திருமால் பெருமையால் வெளியுலகுக்கு தெரிய வந்த சிவாஜியின் மகிமை!

திருமால் பெருமை 1968 இல் சிவாஜி கணேசன் நடிப்பில் வெளியான திரைப்படம். நவராத்திரி, திருவிளையாடல், சரஸ்வதி சபதம், கந்தன் கருணை என்று வரிசையாக புராணப் படங்கள் எடுத்து, வெற்றிக்கொடி நாட்டிய ஏ.பி.நாகராஜன் கந்தன் கருணைக்குப் பிறகு மீண்டும் சிவாஜியை வைத்து திருமால் பெருமை என்ற புராணப் படத்தை எடுத்தார். படம் எதிர்பார்த்தது போல் வெற்றியடைந்தது.

சிவாஜி - ஏ.பி.நாகராஜன் இணையின் புராணப் படங்கள் எப்போதும்  சோடைப் போனதில்லை. 100 நாள்களுக்கு மேல் அவை ஓடியதும் அதிசயமில்லை. திருமால் பெருமையை இங்கே குறிப்பிட காரணம், சிவாஜியின் மறுவெளியீட்டு மகிமையைச் சொல்ல.

ரஜினியின் பிறந்தநாளையொட்டி அவரது பாபா படத்தை மறுவெளியீடு செய்தனர். இதற்காக சில காட்சிகளுக்கு ரஜினி மறுபடி டப்பிங் பேசினார். பிரதி டிஜிட்டலில் மெருகேற்றப்பட்டது. நிறைய விளம்பரங்களும் செய்யப்பட்டன. அதிகாலை நான்கு மணிக் காட்சியுடன் அமர்க்களமாக பாபா மறுவெளியீடு தொடங்கியது.

சென்னை ரோகினி திரைவளாகத்தில் பல திரையரங்குகளில் பாபா திரையிடப்பட்டது. அப்படத்தை தங்களின் திரையரங்குகளில் பத்தாயிரம் பேர் பார்த்ததாக திரையரங்கு நிர்வாகம் செய்தி வெளியிட்டது.

இதுபோல் சிவாஜி, எம்ஜிஆர் படங்களும் அவர்களது காலகட்டத்தில் மறுவெளியீடு கண்டிருக்கின்றன. குறிப்பாக 1952 இல் வெளியாகி வெள்ளிவிழா கண்ட சிவாஜியின் பராசக்தி, 16 வருடங்கள் கழித்து 1968 இல் மறுபடியும் திரையிடப்பட்டு, அப்போதும் 100 நாள்கள் ஓடியது. அந்த மறுவெளியீட்டின் போது திரைக்கு வந்த படம்தான் திருமால் மகிமை.

இந்தப் படத்தில் ஆழ்வார்களின் நாலாயிரம் திவ்ய பிரபந்தத்திலிருந்து மூன்று கதைகளை எடுத்து, படமாக்கியிருந்தார் ஏ.பி.நாகராஜன். பெரியாழ்வார், திருமங்கையாழ்வார், நம்மாழ்வார் ஆகியோரது கதைகள் அவை. படத்தில் சிவகுமார் விஷ்ணுவாக நடித்திருந்தார்.

மூன்று கதைகளிலும் சிவாஜி பிரதான வேடமேற்றிருந்தார். மூன்றிலும் மூன்றுவிதமான வயது, அதற்கேற்ற தோற்றம். வழக்கம் போல் தனது நடிப்பால் ரசிகர்களை கட்டிப்போட்டார் நடிகர் திலகம்.

அவருடன் பத்மினி, கே.ஆர்.விஜயா, சௌகார் ஜானகி, குட்டி பத்மினி, எஸ்.என்.லட்சுமி, நம்பியார் போன்றோர் நடித்திருந்தனர். கே.வி.மகாதேவன் இசையமைத்திருந்தார்.

1968 பெப்ரவரியில் வெளியான படம் நல்ல வரவேற்பைப் பெற்றது. பிறகு எழுபதுகளில் திருமால் பெருமையை கோவை சண்முகா திரையரங்கில் மறுபடி வெளியிட்டனர்.

முதல்நாள் முதல் காட்சி முதல் கட்டுக்கடங்காத கூட்டம். இதனால் அகமகிழ்ந்து போன திரையரங்கு உரிமையாளர், திரையரங்கில் குவிந்த கூட்டத்தை புகைப்படம் எடுத்து அதையே பத்திரிகையில் விளம்பரமாக தந்தார். அவரது செய்திப்படி முதல்வாரத்தில் 36,000 பேர் அப்படத்தை மறுவெளியீட்டில் பார்த்திருக்கிறார்கள்.

ரீரிலீசில் சிவாஜியின் கர்ணன் உள்பட பல படங்கள் சாதனை படைத்துள்ளன. அவை, சிவாஜி நடிப்பிலிருந்து விலகிய பிறகும், அவர் மறைந்த பிறகும் வெளியானவை.

அவர் தொடர்ந்து வெற்றிப் படங்கள் கொடுத்துக் கொண்டிருந்த காலத்திலும் அவரது பழைய படங்கள் வெளியாகி சாதனை படைத்துள்ளன என்பது வேறு நடிகர்களுக்கு அமையாத பெருமை. அதற்கு திருமால் பெருமை படத்தின் இந்த விளம்பரமே சான்று.