யுஎஸ் பாக்ஸ் ஆபிஸில் 3-வது இடம்: புதிய சரித்திரம் படைத்த ஆர்ஆர்ஆர்!

சென்றவார இறுதி யுஎஸ் பாக்ஸ் ஆபிஸில் ஜப்பானிய அனிமேஷன் படமான Jujutsu Kaisen 0: The Movie ஐந்தாவது இடத்தைப் பிடித்துள்ளது. மார்ச் 18 வெளியான இந்தப் படம் சென்ற வார இறுதியில் 4.6 மில்லியன் டாலர்களை வசூலித்துள்ளது. மார்ச் 18 முதல் மார்ச் 27 வரை இதன் யுஎஸ் வசூல், 27.7 மில்லியன் டாலர்கள்.

நான்காவது இடத்தில் அன்சார்ட்டட் திரைப்படம் உள்ளது. சென்ற வார இறுதியில் இப்படம் யுஎஸ்ஸில் 5 மில்லியன் டாலர்களை வசூலித்துள்ளது. இது அதனது ஆறாவது வாரம். ஆறு வாரங்கள் முடிவில் இதன் வசூல் 133.6 மில்லியன் டாலர்கள்.

மூன்றாவது இடத்தில் ஆர்ஆர்ஆர் உள்ளது. சென்ற வார இறுதியில் 9.5 மில்லியன் டாலர்களை இப்படம் வசூலித்துள்ளது. நமது ரூபாயில் 70 கோடிகளுக்கும் மேல். இப்படியொரு வசூலை இதற்குமுன் எந்த இந்தியப்படமும் பெற்றதில்லை. பாகுபலி 2 க்குப் பிறகு இந்தப் படம்தான் இப்படியொரு பிரமாண்ட வசூலை பெற்றுள்ளது. இது பாகுபலி 2 பட வசூலைவிட அதிகம்.

இரண்டாவது இடத்தில் தி பேட்மேன் உள்ளது. சென்ற வார இறுதியில் 20.5 மில்லியன் டாலர்களை வசூலித்த படம் நான்குவாரங்கள் முடிவில் மொத்தமாக 332 மில்லியன் டாலர்களை தனதாக்கியுள்ளது. 

சென்றவார யுஎஸ் பாக்ஸ் ஆபிஸில் தி லாஸ்ட் சிட்டி திரைப்படம் 31 மில்லியன் டாலர்கள் வசூலுடன் முதலிடத்தில் உள்ளது. ஆரன் நீ, ஆடம் நீ இணைந்து இயக்கியிருக்கும் இந்தப் படத்தில் சான்ட்ரா புல்லக், பிராட் பிட் நடித்துள்ளனர். வார இறுதியில் 9.5 மில்லியன் டாலர்களை வசூலித்து யுஎஸ் பாக்ஸ் ஆபிஸில் புதிய சரித்திரத்தை எழுதியிருக்கிறது ராஜமௌலியின் ஆர்ஆர்ஆர் திரைப்படம்.