கேரள கோவிலுக்குள் அனுமதி மறுப்பு..!  விரக்தியில் பார்வையாளர் பதிவேட்டில் எழுதிய அமலா பால்..!

கேரளாவின் எர்ணாகுளத்தில் அமைந்துள்ள கோவிலில் இந்துக்கள் மட்டுமே கோவில் வளாகத்திற்குள் அனுமதிக்கப்படுவதாக கூறப்படுகிறது.  இந்நிலையில் கோவிலுக்கு சென்ற அமலாவுக்கு அனுமதி மறுக்கப்பட்டுள்ளது.

இறுதியில் கோயிலுக்கு எதிரே உள்ள சாலையில் இருந்து இறைவனை தரிசனம் செய்ய நேரிட்டதாக அமலா பால் தெரிவித்துள்ளார். இதனால் நடிகை அதிருப்தி அடைந்துள்ளார்.

அமலா பால் திங்கள்கிழமை கேரளா எர்ணாகுளத்தில் உள்ள திருவைராணிகுளம் மகாதேவர் கோயிலுக்குச் சென்றுள்ளார். அங்கிருந்த அதிகாரிகள் கோவிலுக்குள் இந்துக்கள் மட்டுமே அனுமதி எனக்கூறி கிறிஸ்துவ மதத்தைச் சேர்ந்த அவரை கோவிலுக்குள் அனுமதிக்க மறுத்துள்ளனர்.

இதனால் அதிருப்தியடைந்த அமலா பால் அங்கிருந்த கோவிலின் பார்வையாளர் பதிவேட்டில் தனது அனுபவத்தை பகிர்ந்துள்ளார். அதில் அவர் நாட்டில் இன்னும் பாகுபாடு இருப்பது வருத்தமளிக்கிறது என தெரிவித்துள்ளார்.

அவர் அந்த பதிவேட்டில் "2023-ல் மதப் பாகுபாடு இன்னும் நிலவுவது வருத்தமும் ஏமாற்றமும் அளிக்கிறது. என்னால் கடவுளின் அருகில் செல்ல முடியவில்லை இருந்தாலும் தூரமாக நின்று அருளை பெறமுடிந்தது. விரைவில் மதப் பாகுபாடு போன்ற எண்ணங்களில் இருந்து மாற்றம் ஏற்படும் என்று நம்புகிறேன். கூடிய விரைவில் நாம் அனைவரும் மதத்தின் அடிப்படையில் அல்லாமல் , சமமாக நடத்தப்படும் நேரம் வரும்" என்று எழுதியுள்ளார்.

இந்த செய்தி வைரலானதை அடுத்து கோவில் நிர்வாகத்தினர் பதில் அளித்துள்ளனர். திருவைராணிகுளம் மகாதேவர் கோயிலின் அறக்கட்டளை செயலர் கூறுகையில், இதற்கு முன்னரும் பிற மதத்தினரும் வந்து சாமி தரிசனம் செய்ததுள்ளனர்.இருப்பினும், ஒரு பிரபலம் வந்தால், அது சர்ச்சையாகி விடுகிறது.நீண்ட காலமாக நடைமுறையில் உள்ள நெறிமுறைகளை மட்டுமே தாங்கள் பின்பற்றி வருவதாக கோயில் நிர்வாகம் தெரிவித்துள்ளது.