கமலின் இயக்கத்தில் வெளியான சாச்சி 420 படமும் ஜானி வாக்கரும்!

கமல்ஹாசனின் பல்துறை திறமையை அறிந்தவர்கள், குறிப்பாக திரைக்கதை அறிவை வியந்தவர்கள், அவர் படம் இயக்கினால் எப்படி இருக்கும் என்று நிச்சயம் யோசித்திருப்பார்கள். அவரது ரசிகர்களுக்கும்கூட, கமல் ஒரு படத்தை இயக்கினால் எப்படி இருக்கும் என்ற கனவு இருந்திருக்கும்.

இவர்களுக்கு இருக்கும் போது கமலுக்கு மட்டும் இருந்திருக்காதா என்ன. இதுவரை தான் பணியாற்றியதிலேயே சிறந்த படமாக அது இருக்க வேண்டும் என்றும் நினைத்திருப்பார். ஆனால், நினைத்தது நடக்காமல் போவதுதானே வாழ்க்கை.

1996 இல் கே.எஸ்.ரவிக்குமார் இயக்கத்தில் கமல் பெண் வேடமிட்டு நடித்த அவ்வை சண்முகி வெளியாகி வெள்ளிவிழா கண்டது. இந்தப் படத்தை இந்தியில் தயாரிக்க கமல் முடிவு செய்தார். தமிழில் மீனா நடித்த வேடத்தில் தபு ஒப்பந்தம் செய்யப்பட்டார்.

ஹீரா நடித்த சின்ன வேடத்தில் அஸ்வினி பவேயும், ஜெமினி கணேசன் வேடத்தில் அம்ரிஷ் பூரியும், டெல்லி கணேசின் வேடத்தில் ஓம்பூரியும், மணிவண்ணன் வேடத்தில் பரேஷ் ராவலும் நடிப்பதென முடிவானது. முஸ்லீம் சமையல்காரன் வேடத்தை நாசரே இந்தியிலும் செய்தார். படத்தை இயக்கும் பொறுப்பு விளம்பரப்பட இயக்குனர் சாந்தனு சியோரேயிடம் ஒப்படைக்கப்பட்டது.

முதல் நாளிலேயே சாந்தனுவின் இயக்கத்தில் கமலுக்கு உடன்பாடு இல்லை. ஐந்து நாள்கள் படப்பிடிப்பு முடிந்து, எடுத்தவரை போட்டுப் பார்த்ததில் கமலுக்கு திருப்தியில்லை. புதிதாக ஒரு இயக்குனரை கண்டுபிடித்து, கதை, திரைக்கதையை விளக்கி, படப்பிடிப்பை தொடர நேரமும் இல்லை.

முன்னணி நட்சத்திரங்கள் கொடுத்த கால்ஷீட் வீணாகிவிடும். இதனால், படத்தை தாமே இயக்குவது என்று முடிவு செய்து, திடீரென இயக்குனர் அவதாரம் எடுத்தார் கமல். சாச்சி 420 இயக்குனராக அவரது முதல் படமானது.

இந்தப் படத்திற்கு முதலில் சிக்னி சாச்சி என்று பெயர் வைக்கப்பட்டிருந்தது. இயக்குனர் மாறியதும் ஸ்த்ரீ 420 என பெயர் மாறியது. அத்துடன் ஹீராவின் வேடத்தில் நடிக்க ஒப்பந்தம் செய்த அஸ்வினியை மாற்றி ஆயிஷா ஜுல்காவை ஒப்பந்தம் செய்தார் கமல். படம் 1997 டிசம்பர் 19 வெளியான போது படத்தின் பெயர் சாச்சி 420 என மாறியிருந்தது.

சாச்சி 420 வடஇந்தியாவில் 100 நாள்கள் ஓடி வெற்றிப் படமானது. பெங்களூருவில்  112 தினங்கள் ஓடியது. அதற்கு முந்தைய வருடம் சாச்சி 420 இன் ஒரிஜினலான அவ்வை சண்முகி இங்கு 100 நாள்கள் ஓடியிருந்தது முக்கியமானது.

சாச்சி 420 இல் குறிப்பிட வேண்டிய மற்றொரு நடிகர் ஜானி வாக்கர். ஸ்காட்ச் விஸ்கியின் பெயரைக் கொண்ட இவரை காரணமாகத்தான் கமல் தேர்வு செய்தார். தமிழில் நாகேஷ் நடித்த ஜோசப் என்ற குடிகார மேக்கப் மேன் கதாபாத்திரத்தில் ஜானி வாக்கர் நடித்தார்.

இவரது நிஜப்பெயர் பக்ருதீன் ஜமாலுதீன் காஸி. ஐம்பதுகளிலிருந்து சினிமாவில் நகைச்சுவை வேடங்களில் நடித்து வந்த இவர் 300 க்கும் மேற்பட்ட படங்களில் தோன்றியுள்ளார். அதிகமும் குடிகார வேடம். அதனால், நிஜப்பெயர் மறைந்து, மேடைப்பெயரான ஜானி வாக்கர் நிலைத்தது. படத்தில் குடிகாரராக நடித்தாலும் ஜானி வாக்கர் நிஜத்தில் டீ கூட குடிக்காத டீடோட்லராம்.

1997 இல் வெளியான சாச்சி 420 படம்தான் இவரது கடைசிப்படம். அதன் பிறகு 2003 இல் நோய்வாய்ப்பட்டு இறக்கும்வரை அவர் வேறு எந்தப் படத்திலும் நடிக்கவில்லை. ஜானி வாக்கர் புனைப்பெயருக்கு ஏற்றபடி அவரது கடைப்படத்தில் குடிகார வேடம் அமைந்தது ஆச்சரியம்தான்.

1997 டிசம்பர் 19 வெளியான சாச்சி 420 நேற்று 25 வருட நிறைவை கொண்டாடியது.