ஹாலிவுட் படக்காட்சியை இணைத்து எடுக்கப்பட்ட ரஜினியின் சேஸிங் காட்சி

1983 இல் கமலின் தூங்காதே தம்பி தூங்காதே படம் ஏவிஎம் தயாரிப்பில் வெளியானது. எஸ்.பி.முத்துராமன் படத்தை இயக்கியிருந்தார். இதன் கிளைமாக்ஸ் ஹெலிகாப்டர் சண்டைக் காட்சி பரபரப்பாக பேசப்பட்டது.

இந்தியில் தர்மேந்திரா படத்தில் இடம்பெற்ற ஹெலிகாப்டர் சண்டைக் காட்சியை, படம் சரியாகப் போகாததால், அப்படத்தின் தயாரிப்பாளருக்கு உதவும் பொருட்டு, பணம் கொடுத்து ஏவிஎம் வாங்கி, அதனை தூங்காதே தம்பி தூங்காதே கிளைமாக்ஸில் பன்படுத்திக் கொண்டனர்.

அதில் லாங் ஷாட்டில் காட்டப்படும் ஹெலிகாப்டர் காட்சிகள் இந்தி சினிமாவில் இடம்பெற்றவை. குளோசப்பில் கமல் ஹெலிகாப்டரில் இருப்பது போன்ற காட்சிகள் ஸ்டுடியோவில் எடுக்கப்பட்டவை. இரண்டையும் வெற்றிகரமாக 'மேட்ச்' செய்து, கமல் ஹெலிகாப்டரில் பறந்து நாயகியை காப்பாற்றுவதாக காட்டியிருந்தனர்.

இந்திப்பட தயாரிப்பாளருக்கு உதவும் பொருட்டு, பணம் கொடுத்து, ஹெலிகாப்டர் சேஸிங் காட்சியை ஏவிஎம் பயன்படுத்தியது. இதற்கு 5 வருடங்கள் முன்னால், பணமோ, அனுமதியோ வாங்காமல் எஸ்.பி.முத்துராமன் ஆங்கிலப்படக் காட்சியை தனது தமிழ்ப் படத்துக்கு பயன்படுத்திக் கொண்டார். அந்தப் படம் ரஜினி நடித்த ப்ரியா.

1975 இல் சினிமாவில் அறிமுகமான ரஜினி, 1978 டிசம்பரில் தனது முதல் சோலோ வெள்ளிவிழாப் படத்தை தந்தார். அந்தப் படம் ப்ரியா,. இதன் படப்பிடிப்பு முழுக்க சிங்கப்பூரில் நடந்தது. படத்தின் இறுதி கிளைமாக்ஸில் நாயகி ஸ்ரீதேவியை காரில் கடத்திச் செல்வார்கள். ரஜினி பின்னால் ஒரு காரில் துரத்திச் சென்று, ஸ்ரீதேவியை மீட்க வேண்டும். இந்தக் காட்சியில் ஹாலிவுட்டில் 1968 இல் வெளியான Bullitt படத்தின் கார் சேஸிங் காட்சியை வெட்டி பயன்படுத்திக் கொண்டனர்.

Bullitt திரைப்படத்தில் அன்றைய பிரபல ஹாலிவுட் நடிகர் ஸ்டீவ் மெக் குயின் நாயகனாக நடித்தார். 4 மில்லியன் டாலாரில் எடுக்கப்பட்ட இப்படம் 42 மில்லியன் டாலர்களை வசூலித்ததுடன், சிறந்த எடிட்டிங்கிற்கான ஆஸ்கர் விருதையும் வென்றது. படத்தின் வெற்றிக்கு முக்கியமான காரணமாக அமைந்தது. சான்பிரான்சிஸ்கோவில் எடுக்கப்பட்ட கார் சேஸிங் காட்சி.

இன்றும் இந்தக் காட்சி உலகில் படமாக்கப்பட்ட சிறந்த கார் சேஸிங் காட்சிகளில் ஒன்றாக கொண்டாடப்படுகிறது. இந்த சேஸிங்கை குறித்து மட்டுமே ஏராளமான செய்திகள், கட்டுரைகள் உள்ளன. அப்படிப்பட்ட பிரபல சேஸிங் காட்சியை எவ்வித அனுமதியும் இல்லாமல் துணிச்சலாக ப்ரியா படத்தில் பயன்படுத்திக் கொண்டனர்.

ப்ரியா படத்தின் கிளைமாக்ஸ் சேஸிங்கில்  ஒரு காட்சி சான்ஸ்பிரான்சிஸ்கோவாக இருக்கும். அடுத்த கணம் சிங்கப்பூர்... அடுத்தது மறுபடி சான்பிரான்சிஸ்கோ... என்று மாறி மாறிவரும். இங்கு இடம்பெற்றிருக்கும் கார் காட்சி அனைத்தும் ஆங்கிலப் படத்திலிருந்து எடுத்து ப்ரியாவில் பயன்படுத்தியவையாகும்.

Bullitt படத்தின் சேஸிங் காட்சி யூடியூபில் உள்ளது. ப்ரியா படமும் யூடியூபில் உள்ளது. நேரம் போகாத போது இரண்டு படத்தின் காட்சிகளையும் மாற்றி மாற்றி ஓட்டிப் பார்த்து பரவசம் கொள்ளலாம்.

ப்ரியா படம் 1979, ஜனவரி 12 ஆம் தேதி கன்னடத்தில் மொழிமாற்றம் செய்து வெளியிடப்பட்டது. நாளை கன்னடப் பதிப்பு வெளியாகி 44 வருடங்களாகிறது.