கமல், ரஜினிக்கு ஜோடியாக நடித்த இந்த குழந்தை நட்சத்திரம் யார் தெரிகிறதா?

இந்தப் புகைப்படத்தில் லட்சுமி தூக்கி வைத்திருக்கும் குழந்தை நட்சத்திரம் ரஜினி, கமலுக்கு ஜோடியாக நடித்தவர். அவர் யார் என்று தெரிகிறதா?

இந்தப் புகைப்படம் இடம் பெற்ற திரைப்படம் நெஞ்சங்கள். 1982 இல் வெளிவந்தது. சிவாஜி, லட்சுமி, விஜயகுமார், ஜோதி, மஞ்சுளா, தியாகராஜன், மனோரமா, தேங்காய் சீனிவாசன், ஒய்.ஜி.மகேந்திரன், சில்க் ஸ்மிதா, மேஜர் சுந்தர்ராஜன் என பலர் நடித்த படம்.

மேஜர் சுந்தர்ராஜன் அந்த நேரத்தில் சிவாஜியை வைத்து கல்தூண், ஊரும் உறவும் படங்களை இயக்கியிருந்தார். அவர்தான் நெஞ்சங்கள் படத்தையும் இயக்கியது. இசை சங்கர் - கணேஷ்.

இதில் சிவாஜி பெரும்பகுதி காட்சிகளில் தாடியுடன் வருவார். அதற்குப் பின்னால் ஒரு கதை இருக்கும். சென்னை வரும் அவருடன் பிராடு வேலைகள் செய்யும் ஒய்.ஜி.மகேந்திரன் சேர்ந்து கொள்வார். தியாகராஜன் தான் வில்லன்.

விஜயகுமார், ஜோதி தம்பதிகளின் மகளை கடத்தி, பணம் பறிக்க அவர்கள் திட்டம் தீட்ட, அதனை அறிந்து கொள்ளும் சிவாஜி அந்தக் குழந்தையை லட்சுமியின் வீட்டிற்கு எடுத்து வருவார்.

குழந்தை காணாமல் போனதை அறிந்து கொள்ளும் தியாகராஜன், குழந்தை வேண்டுமென்றால் பணம் தர வேண்டும் என விஜயகுமாரை மிரட்டுவார். இன்னொருபுறம் குழந்தையை தேடிக் கொண்டிருப்பார். இறுதியில் சிவாஜி குழந்தையை பெற்றோரிடம் ஒப்படைத்து, தியாகராஜனை மாமியார் வீட்டுக்கு அனுப்பி வைப்பார்.

இதில் சிவாஜிக்கு ஒரு பிளாஷ்பேக் உண்டு. அதில் வில்லன்கள் அவரது மனைவி மஞ்சுளாவையும், அவரது குழந்தையையும் கொன்றுவிடுவார்கள். அந்த வில்லனை பிடித்தக் கொடுத்து, அதற்குக் கிடைத்த பரிசுப் பணத்தை மக்களுக்கே அளித்துவிட்டு மனைவி மற்றும் மகள் இறந்த துக்கத்தில் தாடி வளர்த்து மெட்ராஸ் வந்திருப்பார்.

மகளைப் போலிருக்கும் விஜயகுமாரின் மகளிடம் அவருக்கு ஓர் ஒட்டுதல் ஏற்படும். அந்த குழந்தை வேறு யாருமில்லை, நடிகை மீனா.

நெஞ்சங்கள் படத்தில்தான் மீனா முதல்முதலாக குழந்தை நட்சத்திரமாக அறிமுகமானார். இந்தப் படத்தின் ஹைலைட்டான விஷயம் மீனாவின் துறுதுறு நடிப்புதான்.

லட்சுமி மீனாவை பாப்பா என்று அழைக்கும் போதெல்லாம், நான் பாப்பா இல்லை, என் பேரு பாலா என்று வெடுக்கென்று சொல்லும் ஸ்டைலில் மொத்த ரசிகர்களையும் கவர்ந்தார்.

இதில் தேங்காய் சீனிவாசன் லாட்டரிச்சீட்டு வெறியராக வருவார்.

சிவாஜி தனது சொந்தத் திரையரங்கான சாந்திக்கு வருவது போல் ஒரு காட்சி வரும். அப்போது சாந்தியில் 1982 இல் சிவாஜி நடிப்பில் வெளியான வா கண்ணா வா படம் ஓடிக்கொண்டிருக்கும். சிவாஜியின் பெரிய கட்அவுட்டெல்லாம் வைத்திருப்பார்கள்.

படத்தின் இறுதிக்காட்சியை மெரினா கடற்கரையில் எடுத்திருந்தார்கள். கடற்கரையில் உள்ள காமராஜர் சிலைக்குக்கீழே இறுதிக்காட்சி நடக்கும். ஒய்.ஜி.மகேந்திரன், மனோரமா, லட்சுமி என யார் அழைத்தும் கேட்காமல், கடமை முடிந்தது என்று விலகிச் செல்லும் சிவாஜி, நீங்க போனால் நானும் உங்க மகளைப்போல சாமிகிட்ட போயிடுவேன் என்று மீனா சொல்ல, சிவாஜி பதறி ஓடிவருவார். அத்தோடு சுபம்.

நெஞ்சங்கள் படத்தை விஜயகுமார் - மஞ்சுளா தம்பதி தயாரித்திருந்தனர்.

தங்களது மகள் வனிதா பெயரில் வனிதா புரொடக்ஷன்ஸ் என்ற நிறுவனத்தைத் தொடங்கி  நெஞ்சங்களை தயாரித்தனர்.

படத்தின் ஆரம்பத்தில் நிறுவனத்தின் பெயர் வருகையில் அப்போது குழந்தையாக இருந்த வனிதா கடவுள் படத்துக்கு மலர்தூவுவார். அதனை லைவாக எடுத்து படத்தில் சேர்த்திருந்தனர். அந்தவகையில் நெஞ்சங்கள் மீனாவுக்கு மட்டுமின்றி வனிதாவுக்கும் முதல் படமாக அமைந்தது.