Happy Birthday R Madhavan: மாதவனின் சூப்பர் ஹிட் தமிழ்த் திரைப்படங்கள்... ஒரு லிஸ்ட்!

நடிகர் மாதவன் இன்று தனது 51-வது பிறந்த நாளை கொண்டாடுகின்றார். தமிழ் மற்றும் இந்தி சினிமாவில் தனது பன்முகத் திறமையை நிரூபித்தவர். இந்நிலையில் அவரது சூப்பர் ஹிட் தமிழ் திரைப்படங்களின் ஒரு தொகுப்பை இங்கு பார்க்கலாம்.

புஷ்கர் மற்றும் காயத்ரி இயக்கத்தில் 2017 ஆம் ஆண்டு வெளியான படம்  விக்ரம் வேதா. ஆக்‌ஷன் கதையாக உருவான இந்த படத்தில் மாதவன் போலீசாக விக்ரம் என்ற கதாப்பாத்திரத்திலும் வேதா என்ற கேங்ஸ்டர் கதாப்பாத்திரத்தில் விஜய் சேதுபதியும் நடித்திருந்தனர். இந்த படம் வெளியான நேரத்தில் விமர்சன ரீதியாகவும் நல்ல வரவேற்பை பெற்றிருந்தது.

குத்துச் சண்டை விளையாட்டை மையமாக வைத்து சுதா கொங்கரா எழுதி இயக்கிய ஒரு திரைப்படம் இறுதிச்சுற்று. 2016 ஆம் ஆண்டில் தமிழ், இந்தி ஆகிய இருமொழிகளிலும் வெளியான இப்படம் மாதவனின் திரைப் பயணத்தில் ஒரு கம்பேக்காகவே பார்க்கப்பட்டது.  குத்துச்சண்டை பயிற்சியாளராக முன்னணி கதாபாத்திரத்தில் மாதவன் இப்படத்தில் நடித்துள்ளார்.

2000ஆம் ஆண்டு இயக்குனர் மணிரத்னம் இயக்கத்தில் வெளிவந்த படம்  அலைபாயுதே. மாதவனின் முதல் படமான அலைபாயுதே மாதவனை ஓவர்நைட் ஸ்டார் ஆக்கியதுடன், இதற்குப் பிறகு பல காதல் படங்களில் நடித்ததால் அவருக்கு ‘சாக்லேட் பாய்’ என்ற டேக் கிடைத்தது.

ஆய்த எழுத்து இத்திரைப்படம் 2004 ஆம் ஆண்டில் வெளிவந்த தமிழ்த் திரைப்படமாகும். மணிரத்னத்தின் இயக்கத்தில் வெளிவந்த இத்திரைப்படம் மூலம் தனது ‘சாக்லேட் பாய்’ படத்திற்கு குட்பை கூறினார் மாதவன். இந்த படத்தில் அடிதடி செய்யும் நபராக மாதவன் நடித்துள்ளார்.

மணிரத்னம் இயக்கத்தில் மாதவன் மற்றும் சிம்ரன் நடிப்பில் 2002 ஆம் ஆண்டு வெளிவந்த படம் கன்னத்தில் முத்தமிட்டால். இலங்கை இனப் பிரச்சனையை கதைக்கருவாகக் கொண்டிருந்தது இந்த படம். ஒரு எழுத்தாழராகவும், தத்தெடுக்கப்பட்ட பெண் அமுதாவின் வளர்ப்புப் பெற்றோராக சிறந்த நடிப்பை வெளிப்படுத்தியிருப்பார் மாதவன்.