சல்மான் கானை இயக்கிய மோகன்ராஜா - படங்கள்!

ரேவதி, அதியமான், பிரபுதேவா போன்ற ஒருசிலருக்குப் பிறகு சல்மான் கானை இயக்கிய பெருமை மோகன்ராஜாவுக்கு கிடைத்துள்ளது.

மலையாளத்தில் வெளியான லூசிபர் திரைப்படத்தை மோகன்ராஜா இயக்கத்தில் தெலுங்கில் ரீமேக் செய்து வருகின்றனர். காட்ஃபாதர் என பெயர் வைக்கப்பட்டிருக்கும் இந்தப் படத்தில் மலையாளத்தில் மோகன்லால் நடித்த வேடத்தில் சிரஞ்சீவியும், மஞ்சு வாரியர் நடித்த வேடத்தில் நயன்தாராவும் நடிக்கின்றனர். முக்கியமான கௌரவ வேடம் ஒன்றில் சல்மான் கான் நடிப்பதாக கூறப்பட்டது. அதன்படி சல்மான் கானும் காட்ஃபாதரில் நடித்தார். அவர் சம்பந்தப்பட்ட காட்சிகளை வெற்றிகரமாக படமாக்கியதாக மோகன்ராஜா தெரிவித்துள்ளார்.

ரேவதி, அதியமான், பிரபுதேவா போன்ற ஒருசில தமிழ் சினிமா பிரபலங்கள்தான் சல்மான் கானை இயக்கியிருக்கிறார்கள். அந்த வரிசையில் மோகன்ராஜாவும் இப்போது இணைந்திருக்கிறார். மலையாளத்தில் பிருத்விராஜ் நடித்த மோகன்லாலின் முதன்மை கையாள் வேடத்தில் சல்மான் கான் நடித்திருக்கலாம் என கூறப்படுகிறது.

சல்மான் கான் என்பதால் அடியாள் வேடத்தை நண்பனாக மாற்றியிருக்கலாம் எனவும் ஹைதராபாத்திலிருந்து வரும் தகவல்கள் தெரிவிக்கின்றன.

இந்த ரீமேக் படத்தைத் தொடர்ந்து போலா சங்கர் என்ற படத்தில் சிரஞ்சீவி நடிக்கிறார். தமன்னா நாயகியாக நடிக்கும் இந்தப் படம் தமிழில் வெளியான வேதாளம் படத்தின் ரீமேக்காகும்.