Ilaiyaraaja 80: திருக்கடையூர் கோயிலில் இளையராஜாவுக்கு சதாபிஷேகம் - பாரதிராஜா பங்கேற்பு!

இசைஞானி இளையராஜாவின் 80-வது பிறந்தநாளை முன்னிட்டு சதாபிஷேக விழா நடைப்பெற்றுள்ளது.

தமிழ் சினிமாவின் இசை வரலாற்றை இளையராஜா எனும் பெயர் இல்லாமல் எழுதி விட முடியாது.

ஏறத்தாழ அரை நூற்றாண்டு காலமாய் தமிழ் ரசிகர்களின் உணர்வுகளோடு கடந்துவிட்டது இவரது நாதம். காதல், நட்பு, பகை துரோகம், ஏக்கம் என எல்லா உணர்வுகளையும் இவரது இசை தலைமுறைகளைத் தாண்டி கடத்திக் கொண்டே இருக்கிறது.

தமிழ் சினிமாவின் மூத்த நடிகர் ரஜினிகாந்தின் பல படங்களுக்கு இசையமைத்துள்ள இளையராஜாவை எப்போதும் பயபக்தியுடன் குறிப்பிடுகிறார் ரஜினி. மன அமைதிக்காக இமயமலை சென்று வந்த ரஜினி சமீபகாலமாக ராஜாவின் ஸ்டூடியோவுக்கு செல்ல ஆரம்பித்திருக்கிறார்.

ரஜினிகாந்தை போலவே கமல் ஹாசனின் பல படங்களுக்கும் இசையமைத்துள்ளார் இளையராஜா. எப்போதும் அவரை தனது மூத்த சகோதரராகவே குறிப்பிடுகிறார் கமல்.

தற்போது வெற்றிமாறனின் விடுதலை, விஷாலின் துப்பறிவாளன் 2 உள்ளிட்ட பல படங்களில் பணியாற்றி வருகிறார்.

இந்தியாவில் ஒரு கலைஞருக்குக் கிடைக்கும் மிகப்பெரிய பாராட்டு, தேசிய திரைப்பட விருதுகள் தான். அதைப் பெறுவது பலரின் கனவாக இருக்கிறது.

ஆனால் பல காரணங்களுக்காக இளையராஜா இரண்டு முறை தேசிய விருதை மறுத்துள்ளார்.

பகலில் ரஹ்மானையும் ராத்திரிக்கு ராஜாவையும் ரசிக்கும் ரசிகர்கள் பலர் இருக்கிறார்கள்.

இந்நிலையில் மயிலாடுதுறை மாவட்டம், தரங்கம்பாடி தாலுக்கா திருக்கடையூரில் தேவாரப்பாடல் பெற்ற அபிராமி சமேத அமிர்த கடேஸ்வரர் கோவிலில் இளையராஜாவுக்கு 80-வது பிறந்தநாளை முன்னிட்டு சதாபிஷேகம் நடைப்பெற்றுள்ளது.

இந்நிகழ்ச்சியில் இயக்குனர் பாரதிராஜா, இளையராஜாவின் மகன் கார்த்திக் ராஜா, மகள் பவதாரணி, சகோதரர் கங்கை அமரன், பிரேம்ஜி உள்ளிட்டோர் கலந்து கொண்டனர்.