ஊட்டியின் 100 ஆண்டுகள் பழமையான தியேட்டர் - அஜித்தின் முதல் பட ஷூட்டிங் - சுவாரசியத் தகவல்கள்

தமிழ்நாட்டிலுள்ள மாவட்டம் சுற்றுலாவுக்கு புகழ்பெற்றது. மலை சுற்றுலா என்றாலே முதலில் நினைவுக்கு வரும் இடமாக இருக்கிறது இங்குள்ள ஊட்டி, இந்த மாவட்டத்தில் 2 சினிமா தியேட்டர் மட்டும்தான் இருக்கின்றன.

அதில் மிக முக்கியமான ஒன்று பிரிட்டிஷ் ஆட்சியாளர்களால் துவங்கப்பட்ட அசெம்ப்ளி ரூம்ஸ் தியேட்டர்ஸ். கிட்டத்தட்ட 100 ஆண்டுகளுக்கும் மேலாக இந்த திரையரங்கம் இயங்கிவருகிறது. துவக்ககாலத்தில் இந்தத் தியேட்டரில் பயன்படுத்தப்பட்ட பொருட்கள் மக்களுக்காக காட்சிப்படுத்தப்பட்டுள்ளது.

இந்த நிலையில் இந்தத் தியேட்டரின் வரலாறு குறித்து அந்த தியேட்டரை நிர்வகித்துவரும் மேற்பார்வையாளர் ராதாகிருஷ்ணன் நியூஸ் 18 தமிழ்நாடு சேனலுக்கு பிரத்யேகமாக பேட்டியளித்தார்.

அப்போது பேசிய அவர், ''அசெம்ப்ளி ரூம்ஸ் கமர்ஷியல் சினிமா தியேட்டர் இல்ல. 1923 ஆம் ஆண்டு மெட்ராஸ் மாகாணத்தின் கவர்னராக இருந்த வில்லிங்டன் மற்றும் அவரது மனைவியும் இந்த அசெம்ப்ளி ரூம்ஸ் தியேட்டரை கலை நிகழ்வுகளை நடத்துவதற்காக உருவாக்கினார்கள். இதற்காக டிரஸ்ட் ஒன்றை துவங்கி அதனை ஊட்டி மக்களுக்காக வழங்கினாங்க.

தொடக்கத்தில் இங்கே மேடை நாடகங்கள் நடந்தன. பின்னர் காலப்போக்கில் இதனை திரைப்படங்களை திரையிடும் மூவி ஹாலாக மாற்றினார்கள். துவக்கத்தில் திரைப்படங்கள், குறும்படங்கள் ஆகியவை திரையிடப்பட்டன.

இங்கே அரசியல் நுழையக் கூடாதுனு முடிவு பண்ணாங்க. அரசியல் சம்மந்தமா எந்த மீட்டிங் நடத்தக்கூடாதுனு முடிவு பண்ணாங்க. அரசியல் தலைவர் இங்கே வேறு விஷயங்களுக்காக வரலாம்.

சைலன்ட் படங்களில் இருந்து டாக்கியாக மாறியபோது முழு நேர சினிமா தியேட்டராக மாறியது. பெரும்பாலும் ஆங்கிலப் படங்கள் திரையிடப்பட்டது. பின்னர் மெல்ல தமிழ் படங்கள் திரையிடப்பட்டது. 30களில் சிந்தாமணி என்ற தமிழ் திரைப்படம் இங்கே திரையிடப்பட்டதற்கான ஆவணங்கள் இருக்கின்றன.

இங்கே ஜெர்மன் தயாரிப்பான அனலாக் புரொஜெக்டர் மூலம் 1954 முதல் 2015 வரை படங்கள் திரையிடப்பட்டது. உலக அளவில் ஃபிலிம் ரீல் தயாரிப்புகள் நிறுத்தப்பட்ட பிறகு எல்லோரும் டிஜிட்டலுக்கு மாறிட்டாங்க. அதனால் இந்த புரொஜக்டர் இங்கு பயன்படுத்தப்படவில்லை. இப்போ இங்கே 2டி டிஜிட்டல் புரொஜக்சன் சிஸ்டம் பயன்படுத்தப்படுகிறது.

ஹிந்தி நடிகர் திலீப் குமார் படப்பிடிப்பிற்காக ஊட்டி வரும்போது படப்பிடிப்பு நாட்களில் இங்கே வந்து சினிமா பாரப்பார். நடிகர் அஜித்தின் முதல் படமான அமராவதி படத்தின் படப்பிடிப்பு இங்க நடந்திருக்கு. முன்னாள் முதல்வர் சி.என்.அண்ணாதுரையின் நிகழ்ச்சி ஒன்று இங்கே நடந்திருக்கிறது என்று பேசினார்.