பொன்னியின் செல்வன் படத்தில் நடிகர்கள் தேர்வு எப்படி இருந்தது - மணிரத்னம் விளக்கம்!

பொன்னியின் செல்வன் படத்தில் நடிகர்கள் தேர்வு எப்படி இருந்தது என்று இயக்குநர் மணிரத்னம் தெரிவித்துள்ளார்.

கல்கி எழுதிய பொன்னியின் செல்வன் நாவலை இயக்குநர் மணிரத்னம் அதே பெயரில் படமாக்கி வருகிறார். அந்த திரைப்படம் இரண்டு பாகங்களாக உருவாகிறது.

அதில் முதல் பாகம் வரும் செப்டம்பர் 30-ஆம் தேதி தமிழ் - தெலுங்கு - இந்தி உள்ளிட்ட மொழிகளில் வெளியாகிறது.

பொன்னியின் செல்வன் படத்தில் ஆதித்த கரிகாலனாக விக்ரம், வந்திய தேவனாக கார்த்தி, அருள்மொழி வர்மனாக ஜெயம் ரவி, குந்தவையாக த்ரிஷா, நந்தினியாக ஐஷ்வர்யா ராய், பெரிய பழுவேட்டரையராக சரத்குமார், சின்ன பழுவேட்டரையராக பார்த்திபன் உள்ளிட்டோர் நடித்துள்ளனர்.

படத்திற்கு இசை ஏ.ஆர்.ரஹ்மான். பொன்னியின் செல்வன் படத்தின் டீசர் ஏற்கனவே வெளியாகி ரசிகர்களிடம் நல்ல வரவேற்பைப் பெற்றது.

மேலும் பொன்னியின் செல்வன் படத்தின் பாடல் மற்றும் ட்ரெய்லரும் வெளியாகி ரசிகர்களிடையே நல்ல வரவேற்பை பெற்றுள்ளது.

இந்நிலையில் படத்தின் நடிகர்கள் தேர்வு குறித்து இயக்குநர் மணிரத்னம் பேசிய வீடியோ வைரலாகி வருகிறது.

அதில், படத்தில் இந்த கதாப்பாத்திரத்திற்கு இந்த நடிகர் சரியாக இருப்பார் என்று நம் மனதில் தோன்றும்.

ஆனால் படம் முழுமையாக வெளியாகும் போது என்னுடைய இயக்கம் மட்டும் அல்லாமல் நடிகரின் அர்ப்பணிப்பும் அந்த கதாப்பாத்திரத்திற்கு முக்கியமானதாக உள்ளது.

அதனால், படப்பிடிப்பின் போது நடிகர்களுடன் பேசுகையில் என்னுடைய கதைக்கு மட்டும் நீங்கள் நடித்தால் அது போதாது. நடிக்கும் போது உங்களுக்குள் இருக்கும் வந்தியதேவன், குந்தவை வெளியே வரவேண்டும் என்றும் கூறியதாக தெரிவித்துள்ளார்.

ஆகையால் கதையுடன் நடிகர்கள் ஒன்றி நடிக்கும் போது படம் முழுமையடையும் என்றும் அதனைதான் பொன்னியின் செல்வன் படத்தில் செய்திருப்பதாகவும் மணிரத்னம் தெரிவித்துள்ளார்.