54 வருடங்களை நிறைவு செய்யும் சிவாஜியின் தில்லானா மோகனாம்பாள்

சிவாஜியின் சிறந்த படங்களை பட்டியலிடுகையில் தில்லானா மோகனாம்பாள் தவறாமல் இடம்பெறும். வசூல்ரீதியிலும் பட்டையை கிளப்பிய படம்.

சிவாஜியின் நடிப்புக்கு தீனி போட்ட படங்களில் தில்லானா மோகனாம்பாள் முக்கியமானது. சரியாக 54 வருடங்களுக்கு முன்னால், 1968 ஆம் ஆண்டு இதே ஜலை 27 ஆம் நாள் தில்லானா மோகனாம்பாள் திரைக்கு வந்தது.

1957-58 காலகட்டத்தில் ஆனந்த விகடன் வாரப்பத்திரிகையில் கொத்தமங்கலம் சுப்பு, தில்லானா மோகனாம்பாள் என்ற பெயரில் ஒரு தொடர்கதையை எழுதினார்.

கோபுலுவின் அருமையான ஓவியங்களுடன் வெளியான அந்தத் தொடருக்கு கணிசமான வாசகர்கள் இருந்தனர். நாதஸ்வர வித்வானான 'சிக்கல்' சண்முகசுந்தரத்துக்கும், பரதநாட்டிய கலைஞரான மோகனாம்பாளுக்கும் இடையே ஏற்படும் காதலை மையப்படுத்தி எழுதப்பட்ட கதையது.

தில்லானா மோகனாம்பாள் கதை உரிமை, ஆனந்த விகடன் நிறுவனர் எஸ்எஸ் வாசனிடம் இருந்தது. இயக்குநரும், தயாரிப்பாளருமான ஏ.பி.நாகராஜன் தில்லானா மோகனாம்பாள் கதையை படமாக்கும் விருப்பத்துடன் இருமுறை வாசனிடம் கதை உரிமையை கேட்டார்.

வாசன் மறுத்துவிட்டார். தனது ஜெமினி ஸ்டுடியோஸ் சார்பில் அதனை படமாக்க வேண்டும் என்று வாசன் திட்டமிட்டிருந்தார். ஆனால், மூன்றாவதுமுறை ஏ.பி.நாகராஜன் கேட்ட போது அவரால் மறுக்க முடியவில்லை.

25,000 ரூபாய்க்கு கதை உரிமையை ஏ.பி.நாகராஜனுக்கு தந்தார். கதை உரிமை வாசனிடம் இருந்தாலும், கதையை எழுதியவர் கொத்தமங்கலம் சுப்பு என்றவகையில் அவருக்கு 10,000 ரூபாய் தந்தார் ஏ.பி.நாகராஜன்.

வாசனுக்கு அவர் அளித்த தொகையில் பாதியை தனக்கு தந்துவிட்டதாகக் கூறி அந்தத் தொகையை வாங்க கொத்தமங்கலம் சுப்பு மறுத்துவிட்டார்.

ஏ.பி.நாகராஜன் தனது ஸ்ரீ விஜயலட்சுமி பிக்சர்ஸ் சார்பில் தில்லானா மோகனாம்பாளை தயாரித்து இயக்கினார். சுப்புவின் கதையில் பல மாறுதல்களை அவர் செய்தார். கதைப்படி மோகனாம்பாளுக்கு வயது 16. அந்த வேடத்தில் 36 வயது பத்மினியை நடிக்க வைத்தார்.

நாயகனும், நாயகியும் இணையாமல் கதையை சோகத்துடன் சுப்பு முடித்திருப்பார். ஏ.பி.நாகராஜன் இருவரும் இணைவதாக மாற்றினார்.

சிவாஜி, பத்மினிக்கு இணையாக படத்தில் ஸ்கோர் செய்தவர் தவில் வித்வானாக வரும் பாலையா. அவரது அப்பாவித்தனமான நடிப்பு அனைவரையும் கவர்ந்தது. இன்னொருவர் ஜில் ஜில் ரமாமணியாக நடித்த மனோரமா.

சிவாஜி, பாலையாவுக்கு இணையாக நடிக்க வேண்டும் என்றதும் பயந்ததாகவும், இயக்குநர் ஏ.பி.நாராஜன் தைரியம் கூறி நடிக்க வைத்ததாகவும் பேட்டி ஒன்றில் மனோரமா கூறியிருந்தார்.

படத்தின் இன்னொரு முக்கியமான வேடம், 'சவடால்' வைத்தி என்கிற வைத்தியநாதன் ஐயர். அன்றைய கலையுலகில் இருந்த பாலியல் சீண்டல்களையும், அதற்கு உடந்தையாக இருந்த தரகர்களையும் விவரிக்கும் தரகர் (பிம்ப்) கதாபாத்திரம் இது.

இன்றைக்கு அப்பாவி, நேர்மையானவன் என்றால் உடனே அந்த கதாபாத்திரத்தை ஐயராக காட்டுவது வழக்கம். ஆனால், அன்று ஒரு பிம்ப் கதாபாத்திரத்தை ஐயராக சித்தரித்து, நடைமுறை யதார்த்தத்தை வெளிப்படுத்தியிருந்தனர்.

கே.வி.மகாதேவன் இசையில், கண்ணதாசன்  எழுதிய நலந்தானா..., மறைந்திருந்து பார்க்கும் மர்மம் என்ன... ஆகிய படல்கள் மிகப்பெரிய வெற்றியை பெற்றன. பல திரையரங்குகளில் 100 நாட்களை கடந்த படம் 175 நாள்கள்வரை ஓடி வெள்ளிவிழா கண்டது.

நாதஸ்வர வித்வான்களான மதுரை எம்பிஎன் சேதுராமன் மற்றும் பொன்னுசாமி ஆகியோரை கவனித்து, அவர்களது மேனரிசங்களை உள்வாங்கி சிக்கல் சண்முகசுந்தரம் கதாபாத்திரத்தில் சிவாஜி நடித்தார்.

திரைக்குப் பின்னால் சிவாஜிக்காக வாசித்தவர்கள் இவர்கள்தான். இது அந்த வித்வான்களுக்கே சோதனையாக முடிந்தது. அவர்கள் கச்சேரி செய்கையில் தில்லானா மோகனாம்பாள் சிவாஜி மாதிரி வாசியுங்கள் என்று ரசிகர்கள் அவர்களிடம் கேட்கத் தொடங்கியதாக பொன்னுசாமி பேட்டியொன்றில் குறிப்பிட்டுள்ளார். அந்தளவு நாதஸ்வர வித்வான்களின் உடல்மொழி இப்படித்தான் இருக்கும் என்பதை தனது நடிப்பில் கொண்டு வந்திருந்தார் சிவாஜி கணேசன்.

16 வது தேசிய திரைப்பட விருதுகளில், சிறந்த  ஒளிப்பதிவு (கே.எஸ்.பிரசாத்), சிறந்த தமிழ்ப் படம் ஆகிய விருதுகளை தில்லானா மோகனாம்பாள் வென்றது.

தமிழக அரசின் திரைப்பட விருதுகளில் சிறந்த திரைப்படத்துக்கான இரண்டாவது விருது, சிறந்த கதை (கொத்தமங்கலம் சுப்பு), சிறந்த நடிகை (பத்மினி), சிறந்த துணை நடிகர் (பாலையா), சிறந்த துணை நடிகை (மனோரமா) ஆகிய விருதுகளை வென்றது. அப்போதைய தமிழக முதல்வர் சி.என்.அண்ணாதுரை ரசிகர்களுடன்  அமர்ந்து இந்தப் படத்தை கண்டு ரசித்தார்.

இதுவரை தில்லானா மோகனாம்பாள் பார்க்காத இளைய தலைமுறை உடனடியாக படத்தைப் பார்க்கவும்.