அன்பு என்ற சொல்லின் பொருள் விக்கி... உருக்கமான நயன்தாரா!

நயன்தாரா நடிப்பில் இன்று கனெக்ட் திரைப்படம் வெளியாகியுள்ளது. படத்தின் புரொமோஷனுக்காக தொகுப்பாளினி டிடி-யுடன் நேர்க்காணலில் கலந்துக் கொண்ட அவர், நிறைய விஷயங்களைப் பகிர்ந்துக் கொண்டார்.

நேர்க்காணலில் ஒரு பகுதியாக ஐபேடில் சிலவற்றை காட்டி, அதைப் பார்த்ததும் உங்கள் நினைவுக்கு வருவது என்ன எனக் கேட்டார் டிடி. அதன் படி முதலில் ஹார்ட் படத்தைக் காட்டினார்.

அதற்கு, “என் கணவர். நான் அன்பு என எதையெல்லாம் நினைக்கிறேனோ, அதெல்லாம் அவர் தான். எப்போதிலிருந்து எனக்கு அவரை தெரியுமோ, எப்போதிலிருந்து நாங்கள் காதலிக்க ஆரம்பித்தோமோ, அப்போதிலிருந்து காதல் என்ற சொல்லின் பொருள் அவர் தான்.

அவரின் அன்பு என்னை மிகவும் அமைதிப்படுத்தியிருக்கிறது. அவர் என்னை பார்த்துக் கொள்ளும் விதம், என் வேலையில் அவர் தரும் ஆதரவு என அனைத்தும், வாழ்க்கையில் எந்த சூழலில் இருந்தாலும், நம்மள பத்தி யார் என்ன சொன்னாலும் என இனி எதைப்பற்றியும் கவலைப்பட தேவையில்லை என என்னை அமைதிப்படுத்தியிருக்கிறது.

எதுவா இருந்தாலும் அவர் பாத்துக்குவாரு, அவர் கூட இருந்தா நாம சந்தோஷமா தான் இருப்போம் என நினைக்க வைத்தது” என்றார்.

பின்னர் மேக்கப் பற்றிய படத்துக்கு பதிலளித்த நயன், “இது எனக்கு வாழ்க்கை. காரணம் தினமும் இதை நான் போட்டுக் கொள்கிறேன். மத்தவங்களுக்கு மேக்கப் அவங்களை மெருகேத்திக்கிறதுக்காக. எங்களுக்கு மேக்கப் கடவுள் மாதிரி. அதனால் மேக்கப் போட ஆரம்பிக்கும் போதே சாமி மாதிரி நினைத்து, அதை தொட்டு வணங்கிவிட்டு தான் போட்டுக் கொள்வோம்” என்றார்.

அடுத்து வந்த ஸ்கூல் படத்துக்கு, “என்னுடைய ஸ்கூல் நினைவுகள் என்றாலே கேந்திர வித்யாலயாவாக தான் இருக்கும். அங்கிருந்த பிரின்ஸிபல், டீச்சர்ஸ் பத்தின மெமரி எல்லாம் வந்து போகும். அவங்க எல்லாருக்கும் நான் பெட் ஸ்டூடெண்ட்டாக இருந்தேன்” என்றார் நயன்தாரா.

பின்னர் கிஃப்ட் குறித்து பேசிய அவர், “வாழ்க்கையில் உங்களுக்கு என்ன கிடைத்ததோ அதைத் தான் நான் கிஃப்ட் என நினைப்பேன். அதனால் என் வாழ்க்கையே எனக்கு மிகப்பெரிய பரிசு தான். மற்றபடி விக்கி எனக்கு நிறைய பரிசு கொடுத்திருக்கிறார். அதெல்லாம் எனக்கு ரொம்ப ஸ்பெஷல்” என்றார்.