மோனிகா, ஓ மை டார்லிங்கை குடும்பத்துடன் பார்க்கலாமா?

இந்தக் கேள்விக்கான பதிலை சொல்லும் முன் முதலில் படத்தின் கதை. ரோபோட் தயாரிக்கும் யூனிகான் கம்பெனியில், ஒரு ரோபோட் ஒரு தொழிலாளியை கொலை செய்து விடுகிறது.

அதனை விபத்து என்று மூடிமறைத்து, ஒருவரை வேலையை விட்டு நீக்கிவிடுகிறார்கள். ஆறு மாதங்கள் கழித்து, கம்பெனியின் 50 வருட ஆண்டுவிழாவில் ஜெயந்த் என்பவனை கம்பெனியின் போர்ட் ஆஃப் டைரக்டர்ஸ்களில் ஒருவராக சிஇஓ சத்யநாராயண் அறிவிக்கிறார்.

ஜெயந்த் நடுத்தரக் குடும்பப் பின்னணியில் இருந்து இந்த இடத்துக்கு வந்தவன். சிஇஓவின் மகள் நிக்கி அவனை காதலிக்கிறாள். ஆனால், சிஇஓவின் மகன் நிஷிகாந்துக்கு அவனை பிடிப்பதில்லை.

நிக்கியை காதலித்துக் கொண்டேமோனிகாவுடன் தொடர்பில் இருக்கிறான் ஜெயந்த். கர்ப்பமாக இருக்கிறேன், செலவுக்கு அதிக பணம் வேண்டும் என்கிறாள் மோனிகா. இந்த நேரம் அவன் மோனிகாவுடன் இருக்கும் புகைப்படத்தை ஒருவன் அனுப்பி அவனை மிரட்டுகிறான்.

மிரட்டல் ஆசாமியை சந்திக்கச் சென்றால் அது நிஷிகாந்த். அவனையும் மோனிகா பிளாக்மெயில் செய்கிறாள். அவனுக்கும் அவளுடன் தொடர்பு உள்ளது.

ஹோட்டல் அறையில் இவர்கள் பேசிக் கொண்டிருக்கையில், பாத்ரூமிலிருந்து கம்பெனியின் அக்கவுண்ட்ஸில் வேலை பார்க்கும் அர்விந்த் வெளியே வருகிறான். அவனுக்கும் மோனிகாவுடன் தொடர்பிருக்கிறது. அவனையும் அவள் மிரட்டியிருக்கிறாள்.

மோனிகாவை கொலை செய்வதே ஒரேவழி என்ற நிஷிகாந்தின் திட்டத்துக்கு மற்ற இருவரும் உடன்படுகிறார்கள். நிஷி கொலை செய்வான், ஜெயந்த் பாடியை ஊருக்கு வெளியே எடுத்துச் செல்ல வேண்டும், அரவிந்த் அதனை காட்டில் புதைக்க வேண்டும்.

எல்லாம் திட்டமிட்டபடி நடக்கும். கொல்லப்பட்டு, டார்ப்பாயில் சுற்றப்பட்டு, ஜெயந்தின் வண்டிக்குள் வைக்கப்பட்ட பிணம் மோனிகாவினுடையது அல்ல, நிஷிகாந்தினுடையது என்பது மறுநாள் தெரியவரும். அதை செய்தது மோனிகாவா இல்லை வேறு யாரோவா நிஷிகாந்தை தொடர்ந்து அர்விந்த், மோனிகா கொல்லப்படுவார்கள், ஜெயந்த் மீதும் தாக்குதல் நடக்கும். இறுதியில் கொலையாளி யார் என்பதை கண்டுபிடிப்பதுடன் சுபம்.

முதல்பாதி கதையை நீட்டியும், பிற்பாதி கதையை சுருக்கியும் சொல்ல காரணம், பிற்பாதி கதையில் அப்படியொன்றும் சுவாரஸியம் இல்லை. இத்தனை கொலைகள் நடக்கும் போது அதன் காரண காரியம் வலுவாக இருக்க வேண்டாமா? வந்தேன்... கொன்றேன் என்பது போல் இருக்கிறது காரணம்.

போலீஸ் அதிகாரியாக வரும் ராதிகா ஆப்தே வித்தியாசம் என்ற பெயரில் கொல்கிறார். மோனிகா ஒருவேளை குழந்தை பெற்றிருந்தால் அந்தக் குழந்தை உனக்கு மச்சானாக இருக்கும் என்று மோனிகாவின் காதலர்களின் லிஸ்டை சிஇஓவரை உயர்த்திய அந்த வசனம் டாப்.

மோனிகாவாக வரும் ஹுமா குரோஷிக்கும், ஜெயந்தாக வரும் ராஜ்குமார் ராவுக்கும் ஒரு சண்டை இருக்கிறது. பலரும் அதை மறுக்கா மறுக்கா பார்த்துக் கொண்டிருக்கிறார்கள்.

படத்தின் பெஸ்ட் சீன் அது. அதுபோல் நிஷிகாந்த் ஹோட்டல் அறையில் ஜெயந்தை மட்டம்தட்டிப் பேசும் வசனங்களும் கிளாஸ்.

பின்னணி இசை படத்திற்கு வேறொரு கலரை தருகிறது. கேட்டு பரவசப்பட வேண்டிய விஷயம். ஒன்றிரண்டு காட்சிகளைத் தவிர்த்து குடும்பத்தோடு படத்தைப் பார்க்கலாம்.

மோனிகா ஓ மை டார்லிங் ஒரு ஹாஃப் பேக் படம் என்றால் சிலர் கோபப்படுவார்கள்.

அவர்கள் இர்பான்கான் நடித்த பிளாக்மெயில் இந்திப் படத்தைப் பார்த்தால் ஏன் மோனிகா ஓ மை டார்லிங்கை ஹாஃப் பேக் என்கிறோம் என்பதற்கான அர்த்தம் புரியும்.