ஒவ்வொரு தியேட்டரிலும் அனுமனுக்கு தனி சீட்.. ஆதிபுருஷ் பட நிறுவனம் அறிவிப்பு

ராமாயணத்தை அடிப்படையாகக் கொண்டு ஓம் ராவத் இயக்கியுள்ள படம் ஆதிபுருஷ். இந்தப் படத்தில் ராமராக பிரபாஷ், ராவணனாக சைப் அலிகான், சீதையாக கீர்த்தி சனோன் நடித்துள்ளனர்.

3டி தொழில்நுட்பத்தில் 5 மொழிகளில் வருகிற 16 ஆம் தேதி இந்தப் படம் வெளியாகிறது.

கடந்த இந்தப் படத்தின் டீசர் வெளியானது அதில் இடம்பெற்ற கிராஃபிக்ஸ் காட்சிகளால் கேலிக்குள்ளானது. கார்டூன் படம் போன்று இருப்பதாக விமர்சனங்கள் எழுந்தன.

இதனால் கிராஃபிக் காட்சிகளை மேம்படுத்த படக்குழு முடிவெடுத்ததன் காரணமாக கடந்த ஜனவரியில் வெளியாக வேண்டிய படம் ஜூன் மாதம் தள்ளிப்போனது.

இதனையடுத்து சமீபத்தில் வெளியான டிரெய்லரில் டீசரை விட கிராஃபிக்ஸ் காட்சிகள் சற்று மேம்படுத்தப்பட்டதாக இருந்தது.

இந்த நிலையில் தயாரிப்பு நிறுவனம் வெளியிட்டுள்ள ட்விட்டர் பதிவில், ஆதிபுருஷ் வெளியாகும் திரையரங்குகளில் ஒரு இருக்கையை அனுமனுக்காக காலியாக விடப்போவதாகவும் அர்ப்பணிப்பு, பக்தி ஆகியவற்றின் உருவமாக விளங்கும் அனுமனுக்கு மிகுந்த மரியாதையுடன் கூடிய அஞ்சலி எனவும் குறிப்பிட்டுள்ளது.