எல்லை மீறி போறீங்கடா... 'கைதி' ஹிந்தி ரீமேக்கில் இதெல்லாம் தேவையா ? ஷாக்கான ரசிகர்கள்!

லோகேஷ் கனகராஜ் இயக்கத்தில் கார்த்தி, நரேன் உள்ளிட்டோர் நடிப்பில் கடந்த 2019 ஆம் தேதி வெளியான 'கைதி' படம், விமர்சன ரீதியாகவும் வசூல் ரீதியாகவும் மாபெரும் வரவேற்பை பெற்றது.

ஒரே இரவில் நடக்கும் கதை, அனல் தெறிக்கும் ஆக்சன் காட்சிகள், பரபர திரைக்கதை என மிரட்டியிருப்பார் லோகேஷ்.

கார்த்தி நடித்த டில்லி கதாப்பாத்திரத்தை மிக வலுவாக கட்டமைத்திருந்தார்.

இயக்குநர் லோகேஷ். விக்ரம் படத்தில் கார்த்தியின் குரல் மட்டுமே ஒலித்தபோது திரையரங்குகளில் விசில் பறந்தது. அந்த அளவுக்கு ரசிகர்கள் மனதில் டில்லி கதாப்பாத்திரம் தாக்கத்தை ஏற்படுத்தியிருந்தது.

இதனையடுத்து மார்வெல் சினிமாட்டிக் யூனிவர்ஸ் போல, லோகேஷ் சினிமாட்டிக் யூனிவர்ஸ் என்ற வார்தைத் சமூக வலைதளங்களில் டிரெண்டானது.

தற்போது தளபதி விஜய் நடிப்பில் உருவாகிவரும் 'லியோ' படம் எல்சியூவின் அடிப்படையில் உருவாகிறதா இல்லையா என ஒரு பெரும் விவாதங்களே எழுந்துள்ளன.

இது ஒரு புறம் இருக்க. கைதி படம் ஹிந்தியில் அஜய் தேவ்கன் நடிப்பில் போலா என்ற பெயரில் ரீமேக் செய்யப்பட்டுவருகிறது. இந்தப் படத்தை அஜய் தேவ்கனே இயக்கிவருகிறார்.

கைதி படத்தில் டில்லி கதாப்பாத்திரத்தின் பின்புலம் சொல்லப்பட்டிருக்காது. ஆனால் பிளாஸ்பேக் காட்சிகள் மட்டுமல்லாமல் அதில் அஜய் தேவ்கனுக்கும் அமலா பாலுக்குமான ரொமான்டிக் பாடலும் இடம்பெற்றிருப்பதை ரசிகர்கள் விமர்சித்துவருகின்றனர்.

இந்த நிலையில் போலா படத்தில் ராய் லக்ஷ்மி நடனமாடும் கவர்ச்சி பாடலும் இருக்கிறதாக ஒரு தகவல் வெளியாகியுள்ளது.

வழக்கமான கமர்ஷியல் படங்களைப் போல் காதல், பாடல்கள், காமெடி என எதுவுமில்லாமல் உருவாக்கப்பட்டதுதான் கைதி படம் இந்த அளவுக்கு கொண்டாடப்பட்டதற்கு காரணம். அப்படிப்பட்ட படத்தின் ஹிந்தி ரீமேக்கில் கவர்ச்சி பாடல் இடம்பெற்றுள்ளதாக வெளியான செய்திக்கு எல்லை மீறி போறீங்கடா என ரசிகர்கள் கமெண்ட் செய்துவருகிறார்கள்.