மலிவாக என்னால் நடனமாட முடியாது... பிரபல நடிகர்களை சீண்டிய கங்கனா ரனாவத்?

திருமணத்தில் நடனமாடும் நடிகர்களை பாலிவுட் நடிகை கங்கனா ரனாவத் விமர்சித்துள்ளார்.

தாம்தூம் படத்தின் மூலம் தமிழில் அறிமுகமானவர் நடிகை கங்கனா ரனாவத். ஜெயலலிதாவின் வாழ்க்கை வரலாற்றுப் படமான தலைவியில் ஜெயலலிதாவாக நடித்திருந்தார்.

சமீபத்தில் தனது தாயார் விவசாய வேலை செய்யும் படத்தைப் பகிர்ந்திருந்தார் கங்கனா.

கங்கனா இவ்வளவு பெரிய நடிகையாக இருந்தும், அவரது அம்மா மிகவும் எளிமையாக விவசாய நிலத்தில் வேலைப் பார்க்கிறார் என பாராட்டியிருந்தனர் ரசிகர்கள்.

அதற்கு, ”தயவு செய்து கவனிக்கவும், என் அம்மா என்னால் பணக்காரர் ஆகவில்லை. நான் அரசியல்வாதிகள், அதிகாரிகள் மற்றும் தொழிலதிபர்கள் உள்ள குடும்பத்தில் இருந்து வந்தவள்.

என் அம்மா 25 வருடங்களுக்கும் மேலாக ஆசிரியையாக இருக்கிறார்.

சினிமா மாஃபியா குறித்து இந்தளவு நான் பேசுவதற்குக் காரணம் அவர் தான். அதனால் தான் அவர்களைப் போல என்னால் திருமணங்களில் மலிவாக நடனமாட முடியவில்லை” என்றார்.

சமீபத்தில் டெல்லியில் நடைப்பெற்ற திருமணம் ஒன்றில் பிரபல பாலிவுட் நடிகர்கள் அக்‌ஷய் குமார், சல்மான் கான் நடனமாடியதை தான் கங்கனா மறைமுகமாக சாடியிருப்பதாக கூறுகின்றனர் நெட்டிசன்கள்.