’அடுத்த வாரிசு’ முதல் ’படையப்பா’ வரை வெள்ளிவிழா கண்ட ரஜினியின் படங்கள்!

நடித்தப் படங்கள் அதிகளவில் வெள்ளி விழா, 100 நாள்களை கண்டுள்ளன. எண்பதுகள் மற்றும் தொண்ணூறுகளில் வரிசையாக ரஜினி படங்கள் 100 நாள்கள் ஓடி வெற்றி பெற்றன. அது பற்றிய ஒரு விரிவான பார்வை.

1. அடுத்த வாரிசு (1983): 1983 ஜுலை 7 ஆம் தேதி ரஜினி, ஸ்ரீதேவி நடிப்பில் எஸ்.பி.முத்துராமன் இயக்கிய அடுத்த வாரிசு படம் வெளியானது. 1956 இல் வெளியான ஹாலிவுட் திரைப்படம் அனஸ்டாசியாவை தழுவி எடுக்கப்பட்ட இந்தப் படம் 100 நாள்கள் ஓடியது.

2. தங்கமகன் (1983): 1983 நவம்பர் 4 ஆம் தேதி வெளியான தங்கமகன் ரஜினி, பூர்ணிமா நடிப்பில் வெளியானது. ஆக்ஷன் திரைப்படமான இதனை ஜெகன்நாத் இயக்கியிருந்தார். படம் 100 நாள்களை கடந்து ஓடியது.

3. நான் மகான் அல்ல (1984): 1984 ஜனவரி 14 ஆம் தேதி நான் மகான் அல்ல வெளியானது. நான் மகாத்மா அல்ல என்றுதான் முதலில் பெயர் வைத்திருந்தனர். சென்சார் அனுமதிக்காததால் மகாத்மா மகான் ஆனது. ரஜினி, ராதா நடித்த இந்தப் படத்தை எஸ்.பி.முத்துராமன் இயக்கியிருந்தார். படம் 100 நாள்கள் ஓடி வெற்றி பெற்றது.

4. தம்பிக்கு எந்த ஊரு (1984): 1984 ஏப்ரல் 20 ஆம் தேதி வெளியான தம்பிக்கு எந்த ஊரு படத்தில் ரஜினி, மாதவி நடித்திருந்தனர். ராஜசேகர் இயக்கிய படம் 100 நாள்கள் ஓடி லாபம் சம்பாதித்தது.

5. கை கொடுக்கும் கை (1984): மகேந்திரன் இயக்கத்தில் ரஜினி, ரேவதி நடித்த கை கொடுக்கும் கை திரைப்படம் 1984 ஜுன் 15 வெளியாகி 100 நாள்களை கடந்து ஓடி வெற்றி பெற்றது.

6. நல்லவனுக்கு நல்லவன் (1984): ரஜினி, ராதிகா, கார்த்திக் நடித்த நல்லவனுக்கு நல்லவன் 1976 இல் வெளியான தர்மாத்முடு படத்தின் தமிழ் தழுவல். எஸ்.பி.முத்துராமன் இயக்கத்தில் ஏவிஎம் தயாரிப்பில், 1984 அக்டோபர் 22 வெளியான படம் 100 நாள்களை கடந்து ஓடி வெற்றியை பதிவு செய்தது.

7. நான் சிகப்பு மனிதன் (1985): எஸ்.ஏ.சந்திரசேகரன் இயக்கத்தில் ரஜினி, அம்பிகா, சத்யராஜ் நடித்தப் படம் நான் சிகப்பு மனிதன். 1984 இந்திப் படம் ஆஜ் கி அவாஸ் படத்தின் தழுவலான இது 1985 ஏப்ரல் 12 வெளியாகி 100 நாள்கள் ஓடியது.

இந்த ஏழு படங்கள் தொடர்ச்சியாக வெளியாகி 100 நாள்கள் கண்டவை. இதற்கு நடுவில் வெளியான ஒரேயொரு படம் அன்புள்ள ரஜினிகாந்த். அது ரஜினி கௌரவ வேடத்தில் தோன்றிய படம்.

இதேபோல் தொண்ணூறுகளில் ரஜினி நடித்த 11 படங்கள் வரிசையாக 100 நாள்கள் ஓடின.

1. தளபதி (1991): மணிரத்னம் இயக்கத்தில் ரஜினி, ஷோபனா நடித்த தளபதி நவம்பர் 5, 1991 தீபாவளிக்கு வெளியாகி 100 நாள்கள் ஓடியது.

2. மன்னன் (1992): 1986 வெளியான கன்னடப் படம் அனுராக அரலிடிது படத்தை மன்னன் என்ற பெயரில் பி.வாசு எடுத்தார். ரஜினி, விஜயசாந்தி, குஷ்பு நடித்தப் படம் 100 நாள்களை கடந்து ஓடி வெற்றி பெற்றது.

3. அண்ணாமலை (1992): இந்தி குதாகர்ஷ் திரைப்படத்தின் தமிழ் தழுவலான அண்ணாமலை 1992 ஜுன் 27 வெளியானது. ரஜினி, குஷ்பு நடித்த இந்தப் படம் 100 நாள்களை கடந்து ஓடி வெற்றிப் பெற்றது.

4. பாண்டியன் (1992): கன்னட பாம்பே தாதா படத்தின் தழுவலான பாண்டியன் 1992 அக்டோபர் 25 வெளியானது. ரஜினி, குஷ்பு, ஜெயசுதா நடித்த இந்தப் படம் 100 நாள்களை கடந்து வெற்றி பெற்றது.

5. எஜமான் (1993): ஏவிஎம் தயாரிப்பில் ரஜினி, மீனா நடித்த எஜமான் திரைப்படம் 1993 பிப்ரவரி 18 வெளியாகி 100 நாள்களை கடந்து வெற்றி பெற்றது. ஆர்.வி.உதயகுமார் படத்தை இயக்கியிருந்தார்.

6. உழைப்பாளி (1993): ஆக்ஷன் திரைப்படமான உழைப்பாளி 1993 ஜுன் 24 வெளியாகி 100 நாள்களை தொட்டது. ரஜினி, ரோஜா நடித்த இப்படத்தை பி.வாசு இயக்கியிருந்தார்.

7. வீரா (1994): அல்லரி மெகுடு என்ற பெயரில் தெலுங்கில் வெளியான படத்தை தமிழில் வீரா என்ற பெயரில் எடுத்து, 1994 ஏப்ரல் 14 ஆம் தேதி வெளியிட்டனர். ரஜினிக்கு மீனா, ரோஜா என இரு ஜோடிகள். படம் 100 நாள்கள் ஓடியது.

8. பாட்ஷா (1995): ரஜினியின் பாட்ஷா எளிதாக 100 நாள்களை கடந்து வெள்ளிவிழாவும் கண்டது. சுரேஷ் கிருஷ்ணா இயக்கிய இந்தப் படத்தில் ரஜினி, நக்மா நடித்திருந்தனர். 1995 ஜனவரி 12 பாட்ஷா வெளியானது.

9. முத்து (1995): மலையாள தேன்மாவின் கொம்பத்து படத்தை தமிழுக்கேற்றதுபோல் மாற்றி எடுத்தப் படம் முத்து. ரஜினி, மீனா நடிப்பில் கே.எஸ்.ரவிக்குமார் இயக்கிய படம் 100 நாள்களை கடந்து ஓடியதுடன், ஜப்பானிலும் வெற்றிக்கொடி நாட்டியது.

10. அருணாச்சலம் (1997): சுந்தர் சி. இயக்கத்தில் ரஜினி, சௌந்தர்யா நடித்த அருணாச்சலம் படம் ரஜினியின் மற்றுமொரு 100 நாள் படம். 1997 ஏப்ரல் 10 ஆம் தேதி அருணாச்சலம் வெளியானது.

11. படையப்பா (1999): கே.எஸ்.ரவிக்குமார் இயக்கத்தில் ரஜினி, சிவாஜி, சௌந்தர்யா, ரம்யா கிருஷ்ணன் நடித்த படையப்பா எளிதாக 100 நாள்களை கடந்து வெள்ளிவிழா கண்டது. 1999 ஏப்ரல் 10 படையப்பா வெளியானது.

எண்பதுகளில் 7 படங்களும், தொண்ணூறுகளில் 11 படங்களும் ரஜினி நடிப்பில் தொடர்ச்சியாக 100 நாள்கள் கண்டன. இதுபோல் வேறு எந்த நடிகரும் 100 நாள் படங்கள் தந்ததில்லை