''பணத்துக்காக இப்படி மாறிட்டீங்க.!'' - மகாலட்சுமி ரவீந்திரன் ட்வீட்-க்கு எதிர்வினையாற்றிய நெட்டிசன்கள்!

சின்னத்திரை தொகுப்பாளராக ரசிகர்களிடையே பிரபலமானவர் மகாலட்சுமி. டிவி தொடர்களிலும் நடித்துவருகிறார்.

இவருக்கும் தயாரிப்பாளர் ரவீந்திரனுக்கும் கடந்த ஆண்டு செப்டம்பர் மாதம் திருமணம் நடைபெற்றது. இருவரும் தங்களது திருமண அறிவிப்பை புகைப்படங்களுடன் சமூக வலைதளங்களில் வெளியிட்டனர்.

இதனையடுத்து ரவீந்திரன் உருவக் கேலிக்குள்ளானார். மேலும் ரவீந்திரன் வசதி படைத்தவர் என்பதால் தான் மகாலட்சுமி அவரை திருமணம் செய்துகொண்டதாக விமர்சிக்கப்பட்டார்.

இருவரும் ஜோடியாக எடுக்கப்பட்ட புகைப்படங்களை சமூக வலைதளங்களில் அடிக்கடி பகிர்ந்து வருகின்றனர். திருமணம் முடிந்து 100 நாள் ஆனதை குறிப்பிட்ட ரவீந்தர், ''எனது 37 வருட வாழ்க்கையை பொறுத்தவரை இந்த 100 நாளில் ஒவ்வொரு நொடியும் அனுபவித்து வாழ்ந்தேன். இன்னும் அதிக காதலுடன், மகிழ்ச்சியுடன், சண்டையுடன் இந்த வாழ்க்கையை கடப்போம். வாழ்றேன் அம்மு உன்னால'' என்று பதிவிட்டிருந்தார்.

அதே போல 4 மாதங்கள் நிறைவடைந்தது குறித்து தனது இன்ஸ்டாவில் ரவீந்தருடன் இருக்கும் போட்டோ பகிர்ந்த மகாலட்சுமி, வாழ்க்கை அழகாக போய்க்கொண்டிருப்பதாக தெரிவித்திருந்தார்.

இந்த நிலையில் மகாலட்சுமியின் சமீபத்திய பதிவு தேசிய அளவில் டிரெண்டிங்கில் இருக்கிறது. அதில் நாங்கள் ஒருவருக்காக ஒருவர் படைக்கப்பட்டோம் என்று பதிவிட்டிருந்தார் மகாலட்சுமி.

இதனையடுத்து கமெண்ட் பகுதியில் பணத்துக்காக மாறிவிட்டீர்கள், எல்லாமே பணம் தான், பணத்தால் சந்தோஷத்தை வாங்க முடியாது என்று யார் சொன்னது என அவரை கடுமையாக விமர்சித்துவருகின்றனர்.

ஆனால் இதைப் பற்றி இருவரும் கவலைகொள்ளவில்லை. மகாலட்சுமியுடன் இருக்கும் படத்தை பகிர்ந்து ,''எனது 8வது அதிசயம்'' என ரவீந்தர் பகிர, அதற்கு மகாலட்சுமி, யார் என்ன சொன்னால் என்ன ? நான் உங்களை என் இதயத் துடிப்பு நிற்கும் வரை காதலிப்பேன். நீங்கள் இல்லாமல் நானில்லை என்று கமெண்ட் செய்துள்ளார்.