”100 முறை அந்த படம் பார்த்தேன்... விஜய் சேதுபதிக்கு போன் பண்ணி பேசினேன்...” - ஜான்வி கபூர் ஓபன் டாக்!

கடந்த 2018 ஆம் ஆண்டு வெளியான, தடாக் படத்தின் மூலம், பாலிவுட் திரையுலகில் ஹீரோயினாக அறிமுகமானவர் ஜான்வி கபூர். காதலை மையமாக வைத்து உருவாக்கப்பட்ட இந்த திரைப்படத்திற்கு, ரசிகர்கள் மத்தியில் நல்ல வரவேற்பு கிடைத்தது.

தன்னுடைய அம்மா இறந்ததால் இரண்டு ஆண்டுகள் எந்த படத்திலும் நடிக்காமல் இருந்தார் ஜான்வி கபூர். சமீப காலமாக ஜான்வி கபூர் பிற மொழிகளில் ஹிட்டான படங்களின், ஹிந்தி ரிமேக்கில் நடிக்க ஆர்வம் காட்டி வருகிறார்.

அந்த வகையில், அவர்மலையாளத்தில் வெளியாகி வெற்றி பெற்ற 'ஹெலன்' படத்தின், ஹிந்தி ரீமேக்கிலும் ஜான்வி கபூர் நடித்தார் இப்படம் 'மிலி' என்ற பெயரில் சமீபத்தில் வெளியாகி நல்ல வரவேற்பை பெற்றது குறிப்பிடத்தக்கது.

நடிப்பில் எந்த அளவிற்கு கவனம் செலுத்தி வருகிறாரோ, அதே போல் போட்டோஷூட் எடுத்து கொள்வதிலும் மற்றும் சமூக வலைதளங்களிலும் ஆக்டிவாக இருக்கும் ஜான்வி கபூர், தற்போது தங்க நிற உடையில் வெளியிட்டுள்ள லேட்டஸ்ட் புகைப்படங்கள் ரசிகர்கள் மத்தியில் வைரலாக பார்க்கப்பட்டு வருகிறது.

ஜான்வி கபூர் சமீபத்தில் ஒரு நேர்காணலில், தென்னிந்திய திரைப்படத்தில் நடிக்க மிகவும் ஆர்வமாக இருப்பதாக கூறியுள்ளார். அந்த வீடியோ வைரலாகி வருகிறது. அந்த வீடியோவில் அவர் விஜய் சேதுபதி மற்றும் ஜூனியர் என்.டி.ஆர் ஆகியோருடன் இணைந்து பணியாற்ற விரும்புவதாக ஜான்வி தெரிவித்ததோடு, நானும் ரவுடி தான் படத்தைப் பார்த்துவிட்டு விஜய் சேதுபதிக்கு போன் செய்தேன் எனக்கூறியுள்ளார்.

கலாட்டா பிளஸ் நிறுவனத்திற்கு அளித்த பேட்டியில் ஜான்வி, “விஜய் சேதுபதி சாரை எனக்கு மிகவும் பிடிக்கும். நானும் ரவுடி தான் படத்தை 100வது முறையாகப் பார்த்த பிறகு, யாரோ ஒருவர் விஜய் சேதுபதி நம்பரை வைத்திருப்பதை தெரிந்து அதனைப் பெற்று, அவருக்கு போன் செய்தேன்.

‘சார் நான் உங்களின் பெரிய ரசிகை, நீங்கள் எப்போதாவது ஏதாவது ஒரு படத்தில் நான் நடிக்க வேண்டும் என்று நினைத்தால், அதற்கான ஆடிஷனில் நான் கலந்துக் கொள்வேன், நான் உங்களுடன் நடிக்க விரும்புகிறேன்’ என்று கூறினேன்.

விஜய்சேதுபதி அதற்கு என்ன சொன்னார் என்பது குறித்து ஜான்வியிடம் கேட்டபோது, ​​“அவர் ‘ஐயோ, ஐயோ’ என்று சொல்லிக்கொண்டே இருந்தார். அவர் மறுத்தாரா அல்லது வெட்கப்பட்டாரா என்று எனக்குத் தெரியவில்லை. நான் ஆர்வமாக இருந்ததால் அவர் ஆச்சரியப்பட்டார், அவர் அதிர்ச்சியடைந்தார் என்று நினைக்கிறேன்,” என கூறியுள்ளார் .இந்த வீடியோ வைரலாகி வருகிறது.