அழகான இந்த காதல் அன்பாலே நிஜமாச்சு! நயன்தாராவின் காதல் டூ கல்யாண கதை..

‘ஒரு வார்த்தை சொல்ல ஒரு வருசம் காத்திருந்தேன்’ என ’ஐயா’ திரைப்படத்தில் ஆடிப் பாடி அறிமுகமான நயன்தாரா அதன்பின் நிகழ்த்தியவை எல்லாம் தமிழ் சினிமா வரலாறானது. ’கொஞ்ச நேரம் கொஞ்சி பேசக் கூடாதா’ என கேட்க வைத்தது ரஜினிகாந்தின் சந்திரமுகி. பின்பு ‘கஜினி’ ‘கள்வனின் காதலி’, ‘வல்லவன்’, ‘தலைமகன்’, ‘ஈ’, ‘பில்லா’, ‘சத்யம்’ , ‘வில்லு’, ‘ஏகன்’ என ஏகத்திற்கும் நடித்து தமிழ் சினிமா ரசிகர்களின் கனவு கன்னி ஆனார் நயன்தாரா.

‘எங்கேயோ பார்த்த மயக்கம் எப்போதோ வாழ்ந்த நெருக்கம்’ என ரசிகர்களின் மனசாட்சியை திரையில் சொன்னது தனுஷுடன் இவர் நடித்த ‘யாரடி நீ மோகினி’

’ராஜா ராணி’, ‘மாயா’,’டோரா’ ‘அறம்’ ’நானும் ரவுடிதான்’ ’மூக்குத்தி அம்மன்’, ’நெற்றிக்கண்’ என கதாநாயகிகளில் தனி ஒருவராகி லேடி சூப்பர் ஸ்டார் ஆனார் நயன்தாரா’ .இதில் ’நானும் ரவுடிதான்’ திரைப்படத்தின் இயக்குனர் விக்னேஷ் சிவனின் மேல் காதல் கொண்டு அவரின் நாயகியுமானார் நயன்.

N மற்றும் V எழுத்துக்களான தொப்பிகளை இருவரும் மாற்றி மாற்றி போட்டும்…. சோசியல் மீடியாக்களில் ரொமாண்டிக் செல்ஃபிகளை வெளியிட்டும் சினிமா ரசிகர்களின் யூகங்களுக்கு ரெக்கை கட்டி விட்டனர் இந்த ஜோடி புறாக்கள்.

‘காத்து வாக்குல ரெண்டு காதல்’ திரைப்படத்தில் ”நான் பிழை நீ மழலை…எனக்குள் நீ இருந்தால் அது தவறே இல்லை என நயன்தாராவுக்கு விக்னேஷ் சிவன் காதல் கடிதம் எழுதி கல்யாணத்திற்கும் நாள் குறித்தார்.

2022 ஜூன் 9 அன்று இருவருக்கும் திருமணம் என வந்த செய்தியால் கோலிவுட்டில் திருவிழா களை கட்டியது. சினிமா நட்சத்திரங்கள் புடை சூழ மெஹந்தி வைபவத்தோடு ஆரம்பித்து மத்தாப்பு சிரிப்புடன் மங்கல நாண் பூட்டும் நிகழ்வோடு முடிவடைந்தது இந்த சேர நாட்டு இளவரசியின் திருமணம். தமிழ்நாட்டின் மருமகளான இந்த கேரள நாட்டு தேவதையை ‘ மணக்கோலம் கொண்ட மகளேபுது மாக்கோலம் போடு மயிலே’என மலர் தூவி வரவேற்றது தமிழ்நாடு.