நடிகை சரோஜா எப்படி திரைத்துறைக்கு வந்தார் தெரியுமா..?

ஐம்பது மற்றும் அறுபதுகளில் தமிழ், மலையாளம், தெலுங்கு, கன்னடம் உள்ளிட்ட தென்னிந்திய திரைப்பட ரசிகர்களின் மனதில் நர்த்தனம் ஆடியவர் ஈ.வி.சரோஜா. அழகுடன் நடிப்பும், நாட்டியமும் அறிந்த நடிகைகள் சொற்பமாகவே இருந்துள்ளனர். அவர்களில் ஈ.வி.சரோஜாவும் ஒருவர்.

இவரது சொந்த ஊர் தஞ்சாவூர் அருகில் உள்ள எண்கண். ஏழு வயதில் அப்பா வேணுபிள்ளை இறந்துவிட, அம்மா ஜானகியின் பராமரிப்பில் வளர்ந்தார். சின்ன வயதிலேயே நடனக் கலைஞர் வழுவூர் ராமையா பிள்ளையிடம் நடனம் கற்றார். சென்னையில் அவரது நாட்டிய அரங்கேற்றம் நடந்தது.

அந்த நேரத்தில், சிவாஜி கணேசன் நாயகனாக நடித்து வந்த என் தங்கை நாடகத்தை திரைப்படமாக எடுக்க அசோகா பிக்சர்ஸ் திட்டமிட்டு எம்ஜிஆரை ஒப்பந்தம் செய்திருந்தனர். எம்ஜிஆரின் கண் தெரியாத தங்கையாக நடிக்க ஆள் தேடிக் கொண்டிருந்தவர்கள், சரோஜாவின் திறமையால் கவரப்பட்டு மீனா என்ற அந்த தங்கை கதாபாத்திரத்தில் அவரை நடிக்க வைத்தனர்.

தனது உணர்ச்சிகரமான நடிப்பால் முதல் படத்திலேயே ரசிகர்களை சரோஜா கவர்ந்தார். அதன் பின், குலேபகாவலி, பெண்ணரசி, மதுரை வீரன், புதுமைப்பித்தன், கற்புக்கரசி, எங்கள் வீட்டு மகாலட்சுமி... என தொடர்ச்சியாக படங்களில் நடித்தார்.

நாயகியாக மட்டுமின்றி சந்திரபாபு, தங்கவேலு போன்ற நகைச்சுவை நடிகர்களுடன் இணைந்தும் நடித்தார். குணச்சித்திர வேடங்களிலும் தனது திறமையை நிரூபித்தார். எம்ஜிஆர், சிவாஜி, ஜெமினி கணேசன் உள்ளிட்ட முன்னணி நட்சத்திரங்களுடன் நடித்தவர் தெலுங்கில் சில படங்களுக்கு நடனம் அமைக்கவும் செய்தார்.

ஆட வந்த தெய்வம், மணப்பந்தல், ஒன்றுபட்டால் உண்டு வாழ்வு, படிக்காத மேதை, கைதி கண்ணாயிரம், இரத்தினபுரி இளவரசி, பாக்யலட்சுமி, வீரத்திருமகன் போன்றவை சரோஜாவின் நடிப்புத் திறமைக்கு சான்று சொல்லும் படங்கள்.

தனது சகோதரர் ஈ.வி.ராஜனுடன் இணைந்து ஈவிஆர் பிக்சர்ஸ் என்ற தயாரிப்பு நிறுவனத்தைத் தொடங்கி கொடுத்து வைத்தவள், தங்க சுரங்கம் போன்ற படங்களை தயாரித்தார்.

கொடுத்து வைத்தவள் படத்தில் எம்ஜிஆருடன் சரோஜா நடித்தார். 1963 இல் வெளிவந்த அந்தப் படத்துடன் அவர் நடிப்பதை நிறுத்திக் கொண்டார். 1969 இல் வெளியான தங்க சுரங்கம் படத்தில் சிவாஜி நடித்தார்.

சரோஜா நடித்த குலேபகாவலி, புதுமைப்பித்தன், ரத்தினபுரி இளவரசி, மணப்பந்தல் போன்ற படங்களை இயக்கிய டி.ஆர்.ராமண்ணாவுடன் ஏற்பட்ட நட்பு காதலாகி இருவரும் 1963 இல் திருமணம் செய்து கொண்டனர்.

ராமண்ணா முதல் மனைவி இறந்த பிறகு தனது கூண்டுக்கிளி படத்தில் நடித்த பி.எஸ்.சரோஜாவை திருமணம் செய்து கொண்டார். அவர் இருக்கும் போதே ஈ.வி.சரோஜாவையும் மணந்து கொண்டார். அவர்களுக்கு ஒரு மகள் உள்ளார்.

சுமார் பத்து வருடங்கள், நான்கு மொழிகளில், 70 க்கும் மேற்பட்ட படங்களில் நடித்து, டான்சிங் ஸ்டார் என்ற பட்டத்தையும் ரசிகர்களிடமிருந்து பெற்றுக் கொண்டார் சரோஜா. கருணாநிதி ஆட்சிக்காலத்தில் அவருக்கு கலைமாமணி விருது வழங்கப்பட்டது. 2006 இல் தனது 71 வது வயதில் மாரடைப்பால் சரோஜா மரணமடைந்தார்.