39 வயதில் 80 வயது அப்பராக மாறிய சிவாஜி கணேசனின் அரிய புகைப்படங்கள்!

ஏ.பி.நாகராஜனின் திருவருட்செல்வர் திரைப்படத்தில் சிவாஜி கணேசன் 80 வயது முதிய அப்பாராக சில காட்சிகளில் தோன்றுவார். அப்போது மேக்கப்பிற்காக வெளிநாடு செல்வது, ஹாலிவுட் கலைஞர்களை வரவழைப்பது போன்ற ஹைடெக் சமாச்சாரங்கள் இல்லை. உள்ளூரில் இருப்பதைக் கொண்டு மேக்கப் போட்டாக வேண்டும்.

திருவருட்செல்வர் படத்தில் சிவாஜிக்கு மேக்கப் போட்டவர் ரங்கசாமி. இவரும் இவரது நண்பர் நன்னுவும் (இவர் மேக்கப் மேதை ஹரிபாபுவின் மகன்) இணைந்து பிளாஸ்டிக் மேக்கப் என்ற ஒன்றை கண்டுபிடித்திருந்தனர். வஜ்ஜிரம், ஃபிலிமை ஒட்ட பயன்படும் பொருள் இவற்றையெல்லாம் சேர்த்து இவர்களே கண்டுபிடித்ததுதான் இந்த பிளாஸ்டிக் மேக்கப்.

1. இந்த கலவையை முதலில் நடிகரின் முகத்தில் தடவ வேண்டும்.

2. முகத்தில் நன்றாக கலவை படும்படி தேயத்துக் கொள்ள வேண்டும். இது  குளிர்ந்து கெட்டியாகும் போது தோலை இழுத்தால் எரிச்சலை தரும்.

3. முகத்தில் பூசப்பட்ட கலவையின் மேல் தூரிகையினால் திரவ வடிவலிலான பிளாஸ்டிக் பூசப்படும்.

4. முகத்தில் சுருக்கங்கள் விழுவதற்காக இரண்டாவது கட்டத்தில் தேய்த்துவிட்டதைப் போன்று முகத்தை தேய்த்துவிட வேண்டும். கண்ணோரம் சுருக்கங்கள் விழுந்திருப்பதைப் பார்க்கலாம்.

5. சின்னதாக வெட்டப்பட்ட முடிகளை கொஞ்சம் கொஞ்சமாக எடுத்து, பிசின் தடவி பிளாஸ்டிக் பூச்சுக்கு மேலாக ஒட்டி தாடியை உருவாக்க வேண்டும்.

6. முகத்தில் தாடி ஒட்டுவது முழுமையடைந்த பின் நரைத்தப் புருவங்களை உருவாக்கும் பணி நடக்கிறது.

7. காதின் கீழாக மெல்லிய வளையம் ஒட்டப்பட்டுள்ளது. இதுவே பல நிமிடங்கள் பிடிக்கும் வேலை.

8. காதில் வளையம் வைத்த பிறகு மீசை வைக்கப்படுகிறது. தாடி, புருவம் செய்த அதே முறையில் மீசை வைக்கப்படுகிறது.

9. அடுத்து நெற்றியில் திருநீறு. இது அசல் திருநீறு அல்ல. இதுவும் ஒருவகை கலவை. இதனை சிவாஜியே பூசிக் கொண்டதாக ரங்கசாமி தெரிவித்துள்ளார். 10. அப்பருக்கும் ருத்திராட்ச அணிகலன்கள் உண்டு. கழுத்தில் கையில் ருத்திராட்சை மாலை அணிவிக்கப்படுகிறது.

11. சுருக்கம் விழுந்த முகம், நரை விழுந்த தலை, தாடி, மேனியெங்கும் திருநீறு, அணிகலன்களாக ருத்திராட்சம். தோள் ஒடுங்கிய தேகம் என  39 வயது நடிகர் திலகம் இரண்டு மணி நேரத்தில் 80 வயது அப்பராக மாறிவிட்டார். "அம்மா சாப்பாடு எடுத்து வை" என்ற வசனத்தையே, நீளமா இருக்கு குறைக்க முடியுமா என்று கேட்கிற இந்தத் தலைமுறையில் நடிகர் திலகம் போல் ஒரு அர்ப்பணிப்பும், அசாத்திய திறமையும் கொண்ட நடிகர் உருவாக வாய்ப்பில்லை. மேக்கப் என்றதும் ஹாலிவுட் செல்லும் இளைய தலைமுறை, ஒருகாலத்தில் உள்ளூரிலேயே ஹாலிவுட்டை மிஞ்சும் மேக்கப்கள் போடப்பட்டன என்பதை நினைவு கொள்ள வேண்டும்.