Maanaadu: மாநாடு படத்தின் புதிய புகைப்படங்கள்!

மாநாடு படம் நவம்பர் 25-ம் தேதி திரைக்கு வருவதை முன்னிட்டு புரமோஷன் வேலைகள் முடுக்கி விடப்பட்டுள்ளது. முதல்கட்டமாக படத்தின் புதிய ஸ்டில்களை வெளியிட்டுள்ளனர்.

மாநாடு படத்தை வெங்கட்பிரபு இயக்க சுரேஷ் காமாட்சி தயாரித்துள்ளார். சிம்பு, கல்யாணி பிரதான வேடங்களில் நடித்துள்ளனர்.

டைம் லூப் திரைக்கதையில் மாநாடு உருவாகியிருக்கிறது. ஒரு நாளில் சிலர் மாட்டிக் கொண்டிருப்பதும், நடந்த நிகழ்வே மறுபடி மறுபடி நடப்பதுமே டைம் லூப்பின் அடிப்படை.

மாநாடு படத்தின் மற்றுமொரு சிறப்பு எஸ்.ஜே.சூர்யா. போலீஸ் அதிகாரியாக வரும் இவர் மாநாடு ட்ரெய்லரில், 'வந்தான் சுட்டான் போனான்... ரிப்பீட்டு' என்று சொல்லும் டயலாக் ரசிகர்களிடையே பிரபலமடைந்துள்ளது.

ரசிகர்களின் பல்ஸ் அறிந்த தயாரிப்பாளர் எஸ்.ஜே.சூர்யாவும், சிம்புவும் இருக்கும் புகைப்படத்தை நேற்று வெளியிட்டார்.

மாநாடு போலவே டைம் லூப் திரைக்கதையில் அமைந்த படம் ஜாங்கோ. டைம் லூப் திரைக்கதையில் அமைந்த முதல் இந்தியப் படம் என்ற விளம்பரத்துடன் படத்தை நவம்பர் 19 வெளியிடுகின்றனர்.

மாநாடு படத்துக்கு யுவன் இசையமைத்துள்ளார். அறிவு ஒரு பாடல் பாடியுள்ளார்.

கல்யாணி சிம்புடன் இணைந்து நடிக்கும் முதல் படம் இது. ஹீரோ படத்தில் தமிழில் அறிமுகமான அவர் புத்தம் புதுகாலை ஆந்தாலஜியில் நடித்திருந்தார். அதையும் சேர்த்து தமிழில் அவருக்கு இது மூன்றாவது படம்.

வெங்கட்பிரபு கடைசியாக இயக்கிய பிரியாணி, மாசு என்கிற மாசிலாமணி, சென்னை 28 இரண்டாம் பாகம் என எதுவும் ஓடவில்லை. பார்ட்டி படம் வெளியாகவில்லை. ஒரு வெற்றி நிச்சயம் தேவை என்ற நிலையில் மாநாடு வெளியாகிறது.

அரசியல் பின்னணியில் மாநாடு படம் தயாராகியிருக்கிறது. கொரோனா இரண்டாம் அலைக்குப் பின் வெளியான டாக்டர் படத்தைப் போல் இதுவும் ரசிகர்களை திரையரங்குக்கு அழைத்து வருமா? நவம்பர் 25 தெரியும்.