மாரி செல்வராஜ் ஆகச் சிறந்த இயக்குநர்; கர்ணன் ரிலீசாகட்டும் கொண்டாடுவீங்க - பிரபல நடிகர் புகழாரம்

கார்த்திக் சுப்புராஜ் படத்தைத் தொடர்ந்து பரியேறும் பெருமாள் பட இயக்குநர் மாரி செல்வராஜ் இயக்கத்தில் தனுஷ் நடித்துவருகிறார்.

தனுஷின் 41-வது படமாக உருவாகும் இந்தப் படத்துக்கு கர்ணன் என்று தலைப்பு வைக்கப்பட்டுள்ளது.

அசுரன் பட வெற்றியைத் தொடர்ந்து தனுஷின் கர்ணன் படத்தையும் வி.கிரியேஷன்ஸ் சார்பில் கலைப்புலி எஸ்.தாணு தயாரிக்கிறார். இந்தப் படத்தின் படப்பிடிப்பு ஜனவரி 5-ம் தேதி தொடங்கியது. திருநெல்வேலி மற்றும் அதன் சுற்றுவட்டார பகுதிகளில் படப்பிடிப்பு நடத்தி வந்த படக்குழு கடந்த மார்ச் மாதத்தில் 90 சதவிகித படப்பிடிப்பை முடித்திருப்பதாக அறிவித்தது.

இந்தப் படத்தில் மலையாள நடிகை ரெஜிஷா விஜயன் தனுஷுக்கு ஜோடியாக நடிக்கிறார். மேலும் லட்சுமி குறும்படத்தில் நடித்த லட்சுமி பிரியா சந்திரமௌலி, கௌரி கிஷான் உள்ளிட்டோரும் நடிக்கிறார்கள்

மேலும் இந்தப் படத்தில் யோகி பாபு, மலையாள நடிகர் லால் உள்ளிட்டோரும் நடிக்கின்றனர்.

இந்நிலையில் படம் குறித்து நடிகரும், ஒளிப்பதிவாளருமான நட்டி நட்ராஜ் தனது ட்விட்டர் பக்கத்தில் கருத்து பதிவிட்டுள்ளார். அதில் மாரி செல்வராஜை ஆகச் சிறந்த இயக்குநர் என்று பாரட்டியிருக்கும் அவர், படம் ரிலீசான பின்னர் கொண்டாடுவீர்கள் என்றும் கூறியுள்ளார்.