’கேஜிஎஃப்’ சாதனை முறியடிப்பு... ’பாகுபலி’ வசூலை நோக்கி முன்னேறும் ’பதான்’!

ஷாருக்கானின் ‘பதான்’ திரைப்படம் இந்தியில் ரூ.432 கோடியை வசூலித்திருந்த ‘கேஜிஎஃப் 2’ பட வசூல் சாதனையை முறியடித்துள்ளது.

அடுத்ததாக ‘பாகுபலி 2’ வசூல் சாதனையை விரைவில் முறியடிக்கும் எனக் கூறப்படுகிறது.

சித்தார்த் ஆனந்த் இயக்கத்தில் ஷாருக்கான் நடித்துள்ள ‘பதான்’ திரைப்படத்தை ஆதித்யா சோப்ரா தயாரித்துள்ளார்.

யாஷ் ராஜ் தயாரிப்பு நிறுவனத்தின் 50-வது படமாக இந்தப் படம் உருவாகியிருக்கிறது. படத்தின் ட்ரெய்லரின் தமிழ் பதிப்பை நடிகர் விஜய் வெளியிட்டிருந்தார்.

இப்படத்தில் ஷாருக்கானுடன் தீபிகா படுகோன், ஜான் ஆப்ரகாம், டிம்பிள் கபாடியா உள்ளிட்டோர் முக்கிய கதாபாத்திரங்களில் நடித்துள்ளனர்.

பதான் திரைப்படம் கடும் எதிர்ப்புகளுக்கு இடையே உலகம் முழுவதும் கடந்த ஜனவரி 25ஆம் தேதி வெளியானது.

ஹிந்தியில் மட்டுமல்லாமல் தமிழ் மற்றும் தெலுங்கு மொழியிலும் இப்படம் மொழிமாற்றம் செய்யப்பட்டு வெளியாகியிருந்தது.

4 ஆண்டுகளுக்கு பிறகு ஷாருக்கானின் படம் வெளியாகியுள்ள நிலையில், பதான் திரைப்படத்தை அவரது ரசிகர்கள் கொண்டாடி வருகின்றனர்.

முதல் நாளில் உலகம் முழுவதும் ரூ.106 கோடி வசூல் அள்ளிய இந்தப் படம் அடுத்தடுத்த நாட்களிலும் ரூ.100 கோடிக்கு மேல் வசூலித்து சாதனை படைத்தது.

தற்போது படம் வெளியாகி 15 நாட்கள் ஆன நிலையில், இந்தியில் மட்டும் படம் ரூ.450 கோடி அளவில் வசூலித்துள்ளது.

இதன் மூலம் ‘கேஜிஎஃப் 2’ படத்தின் இந்தி வசூலை முறியடித்துள்ள ‘பதான்’, ‘பாகுபலி 2’ படத்தின் இந்தி வசூலான ரூ.510 கோடியை முறியடிக்கும் என தகவல் கணிக்கப்பட்டுள்ளது.