19 மாசம் ஆச்சா? கோல்டன் குளோப் விருது வென்ற 'ஆர்ஆர்ஆர்' பட நாட்டுக்கூத்து பாடல் - உருவானது எப்படி தெரியுமா ?

ராஜமௌலியின் இயக்கிய ஆர்ஆர்ஆர் படத்தின்  நாட்டுக்கூத்து பாடலுக்கு இசையமைத்த எம்.எம்.கீரவாணிக்கு சிறந்த ஒரிஜினல் பாடல் பிரிவில் கோல்டன் குளோப் விருது வழங்கப்பட்டது. ஏ.ஆர்.ரஹ்மானுக்கு பிறகு கோல்டன் குளோப் விருதினை பெரும் இந்தியர் என்ற பெருமை எம்.எம்.கீரவாணிக்கு கிடைத்திருக்கிறது. இது நம் நாட்டுக்கே பெருமை என நாடு முழுவதும் உள்ள பிரபலங்கள் பலரும் ஆர்ஆர்ஆர் படக்குழுவினருக்கு வாழ்த்து தெரிவித்துவருகின்றனர்.

எம்.எம்.கீரவாணி தமிழில் மரகதமணி என்ற பெயரில் அழகன், வானமே எல்லை, ஸ்டூடன்ட் நம்பர் 1 என பல படங்களுக்கு இசையமைத்திருந்தார். தமிழில் இளையராஜா, ஏ.ஆர்.ரஹ்மான், கமல்ஹாசன், ரஜினிகாந்த் என பிரபலங்கள் அவருக்கு வாழ்த்துதெரிவித்து வருகின்றனர்.

இந்தப் பாடல் உருவான விதம் குறித்து சமீபத்தில் ஒரு பேட்டியில் ரெண்டு சிறந்த நடன கலைஞர்கள் தங்களது திறமை முழுவதைும் காட்டக்கூடிய வகையில் இந்தப் பாடல் இருக்க வேண்டும் என ராஜமௌலி தன்னிடம் தெரிவித்ததாக கீரவாணி குறிப்பிட்டிருந்தார்.

இந்தப் பாடலை தெலுங்கில் சந்திரபோஸும், தமிழில் மதன் கார்க்கியும் எழுதியிருந்தனர். படத்தின் கதை  1920 காலகட்டத்தில் நடப்பதால் பாடல்வரிகளும் அந்தக் காலத்துக்கு ஏற்ற வகையில் இருக்க வேண்டும் என பாடலாசிரியர்களிடம்  தான் தெரிவித்ததாக கீரவாணி குறிப்பிட்டுள்ளார்.

கடந்த  2020 ஜனவரி  17 ஆம் தேதி இந்தப் பாடலை எம்.எம்.கீரவாணியும், பாடலாசிரியர் சந்திரபோஸும் உருவாக்கத் துவங்கியிருக்கிறார்கள். கொஞ்சம் கொஞ்சமாக மெரூகேறி முழு பாடலும் தயாராக கிட்டத்தட்ட 19 மாதங்களாகியிருக்கிறது.

கதையின் படி ஜுனியர் என்டிஆர் கதாப்பாத்திரம் தெலங்கானாவையும் ராம் சரண் கதாப்பாத்திரம் ஆந்திராவையும் சேர்ந்தவர்கள் என்பதால் இரண்டு பகுதிகளின் வட்டார வழக்கும் பாடலில் பயன்படுத்தப்பட்டிருக்கின்றன. பாடலில் அப்போதைய சமூக - பொருளாதார ஏற்றத் தாழ்வுகளையும் பிரதிபலிக்கும் விதமாக பாடல் எழுதப்பட்டுள்ளது.

இந்தப் பாடலுக்காக நடன இயக்குநர் பிரேம் ரக்ஷித் 90க்கும் மேற்பட்ட நடன அசைவுகளை உருவாக்கியிருக்கிறார். ஜுனியர் என்டிஆரும் ராம் சரணும் கைகோர்த்து ஆடும் நடனத்தை படமாக்க 18 டேக்குகள் ஆகியிருக்கிறது. இந்தப் பாடல் உக்ரைன் நாட்டின் அதிபர் மாளிகைக்கு எதிரே படமாக்கப்பட்டிருக்கிறது.