விஷால் பட நடிகையின் மீது போலீஸில் புகார் - ஐபிஎஸ் அதிகாரியுடன் என்ன பிரச்னை?

பிரபு தேவாவின் தேவி 2 படத்தின் மூலம் தமிழில் அறிமுகமானவர் டிம்பிள் ஹயாதி.

கடந்த வருடம் விஷால் நடிப்பில் வெளியான வீரமே வாகை சூடும் படத்தில் ஹீரோயினாக நடித்திருந்தார்.

தெலுங்கில் பிரபல ஹீரோக்களுக்கு ஜோடியாக நடித்துவருகிறார்.

இந்த நிலையில் டிம்பிள் ஹயாதி ஐபிஎஸ் அதிகாரியின் காரை மோதியதாக அவர் மீது ஹைதராபாத் காவல்துறை வழக்குப்பதிவு செய்துள்ளது.

இதுதொடர்பாக காவல்துறை துணை ஆணையர் ராகுல் ஹெக்டே என்பவர் தெரிவித்ததாவது, நான் வசிக்கும் அபார்ட்மென்ட்டில் என்னுடைய காரை நிறுத்திவைத்திருந்தேன். என்னுடைய காரை யாரோ மோதி சேதப்படுத்தியிருக்கிறார்கள். சிசிடிவி கேமராவை ஆய்வு செய்தபோது அதனை செய்தது டிம்பிள் மற்றும் அவரது நண்பர் என தெரியவந்தது

இதற்கு முன்னதாகவும் எனது காரை வழிமறித்தவாறு நிறுத்தி என்னுடன் பிரச்னை செய்தார் என்று குறிப்பிட்டுள்ளார்.

இதனையடுத்து ராகுலின் ஓட்டுநர் ஜூப்ளி ஹில்ஸ் காவல்நிலையத்தில் அரசு வாகனத்தை மோதியதாகவும் தன்னிடம் தவறான வார்த்தையில் பேசியதாகவும் புகார் அளித்துள்ளார். அவரது புகாரின்பேரில் டிம்பிள் ஹயாதி மீது வழக்குப்பதிவு செய்யப்படுள்ளது.

இதனையடுத்து டிம்பிள் ஹயாதி தனது ட்விட்டர் பக்கத்தில் அதிகாரத்தை பயன்படுத்துவது எந்த தவறையும் திருத்துவது ஆகாது. உண்மை வெல்லும் எனக் குறிப்பிட்டுள்ளார்.