என்டிஆரின் டூப்பாக இருந்து முன்னணி நடிகரான கைகலா சத்யநாராயணா!

தெலுங்கின் பிரபல நடிகரான கைகலா சத்யநாராயணா இயற்கை எய்தியுள்ளார். கமலின் பஞ்ச தந்திரம் படத்தில்தான் பெரும்பாலான தமிழர்கள் அப்படியொரு நடிகர் இருப்பதை தெரிந்து கொண்டனர். ஒரே படத்தில் எப்போதும் மறக்க முடியாத நடிகராக மக்கள் மனதில் அவர் பதிந்து போனார். அதற்கு காரணம், அவரது நகைச்சுவை.

கைகலா சத்யநாராயணா ஆந்திராவைச் சேர்ந்தவர். தெலுங்கில் 750 படங்களுக்கு மேல் நடித்துள்ளார். கன்னடத்தில் ஒரேயொரு படம். தமிழில் பஞ்ச தந்திரம், பெரியார். இந்தியில் தமிழைவிட அதிகப் படங்கள். எனினும், அங்கேயும் சிங்கிள் டிஜிட்தான்.

பஞ்ச தந்திரத்தில் ஸ்ரீமனின் கதாபாத்திரம் தெலுங்கு என்பதால், அவரது மாமனாராக நடிக்க கைகலா சத்யநாராயணாவை ஆந்திராவிலிருந்து கமல் அழைத்து வந்தார். பிரமாண்ட ஆகிருதியுடன் வெள்ளந்தியான அவரது பேச்சு அனைவரையும் கவர்ந்தது. பெத்த கல்லு சின்ன லாபம், சின்ன கல்லு பெத்த லாபம் என்று அவர் பேசிய வசனம் பஞ்ச தந்திரம் பார்த்தவர்களுக்கு கடைசிவரை மறக்காது.

கைகலா சத்யநாராயணா 1959 இல் திரைத்துறைக்குள் நடிகராக நுழைந்தார். முதல் படம் சிப்பாயி கூதுறு சுமாராகவே போனது. அசப்பில் என்டிஆர் போல் இருந்தது அவருக்கு பிளஸ்ஸாகவும் அதே நேரம் மைனஸாகவும் அமைந்தது. தனக்கு டூப்பாக நடிக்கும் வாய்ப்பை என்டிஆர் அவருக்கு அளித்தார்.

இறுதிவரை டூப்பாகவே கழிந்திருக்க வேண்டிய அவரை காப்பாற்றியது விட்டலாச்சாரியார். அவர் தனது, கனக துர்கா பூஜா மகிமா படத்தில் கைகலா சத்யநாராயணாவை வில்லனாக்கினார். அதன் பிறகு தொடர்ச்சியாக வில்லன் வேடங்களில் நடித்தார். அப்படியே குணச்சித்திரம், நகைச்சுவை என்று மாறி, தெலுங்கு சினிமா சரித்திரத்தில் நீங்கா இடம் பிடித்தார்.

கைகலா சத்யநாராயணா நல்ல கதை ஞானம் உள்ளவர். அதுவே அவரை தயாரிப்பாளராக்கியது. 1990 இல் கொடம்ம சிம்கம் என்ற படத்தை தனது ராமா பிலிம்ஸ் சார்பில் சிரஞ்சீவியை வைத்து தயாரித்தார். இந்தப் படம் ஆந்திராவில் 20 திரையரங்குகளுக்கு மேல் 100 நாள்கள் ஓடியது. இதனை ஆங்கிலத்தில், ஹண்டர்ஸ் ஆஃப் தி இன்டியன் ட்ரெஷ்ஷர்ஸ் என்ற பெயரிலும், இந்தியில் மெய்ன் ஹுன் கிலாடியோன் கி கிலாடி என்ற பெயரிலும் மொழிமாற்றம் செய்து வெளியிட்டார். இவர் தயாரித்த பங்காரு குடும்பம் இன்னொரு வெற்றிப் படம். நாகேஸ்வரராவ், ஜெயசுதா பிரதான வேடங்களில் நடித்த இந்தப் படத்தின் கதையை ராஜமௌலியின் தந்தை விஜயேந்திர பிரசாத் எழுதியிருந்தார். இந்தப் படத்தில் விக்ரம், ரம்பா ஆகியோரும் நடித்திருந்தனர்.

கைகலா சத்யநாராயணா தெலுங்கு தேசம் கட்சியில் தன்னை இணைத்துக் கொண்டு, அரசியலிலும் சுறுசுறுப்பாக இயங்கினார். 1996 இல் மச்சிலிப்பட்ணம் தொகுதியிலிருந்து அவர் எம்பியாக தேர்வு செய்யப்பட்டார்.

டூப்பாக இருந்து, வில்லனாகி, குணச்சித்திரம், நகைச்சுவை என வளர்ந்து, தயாரிப்பாளர் மற்றும் அரசியல்வாதியாக பரிணமித்த கைகலா சத்யநாராயணாவின் வாழ்க்கை ஒரு நிறைகுடத்தைப் போன்றது. தெலுங்கு சினிமாவில் அவரது இடம் யார் வந்தாலும் கடைசிவரை நிரப்பப்படாமலே இருக்கும்.