விடா முயற்சி.. உழைப்பு.. சொல்லாமல் சொல்லிக்கொடுத்த ரஜினியின் சினிமா வாழ்க்கை!

கர்நாடக மாநிலத்தில் பிறந்து, வளர்ந்து தமிழக மக்களின் மனங்களில் நிரந்தர இடம் பிடித்துள்ள சூப்பர் ஸ்டார் கடந்து வந்த பாதை மிக கடினமானது. திரைத்துறையில் ஜெயிக்க வேண்டும் என்றால் பளபளப்புடன் கூடிய தேஜசான உடல் தோற்றத்தோடு, வெள்ளையாக இருக்க வேண்டும் என்கிற ஃபார்முலாவையே மாற்றியவர் என்றால் அது ரஜினிகாந்த் தான்.

சாதாரண பேருந்து நடத்துநராக இருந்தவருக்கு நடிகராக வேண்டும் என்ற ஆசை எப்படி வந்தது எனத் தெரியவில்லை. ஆசை மட்டும் இருந்தால் போதாது, அதற்கான முயற்சியும், உழைப்பும் இருந்தால் தான் முன்னேற முடியும் என்பதை வசனமாக இல்லாமல் வாழ்க்கையாக வாழ்ந்து காட்டியவர் ரஜினிகாந்த்.

நடிகனாக வேண்டும் என்கிற ஆசை மட்டும் தான் இருந்தது சிவாஜி ராவிடம். காசு இல்லை. ஆனால் சிவாஜி ராவின் கனவை நனவாக்க உதவியது அவருடைய நண்பர் பகதூர். அதனால் இன்று வரை நண்பர்களுக்கு முதலிடம் உண்டு.

அபூர்வ ராகங்கள் திரைப்படத்திற்காக நடைபெற்ற நடிகர்கள் தேர்வில் கலந்து கொள்ளச் சென்ற ரஜினி சிவாஜி போல் நடித்துக் காட்டித் தான் இயக்குநர் கே.பாலச்சந்தரிடம் நடிக்க வாய்ப்பு பெற்றுள்ளார். கே.பாலச்சந்திர் அறிமுகம் செய்திருந்தாலும், இயக்குநர் முத்துராமன் இயக்கத்தில் தான் ரஜினிகாந்த் அதிக படங்களில் நடித்துள்ளார்.

கே.பாலச்சந்தர் இயக்கத்தில் ரஜினி 7 படங்களிலும், முத்துராமன இயக்கத்தில் 25 படங்களிலும் நடித்துள்ளார். நடிக்கத் தொடங்கிய காலத்திலேயே வில்லனாகவும் நடித்து பெயர் வாங்கியவர் ரஜினிகாந்த்.

சரியான தமிழ் உச்சரிப்பு, நடனம், நடிப்பு என எதுவுமே தெரியாமல் ரஜினியால் திரைத்துறையில் வெற்றி பெற முடிந்தது என்றால் அவரது நம்பிக்கை, விடாமுயற்சியுடன் கூடிய உழைப்பு தான். அதோடு ரஜினியின் ஸ்டைல் மிக ஸ்பெசலான ஒன்று.

குரும்புடன் அவரின் ஸ்டைலுக்காவே சிறு குழந்தைகள் முதல் பெரியவர்கள் வரை அவருக்கு ரசிகர்கள். பாலிவுட்டின் ஸ்டைல் மன்னன் ஷாருக்கானே ஒரு முறை சொல்லியிருக்கிறார் ரஜினியின் ஸ்டைலை அவரைத் தவிர யாராலும் செய்ய முடியாது என்று. அதனால் தான் அவர் நடித்த சென்னை எக்ஸ்பிரஸ் திரைப்படத்தில் ரஜினி ரசிகராக லுங்கி டான்ஸ் ஆடியிருப்பார் ஷாருக்கான்.

ரஜினியின் குழந்தை தனமான நகைச்சுவை நடிப்புக்கு முன்னாள் பிரதமர் வாஜ்பாயே ரசிகர் என்றால் பார்த்துக் கொள்ளுங்கள்.தமிழ், தெலுங்கு, கன்னடம், இந்தி, வங்காளம் உள்ளிட்ட இந்திய மொழிகளில் மட்டுமல்ல… ஆங்கிலத்திலும் நடித்துள்ளார் ரஜினிகாந்த். ரஜினிகாந்த் நடித்த பிளட்ஸ்டோன் ஆங்கில திரைப்படம் 1988 –ல் வெளியானது.

அது மட்டுமல்ல, ரஜினிகாந்த் நடித்த முத்து திரைப்படம் ஜப்பானில் வெற்றிகரமாக ஓடி, ஏகப்பட்ட ஜப்பான் ரசிகர்களை பெற்றுத் தந்துள்ளது. இன்று வரை ஏவிஎம் ஸ்டுடியோவில் ரஜினிக்கென்று தனி அறை ஒன்று உள்ளது. ஏவிஎம்எம்மில் சூட்டிங் என்றால் அங்கு தான் தங்குவார் ரஜினிகாந்த்.

என்றும் ஹீரோ ரஜினி என்பதற்கு ஒரே ஒரு சான்று.. அன்புள்ள ரஜினிகாந்த் திரைப்படத்தில் ரஜினிகாந்த் ஹீரோவாக நடிக்க, அந்த திரைப்படத்தில் குழந்தை நட்சத்திரமாக நடித்த மீனா, வளர்ந்து நடிகையாகி ஹீரோயினாக நடித்த எஜமான் படத்திலும் ரஜினிகாந்த ஹீரோ….

1990 ஆம் ஆண்டு ரஜினிகாந்த் நடித்த தளபதி திரைப்படம் வெளியானபோது, சில மாவட்டங்களில் அவரது ரசிகர்கள் வருங்கால தமிழக முதல்வரே என போஸ்டர் அடித்து ஒட்டியிருந்தார்கள். அது தான் ரஜினியின் அரசியல் பிரவேசம்.

1996 ஆம் ஆண்டுக்கு முன்பு வரை அரசியல் என்றால் என்னவென்றே அறியாத ரஜினி, 1996 ஆம் ஆண்டு தனது முதல் அரசியல் ஆதரவுக் குரலை வெளிப்படுத்தினார்.
அரசியல் அவதாரம் பூசாத நடிகர் ரஜினிகாந்த் இன்றுவரை சிறியவர், பெரியவர் என்ற பாகுபாடு இல்லாமல் அனைவருக்கும் ஹீரோ தான்.

அவரின் அரசியல் பிரவேசத்தால் பல்வேறு விமர்சனங்களுக்கு உள்ளானவர் தான். ஆனால் அதையெல்லாம் மீறி இன்றும் மக்கள் கொண்டாடும் திரைக்கலைஞன் ரஜினிகாந்த் என்றால் அது மிகையில்லை.