ஓடிடியில் ரசிகர்களுக்கு நல்ல விருந்து : மம்மூட்டியின் 'நண்பகல் நேரத்து மயக்கம் படத்தில் என்ன ஸ்பெஷல்?

இசையமைப்பாளர் இல்லாமல் பழைய தமிழ் பாடல்களை மட்டுமே பின்னணியில் ஒலிக்கவிட்டு இரண்டு மணி நேர படத்தை அனைவரையும் ஆச்சரியப்படும் வகையில் எடுத்து முடித்துள்ளது மலையாள சினிமா.

மம்முட்டி, ரம்யா பாண்டியன் உள்ளிட்டோர் நடிப்பில் லிஜோ ஜோஸ் இயக்கத்தில் உருவான நண்பகல் நேரத்து மயக்கம் கடந்த பொங்கலுக்கு திரையரங்கில் வெளியாகி இருந்தாலும் தற்போது நெட்பிளிக்ஸில் வெளியான பின்னர் தமிழ் ரசிகர்கள் மத்தியில் அதிக கவனத்தை ஈர்த்து வருகிறது.

வேளாங்கண்ணிக்கு சுற்றுப்பயணம் வரும் மம்முட்டி ஒரு கிராமத்தை பார்த்தவுடன் வேறு ஒரு நபராக மாறி அந்த கிராமத்தில் ஏற்கெனவே வாழ்ந்த ஒரு தமிழர் கதாபாத்திரத்தை அப்படியே பிரதிபலிக்கிறார். காணாமல் போன தமிழரின் ஆவி மம்முட்டி உடலுக்குள் வந்ததா இல்லை மம்முட்டி எதுவும் கதை கேட்டுவிட்டு நடிக்கிறாரா, உண்மையில் என்ன நடந்தது என ரசிகர்களையே யூகிக்கவிட்டு ரசிக்கும்படியான ஒரு திரைப்படத்தை உருவாக்கியுள்ளார் இயக்குநர் லிஜோ ஜோஸ்.

அங்கமாலி டைரிஸ், ஜல்லிக்கட்டு உள்ளிட்ட திரைப்படங்கள் மூலம் ஏற்கனவே கவனம் பெற்ற லிஜோ ஜோஸ் இந்த திரைப்படத்தில் ஏறத்தாழ ஒரு தமிழ் திரைப்பட இயக்குனர் போலவே தமிழ் ரசிகர்கள் மத்தியில் கவனத்தை ஈர்த்துள்ளார்.

கதாபாத்திரமாகவே மாறி ரசிகர்களை படத்தோடு ஒன்றவைக்கிறார் மம்முட்டி. மம்முட்டி தனது சிறந்த நடிப்பை வெளிப்படுத்த உதவிய படங்களுள் இதுவும் ஒன்றாக அமைந்துள்ளது.

படத்தின் அனைத்துக் காட்சிகளுக்கும் பின்னணியில் ஒரு பழைய பாடலை ஓடவிடுவது ரசிகர்களை மிகவும் கவரும் அம்சமாக உள்ளது.

தமிழ்நாட்டில் உள்ள கிராமத்து வீடுகளின் அமைப்பு, கலைஞர் தொலைக்காட்சி பெட்டியின் முக்கியத்துவம் என சின்ன சின்ன விஷயங்களைக்கூட மிகவும் கவனமாக ஒரு மலையாள இயக்குநர் கையாண்டுள்ளது படத்தின் அழகை அதிகரிக்கிறது.

ஒரு திரைப்படம் உலகின் கவனத்தை ஈர்க்கவேண்டுமானால் அது பிரம்மாண்டமாகவும் அதிக பொருள் செலவிலும்தான் தயாரிக்கப்பட வேண்டும் என எந்தக் கட்டாயமும் இல்லை என நிரூபிக்கும் மற்றொரு மலையாள திரைப்படமாகவே இது வெளிவந்துள்ளது.

பிளைவுட் நிறுவன விளம்பரத்தை மையப்படுத்தி இந்த கதை உருவாக்கப்பட்டு இருப்பதை படத்தின் ஆரம்பத்திலேயே இயக்குநர் ஒப்புக்கொண்டிருப்பது கலைக்கான மரியாதை. நல்ல தமிழ் படங்களை உருவாக்க நினைக்கும் இயக்குநர்கள் கதையை வேறெங்கோ தேடி அலையாமல் தமது கிராமங்களிலேயேகூட சிறந்த கதைகளை தேர்வுசெய்ய முடியும் என்பதற்கு இந்த படம் நல்லதோர் உதாரணம். OTT-யில் படங்களை விரும்பி பார்க்கும் ரசிகர்களுக்கு நண்பகல் நேரத்து மயக்கம் நல்ல விருந்து.