''அழுதுட்டே வீட்டுக்கு போனேன்'' - பிரபல ஹீரோ படத்தில் நடந்த சம்பவத்தைப் பகிர்ந்த நடிகை - யார்னு தெரியுதா?

ஹிந்தி படங்களில் நடித்துவந்த சமீரா ரெட்டி, கௌதம் மேனன் இயக்கத்தில் சூர்யாவுக்கு ஜோடியாக வாரணம் ஆயிரம் படத்தின் மூலம் தமிழ் ரசிகர்களுககு அறிமுகமானார். முதல் படத்திலேயே வசீகரமான நடிப்பால் ரசிகர்களின் மனதில் இடம் பிடித்தார்.

அஜித்துக்கு ஜோடியாக 'அசல்' படத்தில் நடித்த அவர், மீண்டும் கௌதம் மேனன் இயக்கத்தில் நடுநிசி நாய்கள் படத்தில் அசத்தலான நடிப்பை வழங்கியிருந்தார்.

பின்னர் லிங்குசாமி இயக்கத்தில் மாதவனுக்கு ஜோடியாக வேட்டை படத்திலும், பிரபு தேவா இயக்கத்தில் விஷாலுக்கு ஜோடியாக வெடி படத்திலும் நடித்தார்.

இரண்டு படங்களும் எதிர்பார்த்த வெற்றியைப் பெறாததால் அவருக்கு தமிழில் வாய்ப்புகள் குறையத் தொடங்கியது.

அக்ஷய் வர்தே என்ற தொழிலதிபரை கடந்த 2014 ஆம் ஆண்டு திருமணம் செய்துகொண்ட சமீராவுக்கு ஒரு ஆண், ஒரு பெண் என இரண்டு குழந்தைகள் உள்ளனர்.

அசல் படத்துக்கு முன்பாகவே நடிகர் அஜித்தின் சிட்டிசன் படத்தின் மூலம் அறிமுகமாகவிருந்தார் சமீரா ரெட்டி. சில காரணங்களால் அந்த வாய்ப்பு நடிகையும் பாடகியுமான வசுந்தரா தாஸுக்கு சென்றது.

இதுபோன்ற சம்பவம் ஒன்றை அவர் தனது இன்ஸ்டாகிராம் பக்கத்தில் பகிர்ந்துள்ளார். பாவாடை, தாவனியில் இருக்கும் படங்களைப் பகிர்ந்த சமீரா, இது கடந்த 1998 ஆம் ஆண்டு மகேஷ் பாபு படத்தின் ஆடிசனுக்காக எடுக்கப்பட்ட படம் என்றும் அன்று மிக பயம் ஏற்பட்டதால் என்னால் சரியாக நடிக்க முடியவில்லை என்றும் குறிப்பிட்டுள்ளார்.

மேலும் அந்த சம்பவத்தால் அன்று அழுதுகொண்டே வீடு திரும்பியதாகவும் பதிவிட்டுள்ளார்.