மன்னன் ரஜினி கையில் இருக்கும் இந்த பிரபலம் யார் தெரிகிறதா?

நடித்த மன்னன் திரைப்படம் 1992 பொங்கலுக்கு வெளியானது. பி.வாசு இயக்கியிருந்தார். திமிர் பிடித்த நாயகி, அவளை அடக்கி ஆளும் நாயகன் எனும் தமிழ் சினிமாவின் எவர்கிரீன் வெற்றி ஃபார்முலாவில் தயாரான படம். இதுபோன்ற படங்களில்  எவ்வளவுதான் பெண்ணடிமைத்தனம் இருந்தாலும் பெண்களும் ரசித்துப் பார்ப்பார்கள்.

மன்னனில் இந்தியாவின் நம்பர் ஒன் கம்பெனியை நிர்வகிப்பவராக விஜயசாந்தி வருவார். அவருடன் ரஜினிக்கு விமானநிலையத்தில் மோதல் ஏற்படும். பிறகு அவரது கம்பெனிக்கே வேலைக்கு செல்வார் ரஜினி.

அங்கேயும் பரஸ்பரம் அவமதித்துக் கொள்வார்கள். ரஜினி குஷ்புவை காதலிப்பது தெரிந்தும், ரஜினியின் அம்மா பண்டரிபாயிடம் சத்தியம் வாங்கி, ரஜினியை விஜயசாந்தி மணப்பார். பிறகுதான் அதுவொரு ட்ராப் என புரியும்.

திருமணம் செய்து தனது கஸ்டடியில் ரஜினியை வைக்க விஜயசாந்தி நினைக்க, அவர் திருமணமான மறுநாளே காக்கிச் சட்டை அணிந்து வேலைக்குச் சென்று வேறு வகையில் விஜயசாந்தியை பழி தீர்ப்பார்.

இறுதியில், இந்தியாவின் நம்பர் ஒன் கம்பெனியை நடத்தும் விஜயசாந்தியை வீட்டில் அடுப்பூத வைத்து அவரை வழிக்குக் கொண்டு வருவார் ரஜினி.

இந்தப் படத்தில் விஜயசாந்தியின் வீட்டில் வீட்டோடு மாப்பிள்ளையாக இருந்தாலும் தனக்கும், தனது மனைவி விஜயசாந்திக்குமான சாப்பாட்டுச் செலவிற்கு ரஜினி பணம் தருவதாக வேலைக்கார கதாபாத்திரத்தில் வரும் மனோரமா கூறுவார்.

இந்தப் படத்தில் ரஜினி நடிக்கையில் அவரது மனைவி லதாவின் சகோதரர் ரவி ராகவேந்திராவின் மகனுக்கு ஒரு வயது. மன்னன் படப்பிடிப்பின் போது அந்த ஒரு வயது குழந்தையை ரஜினி தூக்கி வைத்திருக்கும் புகைப்படம்தான் இது. இந்த குழந்தைதான் இசையமைப்பாளர் அனிருத்.

மன்னனில் இன்னொரு சுவாரஸியம், ரஜினி இதில் வரும் அடிக்குது குளிரு பாடலின் இடையே குரல் கொடுத்திருப்பார். முதலிரவு அன்று விஜயசாந்தி ரஜினியை கிக் ஏற்றி பாடுகிற பாடல். அதன் நடுவில் அது சரி அதுரி.. ரொம்ப சரி ரொம்ப சரி... என்று குரல் கொடுத்திருப்பார். இரண்டாவது சரணத்தை அவரே பாடுவார்.  முல்லைப் பூங்கொடி கொம்பைத் தேடுது... கொம்பைப் போல என் அன்பைத் தேடுது... கட்டித் தங்கம் மேனி... கட்டழகு ராணி... தொட்டுப் பார்க்கத்தானே... கட்டில் பக்கம் வா நீ...என்று பாடுவார். இந்த மாதிரி ரிஸ்க்கான சமாச்சாரங்களை இளையராஜா தவிர்த்து யாராலும் செய்ய முடியாது. ரஜினி பாடிய (?) ஒரே பாடல் இதுதான்.

மன்னன் படத்தின் மூலம் ஒரு கன்னட நாவல். அதைத் தழுவி ராஜ்குமார், மாதவி, கீதா நடிப்பில் கன்னடப் படமொன்றை எடுத்தனர். அதனைத் தழுவி எடுக்கப்பட்டதுதான் மன்னன். படம் 25 வாரங்களுக்கு மேல் ஓடி வெற்றியை பதிவு செய்தது.