ரஜினி, கமல் அடுத்தடுத்து கொடுத்த இன்டஸ்ட்ரி ஹிட்ஸ்!

ரஜினி, கமல் அடுத்தடுத்து கொடுத்த இன்டஸ்ட்ரி ஹிட்ஸ் ஒரு திரைப்படம் அந்த மொழியில் அதுவரை வெளிவந்த அனைத்துப் படங்களின் வசூலை முறியடித்தால் அது இன்டஸ்ட்ரி ஹிட் எனப்படும். சிவாஜி, எம்ஜிஆர், கமல், ரஜினி ஆகியோர் அதிக இன்டஸ்ட்ரி ஹிட் கொடுத்த நடிகர்கள்.

1995 இல் வெளியான ரஜினியின் பாட்ஷா திரைப்படம் அனைத்து சென்டர்களிலும் அமோக வரவேற்புடன் ஓடியது. மாணிக்கம் என்ற சாதாரண ஆட்டோ டிரைவர், பாட்ஷா என்கிற முன்னாள் டான் என்பதை ஒரு மலர் மலர்வதைப் போன்று திரைக்கதையில் வெளிப்படுத்தியிருந்தார்கள் பாலகுமாரனும், இயக்குநர் சுரேஷ் கிருஷ்ணாவும். ரஜினி நடித்த ஹம் இந்தித் திரைப்படத்தின் ஒரு காட்சியை விரித்து எழுதப்பட்டதே பாட்ஷா கதை.

பாட்ஷாவில் தேவாவின் பின்னணி இசை மிகப்பெரிய பங்களிப்பைச் செய்தது. பாட்ஷா... பாட்ஷா... என்ற பின்னணி ஒலியுடன் ரஜினி நடந்துவரும் சத்தம் திரையரங்கில் ரசிகர்களை மயிர்க்கூச்செரிய வைத்தது.

அதேபோல் ஆட்டோக்காரன் பாடல் பட்டிதொட்டியெங்கும் ஒலித்தது. நீ நடந்தால் நடையழகு... தங்க மகன் இன்று சிங்க நடை போட்டு... என அனைத்துப் பாடல்களும் ஹிட்டாயின.

தேவா அளவுக்கு ரஜினி படத்துக்கு ஆப்டாக இசையமைத்த இசையமைப்பாளர்கள் வேறில்லை எனலாம். பாட்ஷா திரைப்படம் அதுவரை வெளிவந்த அனைத்துத் தமிழ்ப் படங்களின் வசூலையும் முறியடித்து இன்டஸ்ட்ரி ஹிட் என்ற சாதனையை படைத்தது.

இதுபோலொரு ஹிட் இனி எப்போது அமையுமோ என்று எண்ணிய நிலையில், அடுத்த வருடமே கமலின் இந்தியன் வெளியானது.

தேசபக்தியில் தோய்ந்த கதையில், லஞ்சம் என்ற சாதாரண மக்களின் தினசரி அவலத்தை சொன்னவிதத்தில் படம் அனைவரையும் கவர்ந்தது. தமிழகம் மட்டுமின்றி கேரளா, ஆந்திரா என அனைத்து இடங்களிலும் படம் பம்பர்ஹிட்டானது.

ஹிந்துஸ்தானி என இந்தியில் வெளியாகி அங்கும் சாதனை படைத்தது. இந்தப் படம் வெளியான போது, இந்தியில் அதிகம் வசூலித்த தமிழ் டப்பிங் திரைப்படமாக இந்தியன் இருந்தது. பாட்ஷா போன்ற ஹிட் இனி எப்போது அமையும் என்று நினைத்தவேளை, அடுத்த வருடமே பாட்ஷாவை தாண்டி வசூலித்து புதிய இன்டஸ்ட்ரி ஹிட் சாதனையை இந்தியன் படைத்தது.

கோவை கேஜி காம்ப்ளக்சில் பாட்ஷா திரைப்படம் 368 தினங்கள் ஓடி சுமார் 37 லட்சங்களை வசூலித்தது. அதே கேஜி காம்ப்ளக்ஸ் ராகம் திரையரங்கில் இந்தியன் 109 தினங்களில் 45.90 லட்சங்களை வசூலித்தது. இந்த ஒப்பீடு ஒரு சின்ன உதாரணம்.

இதேபோல் அனைத்து இடங்களிலும் பாட்ஷாவின் வசூலை இந்தியன் தாண்டியது.

அதன் பிறகு 1999 இல் வெளியான ரஜினியின் படைப்பா இந்தியன் வசூலை முறியடித்து புதிய இன்டஸ்ட்ரி ஹிட் சாதனையை படைத்தது.