாபு. மகனின் போக்குப் பிடிக்காமல் சிவாஜியை அவரது தந்தை சென்னையில் இருக்கும் தனது நண்பர் நாகேஸ்வரராவின் வீட்டிற்கு அனுப்பி வைப்பார். சிவாஜி தனக்குப் பதில் சந்திரபாபுவை நாகேஸ்வரராவின் வீட்டிற்கு அனுப்பி வைப்பார். அதேநேரம், பேருந்தில் மாலினியை அவர் சந்திப்பார். முதல் பார்வையிலேயே மாலினியை சிவாஜிக்கு பிடித்துப்போகும். லோக்கல் பிராடான குலதெய்வம் ராஜகோபல் மூலம் மாலினி இருக்கும் குப்பத்துக்கே வருவார். மாலினி சொல் பேச்சு கேட்டு வேலைக்கு செல்லவும் ஆரம்பிப்பார்.

சிவாஜியின் தந்தை நாகேஸ்வரராவின் வீட்டிற்கு சிவாஜியை அனுப்பியது, அவரது மகள் சரோஜாதேவியை திருமணம் செய்ய. சரோஜாதேவி சந்திரபாபுதான் சிவாஜி என நினைத்து அவரை காதலிப்பார். நடுவில் ரிக்ஷா ஓட்டுகிற இன்னொரு சந்திரபாபு கதைக்குள் வர, ஏற்கனவே இருந்த ஆள் மாறhட்டம் இன்னும் சிக்கலாகும். ஒரு கொலை வழக்கில் சிவாஜி மாட்டிக் கொள்ள, இறுதியில் உண்மையும், உண்மையான குற்றவாளியும் யார் என்பது தெரியவர, சிவாஜி மாலினியுடனும், சரோஜாதேவி சந்திரபாபுடனும் இணைவார்கள்.

சிவாஜி இதில் இயல்பான நடிப்பில் அட்டகாசம் செய்திருப்பார். தன்னிடம் வழிப்பறி செய்யவரும் குலதெய்வம் ராஜகோபாலை அவர் ஓட்டுகிறவிதமும், அசந்தர்ப்பமாக நாடக நடிகனாகி மேடையில் நடித்துக் கொண்டிருக்கையில், அப்பாவைப் பார்த்ததும் நடுங்கியபடி ஓடி ஒளிவதும், மாலினியுடம் காதலில் வழிவதுமாக தனி ராஜாங்கமே நடத்தியிருப்பார். ரிக்ஷாக்கார சந்திரபாபு வந்த பிறகு படத்தில் அவரது கையே ஓங்கியிருக்கும். சென்னை பாஷையில் அவரது வசனம் ஒவ்வொன்றும் சரவெடி. இந்தப் படத்திற்கு சிவாஜியைவிட ஒரு ரூபாய் அதிக சம்பளம் சந்திரபாபுக்கு தரப்பட்டதாக சொல்வதுண்டு. படத்தின் தயாரிப்பாளரும், இயக்குனருமான பி.ஆர்.பந்துலு, நாயகி மாலினியின் கண் தெரியாத தந்தையாக சில காட்சிகளில் நடித்திருந்தார்.

தாதா மிராஸி எழுதிய கதைக்கு, லிங்கப்பா இசையமைத்திருந்தார். அனைத்துப் பாடல்களையும் எழுதியவர் கு.மா.பாலசுப்பிரமணியம். சபாஷ் மீனாவில் இவரது கவிதை வரிகளில் இடம்பெற்ற, சித்திரம் பேசுதடி, என் சிந்தை மயங்குதடி பாடல் காலத்தால் அழியாத காவியம்.

சித்திரம் பேசுதடி
உன் சித்திரம் பேசுதடி
எந்தன் சிந்தை மயங்குதடி
சித்திரம் பேசுதடி
எந்தன் சிந்தை மயங்குதடி
சித்திரம் பேசுதடி
சித்திரம் பேசுதடி
முத்துச் சரங்களைப் போல்
முத்துச் சரங்களைப் போல்
மோகனப் புன்னகை மின்னுதடி
முத்துச் சரங்களைப் போல்
மோகனப் புன்னகை மின்னுதடி
சித்திரம் பேசுதடி
எந்தன் சிந்தை மயங்குதடி
சித்திரம் பேசுதடி
தாவும் கொடி மேலே
தாவும் கொடி மேலே
ஒளிர் தங்கக் குடம் போலே
தாவும் கொடி மேலே
ஒளிர் தங்கக் குடம் போலே
பாவை உன் பேரெழிலே
எந்தன் ஆவலைத் தூண்டுதடி
பாவை உன் பேரெழிலே
எந்தன் ஆவலைத் தூண்டுதடி
சித்திரம் பேசுதடி
எந்தன் சிந்தை மயங்குதடி
சித்திரம் பேசுதடி
என் மனம் நீ அறிவாய்
உந்தன் எண்ணமும் நான் அறிவேன்
என் மனம் நீ அறிவாய்
உந்தன் எண்ணமும் நான் அறிவேன்
இன்னமும் ஊமையைப் போல்
மௌனம் ஏனடி தேன் மொழியே
இன்னமும் ஊமையைப் போல்
மௌனம் ஏனடி தேன் மொழியே
சித்திரம் பேசுதடி
எந்தன் சிந்தை மயங்குதடி
சித்திரம் பேசுதடி

இந்தப் பாடலில்  மாலினியின் முகபாவங்கள் அன்றை ரசிகர்களை கள்வெறி கொள்ள வைத்தன.

1958 க்குப் பிறகு தமிழில் வெளிவந்த அனைத்து ஆள் மாறாட்டக் கதையிலும் சபாஷ் மீனாவின் பாதிப்பைப் பார்க்கலாம். சுந்தர் சி.யின் உள்ளத்தை அள்ளித்தா அப்படியே இந்தப் படத்தின் கதையிலிருந்து உருவியதுதான். அதில் அப்பாவின் கெடுபிடி தாங்காமல் கார்த்திக் வீட்டைவிட்டு வெளியேறுவார். 

கார்த்தியின் அப்பா அவரது நண்பனின் மகளை மணக்கச் சொன்னதும் அவர் வீட்டைவிட்டு வெளியேற ஒரு காரணமாக இருக்கும். கவுண்டமணியிடம் பணத்தைப் பறிகொடுக்கும் கார்த்திக் பிறகு அவருடனே கூட்டணி வைத்துக் கொள்வார். சந்தர்ப்பவசத்தால் கவுண்டமணியை தனது நண்பனின் மகன் என்று மணிவண்ணன் தனது வீட்டிற்கு அழைத்து வருவார். அதே வீட்டில் கார்த்திக் கார் டிரைவராக வேலைக்கு சேர்வார்.

பணக்கார வீட்டுப் பெண்ணை காமெடி நடிகரும், ஏழைப்பெண்ணை நாயகனும் திருமணம் செய்தால் ரசிகர்கள் ஏற்றுக் கொள்ள மாட்டார்கள் என்று அதை மட்டும் உள்ளத்தை அள்ளித்தாவில் மாற்றியிருப்பார்கள். சபாஷ் மீனாவில் நாயகி மீது ஆசைப்படும் வில்லன், உள்ளத்தை அள்ளித்தாவில் நாயகனின் சொத்து மீது ஆசைப்படும் வில்லன்.

உள்ளத்தை அள்ளித்தா மட்டுமின்றி பல ஆள்மாறட்ட கதைகளுக்கு சபாஷ் மீனாதான் இன்ஸ்பிரேஷன். வீக் என்டில் நல்ல நகைச்சுவை பீல்குட் படம் பார்க்க நினைப்பவர்களுக்கு சபாஷ் மீனா நல்ல சாய்ஸ்.

1958, அக்டோபர் 3 ஆம் தேதி, இதே நாளில் வெளியான சபாஷ் மீனா இன்று 64 வது வருட நிறைவை கொண்டாடுகிறது.