Rangamma Patti: எம்.ஜி.ஆர் - ஜெயலலிதா படங்களில் நடித்த ரங்கம்மா பாட்டி - வறுமையின் பிடியில் சிக்கித் தவித்த கொடூரம்

பழம்பெரும் நடிகை ரங்கம்மா பாட்டி பல காமெடி வேடங்களிலும், குணச்சித்திர வேடங்களிலும் நடித்துள்ளார். இவர் இன்று மரணமடைந்துள்ளார்.

துணை வேடங்களில் நடிக்கும் பலரைப் போல இவரது வாழ்க்கையும் கண்ணீர் கதை மிகுந்தது.

வடிவேலுவுடன் வரும் ஒரு காமெடி காட்சியில், “இந்தா அந்த நாயைக் கொஞ்சம் சூன்னு வெரட்டிட்டுப் போ” என்று சொல்லும் ரங்கம்மா பாட்டி, அந்த காட்சியை அதகளப்படுத்தியிருப்பார். ஆனால் அவரது தனிப்பட்ட வாழ்க்கை அப்படி கலகலப்பாக இல்லை.

ரங்கம்மா பாட்டிக்கு எம்.ஜி.ஆர் என்றால் உயிர். அவரின் படத்தை கையில் பச்சை குத்தும் அளவுக்கு அவருக்கு எம்.ஜி.ஆர் மீது தீராத பற்று. எம்.ஜி.ஆர் எப்போதும் உதவி கேட்டு வருபவர்களுக்கு இல்லையென்று ஒருபோதும் சொன்னதில்லை. அவரது இந்த குணம் தான் ரங்கம்மா பாட்டிக்கு அவரை பிடித்து போக காரணம். ரங்கம்மா பாட்டி, எம்.ஜி.ஆருடன் மட்டுமே ஏழு படங்களில் நடித்துள்ளார்.

அதனால் உதவி என்று வந்தவர்களுக்கு, தன் கையில் இருப்பதையெல்லாம் கொடுத்து உதவியிருக்கிறார். ஆனால் தனது கடைசி காலத்தில் உதவுவதற்கு ஆள் இல்லாமல் மிகுந்த இன்னல்களுக்கு ஆளாகியிருந்தார்.

கதவு கூட இல்லாத சிறிய அறையில், ஒரே ஒரு கட்டிலுடன் எந்த வசதிகளும் இல்லாமல், ரங்கம்மா பாட்டி வாழ்ந்து வந்தார். அவருக்கு மொத்தம் 12 பிள்ளைகள், அதில் இரண்டு பேர் தான் இப்போது இருக்கின்றனர். அவர்களும் கஷ்டத்தில் இருக்கின்றனர்.

அதனால் தனது அன்றாட தேவைகளுக்காக கர்சீப், சோப்பு, கீ செயின் உள்ளிட்டவற்றை விற்றுதான் தனது வாழ்க்கையை நடத்தி வந்தார். முன்பு மெரினா கடற்கரையில் விற்றுக் கொண்டிருந்த ரங்கம்மா பாட்டி அங்கு அனுமதி மறுக்கப்பட்டதால், வீட்டிலேயே பொருட்களை விற்று பிழைப்பு நடத்தினார். ஆனால் கடந்த சில மாதங்களாக உடல்நிலை பாதிக்கட்டிருந்தார்.

ரங்கம்மா பாட்டி குணச்சித்திர நடிகை மட்டுமல்ல, அவர் பழைய படங்களில் நடிகைகளுக்கு டூப் போட்டிருக்கிறார். ஒருவேளை நீங்கள் கவிஞர் கண்ணதாசனின் பிரபல பாடலான, பரமசிவன் கழுத்தில் இருந்து பாம்பு கேட்டது பாடலை அடுத்தமுறை கேட்கும்போது, நன்றாக பாருங்கள். அதில் ஜெயலலிதா பக்கத்தில், ரங்கம்மா பாட்டியும் இளமை ததும்ப உட்கார்ந்திருப்பார்.

தனக்கு திரையுலகை சேர்ந்தவர்கள் நடிக்க வாய்ப்பு கொடுத்தால், அதை வைத்து வயிற்றுப் பிழைப்பை பார்த்துக் கொள்வேன் என தன் வறுமையைப் பற்றி சில மாதங்களுக்கு முன்பு இணையதள நேர்க்காணலில் கூறியிருந்தார் ரங்கம்மா பாட்டி. உச்சத்தில் இருந்த நடிகர்கள் பின்னாட்களில் ஏழ்மையின் கோர பிடியில் சிக்கி தவிப்பதைப் போலவே, ரங்கம்மா பாட்டியும் அதில் மாட்டிக் கொண்டு, இன்று காலமாகியிருக்கிறார்.