மோகன்லால் வசனத்தை வைத்து அரசியல் ட்ரோல் செய்த மலையாளிகள்

மலையாளிகள் சாதி, மதம் பார்க்காமல் கொண்டாடுகிற திருவிழா ஓணம். ஒருகாலத்தில் கேரள மண்ணை ஆண்டு கொண்டிருந்த மகாபலி மகாராஜா தனது நாட்டுப் பிரஜைகளை காண வரும் ஐதீகத்தை முன்வைத்து ஓணம் பண்டிகை கொண்டாடப்படுகிறது. இதன் பின்புலமாக வாமனன் என்ற விஷ்ணுவின் அவதாரத்தை வைத்து புராணக் கதைகளும் உண்டு.

இந்தமுறை மலையாளிகளுக்கு ஓணம் வாழ்த்து சொன்ன மத்திய உள்துறை அமைச்சர் அமித்ஷா, வாமன ஜெயந்திக்கு வாழ்த்து என தெரிவித்திருந்தார். மகாபலி மகாராஜாவின் வருகையை மறைத்து, வாமனனின் பிறந்த நாளாக ஓணத்தைத் திரித்து அவர் சொன்ன வாழ்த்துக்கு கேரளாவில் கடும் எதிர்ப்பு எழுந்தது. அந்த மத அரசியல் நமக்கு வேண்டாம். அமித்ஷாவுக்கு எதிர்ப்புத் தெரிவித்தவர்கள், 'நீ போ மோனே ஷாஜி' என்ற ஹேஷ்டேக்கை ட்ரெண்ட் செய்தனர். மலையாளிகள் தவிர்த்த பலருக்கும் இதன் பொருள் தெரியாது.

2000 இல் மோகன்லால் நடிப்பில் நரசிம்ஹம் என்ற படம் வெளியானது. ஷாஜி கைலாஷ் இயக்கிய இந்தப் படத்தில், சிவில் சர்வீஸில் முதல் ரேங்க் வாங்கிய இந்துசூடனை ஒரு கொலை வழக்கில் பொய்யாக பிரதியாக்கி, சிறைத்தண்டனை வாங்கித் தருவார் அரசியல்வாதியான மணப்பள்ளி மாதவன் நம்பியார். அவர் காங்கிரஸ்காரர்.

அவர் இறந்து, அவரது சாம்பலை ஆற்றில் கரைக்க கொண்டு செல்கையில் இந்துசூடன் தனது ஆள்களுடன் வந்து, மணப்பள்ளி மாதவன் நம்பியாரின் சாம்பலை கரைக்கவிடாமல் தடுப்பார். மாதவன் நம்பியார் வெள்ளைக்காரனின் ஒற்றனாக இருந்து, சுதந்திரத்துக்குப் பின் அரசியலில் நுழைந்து பதவி வாங்கியவர் என இந்துசூடன் குற்றம்சாட்டுவார். கடைசியில் சாம்பலை கரைக்காமல் திருப்பிச் செல்வார்கள்.

இதில் இந்துசூடனாக மோகன்லால் நடித்திருந்தார். அவரை நரசிம்ம அவதாரம் போல் சித்தரித்து ஓபனிங் சீனை வைத்திருப்பார் இயக்குநர். வேதமந்திரங்கள் முழங்க ஆற்றங்கரையில் அவர் நடந்துவரும் காட்சி படமாக்கப்பட்டிருக்கும். அந்தப் படத்தில் மோகன்லால், 'நீ போ மோனே தினேஷா' என்ற டயலாக்கை அடிக்கடி பிரயோகிப்பார். அப்படியென்றால் 'நீ போ என் மகனே தினேஷா' என்று பொருள். இந்த டயலாக் கேரளாவில் பிரபலம். நரசிம்ஹத்தில் கௌரவ வேடத்தில் வரும் மம்முட்டியும் மோகன்லாலின் இந்த டயலாக்கை பேசி நடித்திருப்பார்.

படத்தில் மோகன்லால் நரசிம்மம் போல் கெட்டவர்களை அழிப்பவர். காங்கிரஸ் கட்சிக்காரர்தான் பிரதான எதிராளி. அந்த டயலாக்கை வைத்துதான் அமித்ஷாவை மலையாளிகள்,  'நீ போ மோனே ஷாஜி' என ட்ரோல் செய்தனர். அமித்ஷாவில் உள்ள ஷாவுடன் ஜி சேர்த்தால் ஷாஜி.

மோகன்லால் இதேபோன்ற டயலாக்கை பல படங்களில் பயன்படுத்தியிருக்கிறார். உடையோனில் 'சும்மா...' என்ற டயலாக்கை அடிக்கடி பயன்படுத்துவார். நாட்டுராஜாவு படத்தில், 'நினக்கு ஒந்நும் அறிஞ்சுகூடாம்... காரணம் நீ குட்டியாணு...' என்பார்.

அதாவது, 'உனக்கு எதுவும் தெரியாது, ஏன்னா நீ வெறும் குழந்தை' என்று பொருள்.. 2001 இல் வெளிவந்த ராவணப்பிரபு படத்தில் 'சவாரி கிரிகிரி' என்ற டயலாக். இதனை அவர் பேச, அவரது தந்தையாக வரும் வயதான மோகன்லால், இது என்ன தெரியுமா? தமிழ்ல வர்ற ஒரு பாட்டு என, சவாரி கிரி கிரி சைதாப்பேட்டை வடகறி, உட்டான் பாரு ஜாங்கிரி என பாடிக் காட்டுவார்.

ரஜினியின், ஒரு தடவை சொன்னா நூறு தடவை சொன்ன மாதிரி பன்ச் டயலாக்கை நாம் மனப்பாடமாக வைத்திருப்பது போல், மலையாளிகள் இதுபோன்ற பன்ச் டயலாக்குகளை படங்களிலேயே திரும்ப வைப்பதும், நினைவுப்படுத்துவதும், சந்தர்ப்பங்களுக்கேற்ப மாற்றி பயன்படுத்துவதும் உண்டு. அமித்ஷாவின் வாழ்த்தால் ஓணத்தில் நீ போ மோனே ஷாஜி என ஹேஷ்டேக் போட்டு ட்ரோல் செய்யவும் பயன்பட்டிருக்கிறது.