அஜித்தின் 'விடாமுயற்சி' படக் கதை இதுவா? போஸ்டரில் இதை கவனிச்சீங்களா? டீகோட் செய்யும் ரசிகர்கள்

நடிகர் அஜித்தின் துணிவு படம் வசூல் ரீதியில் வெற்றியடைந்தது. இதனையடுத்து அவர் நடிக்கவிருந்த 62வது படத்தை விக்னேஷ் சிவன் இயக்க, லைக்கா புரொடக்சன்ஸ் தயாரிக்கவிருப்பதாக அறிவிக்கப்பட்டது.

கதை தொடர்பாக தயாரிப்பு நிறுவனத்துடன் கருத்து வேறுபாடு ஏற்பட விக்னேஷ் சிவன் இந்தப் படத்திலிருந்து விலகினார்.

இதனையடுத்து மகிழ் திருமேனி இந்தப் படத்தை இயக்கவிருப்பதாகவும் அனிருத் இசையமைக்கவிருப்பதாகவும் கூறப்பட்டது. நீண்ட நாட்களாக இந்தப் படம் அறிவிக்கப்படாமல் இருந்ததால் இந்தப் படமும் கைவிடப்படுகிறதா என ரசிகர்களிடையே கேள்வி எழுந்தது.

ஏகே 62 படத்துக்கு பிறகே அஜித் பைக்கில் உலக சுற்றுப்பயணம் மேற்கொள்ளவிருப்பதாக அறிவிக்கப்பட்ட நிலையில் தற்போதே நேபாளத்தில் அவர் சுற்றுப் பயணம் மேற்கொண்டிருப்பது ரசிகர்களிடையே சந்தேகத்தை வலுப்படுத்தியது.

இந்த நிலையில் நடிகர் அஜித் குமாரின் பிறந்த நாளை முன்னிட்டு படத்தின் டைட்டிலுடன் போஸ்டர் வெளியானதால் அஜித் ரசிகர்கள் மகிழ்ச்சியில் இருக்கிறார்கள். இந்தப் படத்துக்கு விடா முயற்சி எனப் பெயரிடப்பட்டிருக்கிறது.

வான்மதி, வாலி, வில்லன், வரலாறு, வீரம், வேதாளம், விவேகம், விஸ்வாசம், வலிமை படங்களைத் தொடர்ந்து வி எனத் தொடங்கும் தலைப்பு வைக்கப்பட்டிருக்கிறது.

இந்த போஸ்டரில் விடாமுயற்சி என்ற தலைப்பில் ற் எழுத்துக்கு மேல் கூகுள் மேப்பில் உள்ளது அடையாளக் குறியீடு இருக்கிறது. இதனையடுத்து இந்தப் படம் பயணம் சார்ந்த கதையாக இருக்கும் என ரசிகர்கள் டீகோட் செய்து வருகின்றனர். மேலும் போஸ்டரில் சுழல் இடம்பெற்றுள்ளதால் ஒரு கப்பல் பயணத்தை அடிப்படையாகக் கொண்டு உருவாகலாம் என்றும்  சொல்லப்படுகிறது