சூர்யாவுக்கு பிரம்மாண்ட வரவேற்பு கொடுத்த மலையாள ரசிகர்கள் - படங்கள்

எதற்கும் துணிந்தவன் படத்தை விளம்பரப்படுத்த வந்த சூர்யாவுக்கு மலையாள ரசிகர்கள் மிகப் பிரமாதமான வரவேற்பு அளித்துள்ளனர். அந்த புகைப்படங்களும், வீடியோக்களும் இணையத்தில் வைரலாகி வருகின்றன.

தமிழ் நடிகர்களில் விஜய்க்கு அடுத்தபடி சூர்யாவுக்கு கேரளாவில் அதிக எண்ணிக்கையில் ரசிகர்கள் உள்ளனர். அவரது படங்களை முதல் நாள் முதல் காட்சியை பார்ப்பதற்கு பெரும் கூட்டம் இருக்கிறது.

நாளை சூர்யாவின் எதற்கும் துணிந்தவன் திரைப்படம் வெளியாகிறது. தமிழகத்தில் வெளியாகும் அதேநாள் கேரளாவிலும் படத்தை வெளியிடுகின்றனர்.

இதற்கான ப்ரோமோஷன் நிகழ்ச்சிக்காக சூர்யா கேரளாவிலுள்ள கொச்சி சென்றிருந்தார்.

சூர்யா வருவதை அறிந்த ரசிகர்கள் பெரும் திரளாக கூடினர். கொல்லம், கோட்டயம் போன்ற பல்வேறு இடங்களில் இருந்து சூர்யா ரசிகர்கள் வாகனங்களிலும் வந்திருந்தனர்.

இதன் காரணமாக சூர்யா வந்த போது மிகப் பெரிய கூட்டம் கூடியது. மலையாளத்தின் முன்னணி நடிகர்கள் மம்முட்டி, மோகன்லால், பகத் பாசில், பிருதிவிராஜ் போன்றவர்களுக்கே இந்த அளவு கூட்டம் கூடுவது இல்லை.

இதற்கு முன்னால் விஜய் தனது படத்தின் புரமோஷன் நிகழ்ச்சிக்கு வந்தபோது இதே போன்று பெரும் கூட்டம் கூடியது. இப்போது சூர்யாவுக்கு கூடியிருக்கிறார்கள்.

நேரடியாக ஓடிடியில் வெளியான சூர்யாவின் சூரரைப் போற்று திரைப்படம் சென்ற வருட இறுதியில் கேரளாவில் உள்ள சில திரையரங்குகளில் திரையிடப்பட்டது. அந்த படத்தையும் அங்குள்ள சூர்யா ரசிகர்கள் ஆர்வத்துடன் கண்டு ரசித்தனர்.

எதற்கும் துணிந்தவன் திரைப்படத்தை கேரளாவில் அதிக எண்ணிக்கையிலான திரையரங்குகளில் வெளியிட திட்டமிட்டிருந்தனர்.

ஆனால் சென்ற வாரம் வெளியான மம்முட்டியின் பீஷ்மபர்வம் திரைப்படம் அரங்கு நிறைந்த காட்சிகளாக ஓடிக் கொண்டிருப்பதாலும், நாளை மறுநாள் ராதேஷ்யாம் திரைப்படம் வெளியாகும் என்பதாலும் எதிர்பார்த்த அளவு திரையரங்குகள் எதற்கும் துணிந்தவனுக்கு கிடைக்கவில்லை.

எதற்கும் துணிந்தவன் லாபம் தரும் அளவுக்கு வசூலிக்கும் என்பதில் கேரள திரையரங்குகளும், விநியோகஸ்தர்களும் நம்பிக்கையுடன் உள்ளனர்.