கமலின் கிளாஸ் மற்றும் மாஸ் பொங்கல் படங்கள்

கமல் தனி நாயகனாக நடித்தப் பிறகு பத்துக்கும் மேற்பட்ட படங்கள் பொங்கலை முன்னிட்டு வெளியாகின. படங்களுடன் ஒப்பிடுகையில் கமலின் பொங்கல் வெளியீட்டுப் படங்களின் வெற்றி சதவீதம் குறைவு. அதேநேரம் பல மறக்க முடியாத கிளாசிக் திரைப்படங்களை கமல் தந்திருக்கிறார்.

1. அக்னி புஷ்பம் (09-01-1976 - மலையாளம்): கமல் முதல்முதலில் கன்னியாகுமரி என்ற மலையாளப் படத்தில்தான் தனி நாயகனாக நடித்தார். அதன் பிறகே தமிழில் நாயகனாக நடிக்க வாய்ப்பு கிடைத்தது. மலையாளத்தில் அவர் நாயகனாக நடித்தப் படங்களில் ஒன்று அக்னி புஷ்பம். ஜெஸி இயக்கத்தில் ஜெயபாரதி நாயகியாக நடித்த இந்தப் படம் அப்படியே மூன்றாம் பிறை படத்தின் கதையை கொண்டது. இந்தப் படத்தை தழுவிதான் மூன்றாம் பிறை எடுக்கப்பட்டதாக ஒரு செய்தி உள்ளது.

2. உயர்ந்தவர்கள் (14-01-1997): இந்தி கோஷிஷ் படத்தை தழுவி எடுக்கப்பட்ட இந்தப் படத்தை டி.என்.பாலு இயக்க கமல், சுஜாதா நடித்தனர். இதில் இவர்கள் இருவரும் வாய் பேச முடியாத, காது கேட்காத மாற்றுத் திறனாளிகளாக நடித்தனர். டூயட், சண்டைக்காட்சிகள் இல்லாமல் வெளியான இப்படம் பத்திரிகைகளின் பாராட்டைப் பெற்றது.

3. நீயா? (13-01-1979): இந்தி நாகின் படத்தின் தழுவலான இப்படத்தை துரை இயக்க, ஸ்ரீப்ரியா நாயகியாக நடித்தார். படம் 100 நாள்களை கடந்து ஓடி வெற்றி பெற்றது.

4. சிவப்புக்கல் மூக்குத்தி (12-01-1979): நீயா? படத்துடன் சிவப்புக்கல் மூக்குத்தி படமும் வெளியானது. இதில் கமலுடன் விஜயகுமார், ஸ்ரீதேவி நடித்தனர். படம் சுமாராகவே போனது. பாடலாசிரியர் வலம்புரி சோமநாதன் படத்தை இயக்கியிருந்தார்.

5. மீண்டும் கோகிலா (14-01-1981): ஜி.என்.ரங்கராஜன் இயக்கத்தில் கமல், ஸ்ரீதேவி, தீபா நடித்த மீண்டும் கோகிலா பொங்கலுக்கு வெளியாகி 175 தினங்கள் ஓடி வெள்ளி விழா கண்டது.

6. ஒரு கைதியின் டைரி (14-01-1985): பாக்யராஜின் கதை, திரைக்கதையில், பாரதிராஜா இயக்கத்தில் கமல் இரு வேடங்களில் நடித்த இப்படம் 175 நாள்கள் ஓடி வெள்ளிவிழா கண்டது.

7. காதல் பரிசு (14-01-1987): சத்யா மூவிஸ் தயாரிப்பில் கமல், ராதா, அம்பிகா நடித்த காதல் பரிசு திரைப்படம் பொங்கலுக்கு வெளியாகி 100 நாள்களை கடந்து ஓடி வெற்றி பெற்றது.

8. மகாநதி (14-01-1994): சந்தான பாரதி இயக்கத்தில் கமல், ராகி.ரங்கராஜன் திரைக்கதை, வசனம் எழுதிய மகாநதி எதிர்பார்த்த கமர்ஷியல் வெற்றியை பெறவில்லை. எனினும் விமர்சனரீதியாக இப்போதும் பாராட்டுக்களை பெற்று வருகிறது.

9. சதிலீலாவதி (15-01-1995): ரஜினியின் பாட்ஷா படத்துடன் வெளியான சதிலீலாவதியில் கோவை சரளா கமலின் ஜோடியாக நடித்திருந்தார். படம் 100 நாள்களை தாண்டி ஓடி வெற்றி பெற்றது. தெலுங்கிலும் படம் 100 நாள்கள் ஓடியது. ஷி டெவில் ஆங்கிலப்படத்தின் இன்ஸ்பிரேஷனில் இந்தப் படத்தை பாலுமகேந்திரா எடுத்தார்.

10. பம்மல் கே.சம்பந்தம் (14-01-2002): கமல் தயாரித்து நடித்த நகைச்சுவைத் திரைப்படமான இது 80 சென்டர்களில் 100 நாள்கள் ஓடியது. கிரேஸி மோகன் இதன் கதை, வசனத்தை எழுதியிருந்தார். மௌலி படத்தை இயக்கினார்.

11. அன்பே சிவம் (14-01-2003): சுந்தர் சி. இயக்கத்தில் கமல், மாதவன் நடித்த இப்படம் கமர்ஷியலாக வெற்றி பெறாததால் கமல் தனது சம்பளத்தில் கணிசமான பகுதியை தயாரிப்பாளருக்கு திரும்ப அளித்தார். அன்பே சிவம் தமிழ் சினிமாவின் கௌரவங்களில் ஒன்றாக இப்போதும் திகழ்கிறது.

12. விருமாண்டி (14-01-2004): சண்டியர் என்று பெயர் வைத்ததால் எழுந்த எதிர்ப்பால் ஜல்லிக்கட்டு காட்சிகள் உள்பட பெரும்பாலான காட்சிகளை சென்னை கேம்பகோலா மைதானத்தில் அரங்கு அமைத்து எடுத்தனர். படம் 456 திரையரங்குகளில் உலக அளவில் வெளியானது. முதல்முறை 400 திரையரங்குகளுக்கு மேல் வெளியான தமிழ்ப் படம் விருமாண்டி. வார இறுதியில் 6 கோடி வசூலித்து சாதனைப் படைத்த படம் 100 நாள்களை கடந்து ஓடியது.