13வது ஆண்டு திருமண நாள்... கணவர் வித்யாசாகர் பிரிவால் கலங்கி நிற்கும் நடிகை மீனா!

நடிகை மீனாவின் 13வது ஆண்டு திருமண நாள் இன்று. இந்நிலையில் கடந்த வருடம் கணவர் வித்யாசாகருடன் மீனா கொண்டாடிய திருமண நாளின் பதிவு இணையத்தில் வைரலாகி வருகிறது.

தென்னிந்திய சினிமாவில் முன்னணி நடிகையாக வலம் வந்தவர் மீனா. தற்போது தமிழ், மலையாள படங்களில் கதைக்கு முக்கியத்துவம் தரும் ரோல்களில் நடித்து வருகிறார். இதுத்தவிர சின்னத்திரையிலும் மீனா முகம் காட்டி வருகிறார்.

மீனா, சினிமாவில் பிஸியாக நடித்துக் கொண்டிருக்கும் போதே பெங்களூரை சேர்ந்த வித்யாசாகரை திருமணம் செய்து கொண்டார்.

திருமணத்திற்கு பிறகு சினிமாவில் நடிப்பதை குறைத்துக் கொண்டார் மீனா. இந்த ஜோடிக்கு நைனிகா என்ற மகள் உள்ளார். இவர் விஜய்யுடன் தெறி படத்தில் நடித்ததன் மூலம் குழந்தை நட்சத்திரமாக அறிமுகம் ஆனார்.

இந்நிலையில் கடந்த ஜூன் 28 ஆம் தேதி மீனாவின் கணவர் வித்யாசாகர் உடல் நலக் குறைவு காரணமாக சென்னையில் காலமானார். இவரின் மறைவுக்கு சினிமா நட்சத்திரங்கள், மீனாவின் நண்பர்கள் பலரும் இரங்கல் செய்தி வெளியிட்டு மீனாவுக்கு ஆறுதல் கூறி இருந்தனர்.

இந்நிலையில் மீனா - வித்யாசாகருக்கு திருமணம் ஆகி இன்றுடன் 13 ஆண்டுகள் நிறைவடைகின்றன. கடந்த வருடம் 12 வது திருமண நாளை மீனா தனது கணவர் மற்றும் குடும்பத்தினர் உடன் கொண்டாடி இருந்தார். ஆனால் இன்று மீளா சோகத்தில் மீனா உள்ளார். இந்த நேரத்தில் கடந்த ஆண்டு மீனா தனது கணவருக்கு இன்ஸ்டாவில் திருமண வாழ்த்து சொன்ன பதிவு இணையத்தில் தற்போது வைரலாகி வருகிறது.

அந்த பதிவில் மீனா, “வானவில் போல் வந்து என் வாழ்வை வண்ணமயமாக மாற்றினாய். உங்களுடன் சேர்ந்து இருப்பது எனக்கு மிகவும் பிடித்தது. நீங்கள் கொடுத்த இந்த சிரிப்பை எப்போதும் நான் அணிந்திருப்பேன், திருமண நாள் வாழ்த்துக்கள் கணவரே” என பதிவிட்டுள்ளார்.