HBD Jayam Ravi: நடிப்பிலும் நடனத்திலும் சிறந்து விளங்கும் ஜெயம் ரவியின் பிறந்தநாள்!

நடிகர் ஜெயம் ரவி இன்று தனது 42-வது பிறந்தநாளைக் கொண்டாடுகிறார்.

திரைப்படப் படத்தொகுப்பாளரும் தயாரிப்பாளருமான மோகனின் இளைய மகனாக 1980-ம் ஆண்டில் பிறந்தார் ரவி. முறைப்படி பரதம் கற்று 12 வயதில் அரங்கேற்றம் நிகழ்த்தியவர்.

2002-ல் வெளியாக மிகப் பெரிய வெற்றிபெற்ற 'ஜெயம்' என்கிற தெலுங்குப் படத்தை அதே தலைப்பில் தமிழில் மறு ஆக்கமாகத் தயாரித்தார் மோகன். அவருடைய மூத்த மகன் ராஜா படத்தை இயக்கினார். ரவி அந்தப் படத்தில் நாயகனாக அறிமுகமானார்.

அண்ணனின் ரீமேக் படங்களில் நடித்த ரவி, 'தீபாவளி' படத்தில் வட சென்னை இளைஞராகவும், மறைந்த இயக்குநர் - ஒளிப்பதிவாளர் ஜீவாவின் கடைசித் திரைப்படமான 'தாம் தூம்' படத்தில் காதல், ஆக்‌ஷனுக்கு முக்கியத்துவமுள்ள கதாபாத்திரத்திலும், எஸ்.பி.ஜனநாதன் இயக்கிய 'பேராண்மை' படத்தில் பழங்குடி சமூகத்தைச் சேர்ந்த ராணுவ வனப் பாதுகாவலராக முதிர்ச்சியான நடிப்பையும் வெளிப்படுத்தியிருந்தார். தற்போது பொன்னியின் செல்வனின் அருள்மொழி வர்மனாக வரவிருக்கிறார்.

தனது நடிப்புக்காக சிறந்த நடிகருக்கான தமிழக அரசின் விருதையும் ஃபிலிம்ஃபேர் விருதையும் இன்னும் பல விருதுகளையும் வென்றுள்ளார்.

தனிப்பட்ட வாழ்க்கையைப் பொறுத்தவரை தயாரிப்பாளர் சுஜாதா விஜயக்குமாரின் மகள் ஆர்த்தியுடன் கடந்த 2009-ம் ஆண்டு ஜெயம் ரவிக்கு திருமணமானது.

இவர்களுக்கு தற்போது இரு மகன்கள் இருக்கிறார்கள்.

இன்று தனது 42-வது பிறந்தநாளைக் கொண்டாடும் ஜெயம் ரவிக்கு பிறந்தநாள் வாழ்த்துகள்.