கமலின் அன்பே சிவம் படத்தில் விஜய்யா ? வைரலாகும் போட்டோ - அந்த மனசு தான் சார் கடவுள்!

இன்று ரசிகர்களால் கொண்டாடப்படும் கிளாசிக் தமிழ் படங்களில் ஒன்றாக இடம் பிடித்திருக்கும் அன்பே சிவம் திரைப்படம் வெளியான போது பெரும் தோல்விப்படமாக அமைந்தது.

கதை, திரைக்கதை எழுதி கமல்ஹாசன் நடித்திருந்த இந்தப் படத்தை சுந்தர்.சி இயக்கியிருந்தார். மாதவன் இந்தப் படத்தில் கமலுக்கு இணையான முக்கிய வேடத்தில்  நடித்திருந்தார்.

கடந்த வருடம் கமல்ஹாசனின் பிறந்த நாளின்போது அன்பே சிவம் ரீ ரிலீஸ் செய்யப்பட்டபோது திரையரங்கம் ஹவுஸ்ஃபுல்லானது.

தமிழ் நாட்டில் கடந்த 2004 ஆம் ஆண்டு சுனாமி வருவதற்கே முன்பே இந்தப் படத்தில் சுனாமி குறித்து பேசியிருப்பார் கமல். இதனையடுத்து அன்றே கணித்தார் கமல் என ரசிகர்கள் குறிப்பிடுவதுண்டு.

மேலும் யார் நல்லது செய்தாலும் 'அந்த மனசு தான் சார் கடவுள்' என இந்தப் பட வசனத்தை பேசுவதை ரசிகர்கள் வழக்கமாக கொண்டிருக்கிறார்கள்.

எதிர்பாராத ஒரு பயணத்தில் இரு வெவ்வேறு குணாதிசயங்கள் கொண்ட அன்பு மற்றும் சிவம் ஆகிய இருவரும் சந்தித்துக்கொள்கின்றனர். அதன் பிறகு அவர்கள் வாழ்க்கையில் ஏற்படும் மாற்றமே இந்தப் படத்தின் கதை. யார் யார் சிவம் உள்ளிட்ட இசையமைப்பாளர் வித்யாசாகரின் பாடல்களும் இந்தப் படத்துக்கு ஹைலைட்டாக அமைந்தது.

இந்த நிலையில் அன்பே சிவம் கெட்டப்பில் கமலுடன் நடிகர் விஜய் இருக்கும் போட்டோ சமூக வலைதளங்களில் வைரலாகிவருகிறது.

இதனையடுத்து அன்பே சிவம் படத்தில் விஜய் நடித்தாரா என ரசிகர்கள் கேள்வி எழுப்பிவருகின்றனர். படப்பிடிப்பு தளத்தில் இருவரும் நட்பு ரீதியாக சந்தித்துக்கொண்டபோது எடுக்கப்பட்ட படமாக இருக்கலாம் என்று கூறப்படுகிறது.