சில நேரங்களில் சில மனிதர்கள் படக்குழுவை பாராட்டிய கமல் - படங்கள்!

சென்ற மாதம் 28-ம் தேதி வெளியான சில நேரங்களில் சில மனிதர்கள் படத்தைப் பார்த்த கமல்ஹாசன் படக் குழுவினரை அழைத்து தனது பாராட்டுக்களை தெரிவித்தார்.

இந்த வருடம் விமர்சனரீதியாக பாராட்டைப் பெற்ற முதல் திரைப்படம் சில நேரங்களில் சில மனிதர்கள். விஷால் வெங்கட் இயக்கியிருந்த இந்தப் படத்தின் திரைக்கதையை மணிகண்டன் உடன் இணைந்து விஷால் வெங்கட் எழுதியிருந்தார்.

நான்கு வெவ்வேறு மனிதர்களின் வாழ்க்கை ஒரு விபத்துக்குப் பிறகு எப்படி மாறுகிறது என்பதை அடிப்படையாக வைத்து இந்தத் திரைப்படம் எடுக்கப்பட்டிருந்தது.

சில நேரங்களில் சில மனிதர்கள் ஜெயகாந்தன் எழுதிய நாவல் ஒன்றின் பெயர். அதனால் இந்தப் பெயரை பயன்படுத்த வேண்டாம் என ஜெயகாந்தனின் குடும்பத்தினர் கேட்டிருந்தது குறிப்பிடத்தக்கது. ஆனால் இந்தப் பெயர்தான் படத்திற்கு பொருத்தமாக இருக்கும் என ஜெயகாந்தன் குடும்பத்தினரின் கோரிக்கையை நிராகரித்து அதே பெயருடன் படம் வெளியானது.

இந்தப் படத்தின் பிரமோஷனில் கமல்ஹாசனும் பங்களிப்பு செய்திருந்தார். அதற்கு முக்கிய காரணம் அவருடைய நண்பரான நாசர். நாசரும் அவரது மகன் அபி ஹாசனும் இந்தப் படத்தில் முக்கியமான வேடத்தில் நடித்திருந்தனர்.

அவர்களுடன் அசோக் செல்வன், பானுப்பிரியா, அனுபமா குமார், அஞ்சு குரியன், மணிகண்டன், ரித்திகா பன்னீர்செல்வம், கேஎஸ் ரவிக்குமார், பிரவீன் ராஜா ஆகியோரும் நடித்திருந்தனர்.

அனைத்துத் தரப்பினரின் பாராட்டையும் பெற்ற இப்படம் கமலுக்கு சிறப்பு காட்சியாக திரையிடப்பட்டது. படத்தைப் பார்த்த கமல்ஹாசன் படக்குழுவினரை தனது அலுவலகத்திற்கு வரவழைத்து அவர்களுக்கு தன்னுடைய பாராட்டுகளையும் வாழ்த்துகளையும் தெரிவித்தார்.

சில நேரங்களில் சில மனிதர்கள் திரையரங்குகளில் வெற்றிகரமாக ஓடிக்கொண்டிருக்கிறது.