பாலசந்தர் இயக்கத்தில் சிவாஜி நடித்த ஒரேயொரு படம் எது தெரியுமா?

எம்ஜிஆர், சிவாஜி, ஜெமினி கணேசன் கோலாச்சியிருந்த காலத்தில் முன்னணி நட்சத்திரங்களை தவிர்த்து படமெடுத்தவர் பாலசந்தர். அவரது சினிமாவில் கதையும், திரைக்கதையும், இயக்குநருமே பிரதானம். நடிகர்கள் அதற்குப் பிறகுதான்.

நாயக பிம்பத்தை உயர்த்திப் பிடிக்கும் கலாச்சாரத்துக்கு எதிரானவை அவரது பெரும்பாலான படங்கள். அதன் காரணமாகவே முன்னணி நடிகர்களை தனது படங்களில் பாலசந்தர் தவிர்த்து வந்தார். பிற்காலத்தில் கமல், ரஜினியை அதிகம் பயன்படுத்திய காரணம், அவர்களை அவர்தான் கண்டெடுத்தார், தனது படங்களின் மூலம் வளர்த்தெடுத்தார்.

100 திரைப்படங்களுக்கு மேல் இயக்கிய பாலசந்தர் சிவாஜியை வைத்து ஒரேயொரு திரைப்படம்தான் இயக்கியிருக்கிறார். 52 வருடங்களுக்கு முன் 1970 இதே ஜுன் 27 ஆம் நாள் அப்படம் வெளியானது. படத்தின் பெயர் எதிரொலி.

எதிரொலியில் சங்கர் என்ற நேர்மையான வழக்கறிஞராக சிவாஜி நடித்தார். அவரது மனைவி கே.ஆர்.விஜயா. ஏழைகளிடம் பணம் வாங்காதது மட்டுமில்லை, வறுமையில் இருக்கிறவர்களுக்கு இலவசமாக வழக்காடுவதுடன் பணமும் தருகிற நல்லவர்.

அவருக்கு ஒரு தங்கை, ஒரு தம்பி. ஒரு மகள். மகளிடம் 7 கட்டளைகளை தந்து அதன்படி நடக்க வேண்டும் என அறிவுரை சொல்வார் சிவாஜி. பொய் சொல்லாதே, திருடாதே, ஆத்திரம் கொள்ளாதே... என்பது போன்ற 7 கட்டளைகள் அதில் இருக்கும். சந்தர்ப்ப சூழ்நிலையால் சிவாஜியே அந்தக் கட்டளைகளை மீற வேண்டிய நிர்ப்பந்தம் வரும். அது அவரை தீராத சோதனைக்குள் தள்ளும். இறுதியில் அவரது மகள் அந்த 7 கட்டளைகளை திருப்பி சிவாஜியிடம் தருவாள்.

சிவாஜி, கே.ஆர்.விஜயா, ஜோதிலட்சுமி, சிவகுமார், லட்சுமி, நாகேஷ், மேஜர் சுந்தர்ராஜன், டி.எஸ்.பாலையா உள்பட பலர் இதில் நடித்திருந்தனர். பாலசந்தரின் வழக்கமான படங்களிலிருந்து இது மாறுபட்டிப்பதாக படம் வெளியான நேரம் அவரது ரசிகர்கள் அபிப்ராயப்பட்டனர். படம் வெளியாகி பரவலான வரவேற்பை பெற்று வெற்றியும் பெற்றது. மகத்தான வெற்றியல்ல. ஆனால், தோல்விப் படமும் அல்ல.

படத்துக்கு கே.வி.மகாதேவன் இசையமைத்திருந்தார்.  மொத்தம் ஐந்து பாடல்கள். அனைத்தையும் வாலி எழுதினார். கல்யாணம்.. கல்யாணம்.. பாடலை  ஏ.எல்.ராகவனுடன் இணைந்து எல்.ஆர்.ஈஸ்வரி பாடினார். குங்குமச்சிமிழ் எனத் தொடங்கும் பாடலை டிஎம்.சௌந்தர்ராஜனும், எல்.ஆர்.ஈஸ்வரியும் பாடினர். மீதி மூன்றிலும் ஆண் குரல் இல்லை. மூன்றையும் எல்.ஆர்.ஈஸ்வரியே பாடினார்.

என்ன காரணமோ, எதிரொலிக்குப் பிறகு பாலசந்தரும், சிவாஜியும் இணையவில்லை. பாலசந்தர் கமலை வைத்து உன்னால் முடியும் தம்பி படத்தை இயக்கிய போது, அதில் ஜெமினி கணேசன் நடித்த வேடத்துக்கு முதலில் அணுகியது சிவாஜியை என்றும், அவர் நடிக்க மறுத்ததால் ஜெமினி கணேசனை பாலசந்தர் நடிக்க வைத்ததாகவும் தகவல் உண்டு.

என்ன காரணமோ, எதிரொலிக்குப் பிறகு பாலசந்தரும், சிவாஜியும் இணையவில்லை. பாலசந்தர் கமலை வைத்து உன்னால் முடியும் தம்பி படத்தை இயக்கிய போது, அதில் ஜெமினி கணேசன் நடித்த வேடத்துக்கு முதலில் அணுகியது சிவாஜியை என்றும், அவர் நடிக்க மறுத்ததால் ஜெமினி கணேசனை பாலசந்தர் நடிக்க வைத்ததாகவும் தகவல் உண்டு.

பாலசந்தரின் இயக்கத்தில் நடிக்காமலே சிவாஜியும், சிவாஜியை நடிக்க வைக்காமலே பாலசந்தரும் தத்தமது துறைகளில் சாதனைப் படைத்தனர். அந்தவகையில் இவர்கள் தொடர்ந்து இணைந்து படங்கள் தராதது இரு தரப்பு ரசிகர்களுக்கும் ஏமாற்றமும் இல்லை.