கூடுதலாக ஒரு பொட்டலம் டிபன் கேட்ட அன்றைய சூப்பர் ஸ்டார்

மொழிவாரியாக மாநிலங்கள் பிரிக்கப்படுவதற்கு முன் மலையாளம், கன்னடம், தெலுங்குப் படங்களின் படப்பிடிப்புகளும் யில்தான் நடக்கும். சென்னையிலும், மும்பையிலும் போஸ்ட் புரொடக்ஷன் பணிகளை  மேற்கொள்வார்கள். தமிழ், தெலுங்கு, கன்னட மொழிகளில் படங்களை வெளியிடுவது அன்று சாதாரணமாக இருந்து வந்தது.

இந்தியாவில் சினிமா புகழை வைத்து தனிக்கட்சி தொடங்கி குறுகிய காலத்தில் ஆட்சியைப் பிடித்தவர் என்ற பெருமை என்டி ராமராவுக்கு உண்டு. எம்ஜிஆர் தனிக்கட்சி தொடங்குவதற்கு முன் திமுகவின் முக்கிய நபராக இருந்தார். என்டிஆருக்கு அப்படியான முன் அனுபவங்கள் இல்லை. கட்சி ஆரம்பித்த குறுகிய காலத்திலேயே அவர் ஆட்சியைப் பிடிக்க, சினிமாவில் அவர் உருவாக்கி வைத்திருந்த இமேஜ் முக்கிய காரணம்.

அப்படிப்பட்டவர், ஆரம்ப காலத்தில்  சினிமா கம்பெனியில், எனக்கு நீங்கள் தரும் டிபன் போதவில்லை, இன்னொரு பொட்டலம் வேண்டும் என்று கேட்டு வாங்கி சாப்பிட்டிருக்கிறார். அந்த சம்பவம் நடந்தது 1950 இல்.

1949 இல் வெளியான மன தேசம் திரைப்படத்தில் என்டிஆர் அறிமுகமானார். அடுத்து சவுகாரு என்ற படம். அதையடுத்து 1950 இல் பல்லிட்டூரி பில்லா என்ற படத்தில் நாயகனாக நடித்தார். 1951 இல் விஜயா புரொடக்ஷன்ஸின் பாதாள பைரவி படத்தில் பிரதான வேடத்தில் நடிக்க ஒப்பந்தம் செய்யப்பட்டார்.

அப்போது மாதச் சம்பளத்தில் நடிகர்களை ஒப்பந்தம் செய்வார்கள். அவர்கள் எத்தனை படங்களில் நடித்தாலும், நடிக்காவிட்டாலும் ஒப்பந்தப்படி மாதச் சம்பளம் தரப்படும். மாதச் சம்பள ஒப்பந்தம் இல்லையென்றால், வேலை செய்கிற நாளுக்கு மட்டுமே சம்பளம் கிடைக்கும். அதனால் அன்று அனைவரும் மாதச் சம்பள வேலையை விரும்பினர்.

பாதாள பைரவி படப்பிடிப்பு நடக்கையில், என்டிஆர் அதிகாலையே வந்து கத்திச் சண்டை, குதிரையேற்றம் என பயிற்சி மேற்கொள்வார். விஜயா புரொடக்ஷனில் அப்போது இரண்டு இட்லி, ஒரு வடை காலை டிபனாக தரப்படும். அத்துடன் ஒரு தோசை அல்லது, பொங்கல் அல்லது பூரி இவற்றில் ஏதாவது ஒன்றும் கிடைக்கும். பயிற்சி முடித்து வரும் என்டிஆரின் பசியை இந்த இரண்டு இட்லி, ஒரு வடை, ஒரு தோசை டிபனால் போக்க முடியவில்லை.

ஒருநாள் துணிந்து விஜயா புரொடக்ஷன்ஸ் நாகி ரெட்டியிடம் இதனை கூறிவிட்டார். நான் அதிகாலையிலேயே பயிற்சி செய்கிறேன். எனக்கு இந்த டிபன் போதாது. கூடுதலாக இன்னொரு பொட்டலம் வேண்டும் என கேட்டுள்ளார். நாகி ரெட்டியும் அவரது விருப்பப்படியே இன்னொரு பொட்டலம் வாங்கிக் கொள்ள அனுமதி அளித்துள்ளார்.

பாதாள பைரவி தமிழ், தெலுங்கு இரு மொழிகளில் எடுக்கப்பட்டது. தெலுங்குப் பதிப்பு 1951 மார்ச் 15 ஆம் தேதியும், தமிழ் பதிப்பு மே 17 ஆம் தேதியும் வெளியானது. இரு மொழிகளிலும் படம் மிகப்பெரிய வெற்றியை பெற்றது. தெலுங்கில் தொடர்ந்து 200 நாள்கள் ஓடிய முதல் படம் என்ற சாதனையையும் படைத்தது. என்டி ராமராவ், எஸ்வி ரங்காராவ் என்ற இரு நடிகர்களுக்கு இந்தப் படமே திருப்புமுனையாக அமைந்தது.

பாதாள பைரவியில் என்டி ராமராவ் நாயகன். ஆனாலும், அவருக்கு படயூனிட்டில் அனைவருக்கும் வழங்கப்படும் உணவுதான் வழங்கப்பட்டது. ஆனால், இன்று, முதல் படத்திலேயே சோறு ஓரிடம், பொரியல் ஓரிடம், சிக்கன் ஓரிடம் என்று ஒருவேளை உணவுக்கு என்பது ஸ்டார் ஹோட்டல்களில் இருந்து உணவு தருவிக்கிறார்கள். தயாரிப்புச் செலவு எகிறாமல் என்ன செய்யும்?