'காட்சி மொழி கவிஞன்' மகேந்திரனுக்கு இன்று பிறந்த நாள்!

தமிழ் சினிமாவின் போக்கை மாற்றிய வெகுசில இயக்குநர்களில் மிகவும் முக்கியமானவர் மகேந்திரன்.

வசனங்களால் ஊற்றெடுத்த சினிமாவை காட்சி மொழிக்கு இழுத்துவந்த கலைஞன்.

அலெக்ஸாண்டராக பிறந்த மகேந்திரனை அவரது பேச்சால் கவர்ந்த எம்.ஜி.ஆர், திரைத்துறைக்கு அழைத்து வந்தார்.

ஆரம்ப காலத்தில் திரைப்படங்களுக்கு கதை வசனம் மட்டுமே எழுதி வந்த மகேந்திரன் இயக்கிய முதல் படமான முள்ளும் மலரும், இன்று வரை தமிழ் சினிமா கண்ட சிறந்த படைப்புகளுள் ஒன்றாக போற்றப்படுகிறது.

மேடை நாடகங்களின் திரை வடிவமாக மட்டுமே திரைப்படங்கள் இருந்து வந்த காலத்தில், வசனத்தைத் தவிர்த்து காட்சிகளின் மூலம் கதை சொல்லி சினிமா ஒரு காட்சி ஊடகம் என்பதை மகேந்திரன் உணர்த்தியவர்.

உணர்வுகளை எண்ண ஓட்டங்களை திரையில் பிரதிபலித்த அவர், இளையராஜாவின் பின்னணி இசையின் மூலம் அவற்றிற்கு உயிர் கொடுத்தார். தனது படங்களில் இளையராஜாவின் இசைதான் வசனம் என மகேந்திரனே பல இடங்களில் தெரிவித்திருக்கிறார்.

தமிழ் சினிமாவின் சூப்பர் ஸ்டாராக இருக்கும் ரஜினியின் உடல் மொழியும், ஸ்டைலும் மகேந்திரனிடம் இருந்து வந்ததுதான். அவர் முள்ளும் மலரும் திரைப்படத்தின்போது சொல்லிக்கொடுத்தவற்றை முழுவதுமாக உள்வாங்கிக் கொண்ட ரஜினி, பின்னாளில் அதையே தனக்கான பாணியாகவும் மாற்றிக்கொண்டார்.

தொடர்ந்து மகேந்திரன் இயக்கத்தில் வெளியான உதிரிப்பூக்கள், நெஞ்சத்தை கிள்ளாதே, மெட்டி, நண்டு ஆகிய படங்களும் எதார்த்த வாழ்வின் காட்சிகளை செல்லுலாய்டில் பூட்டி வெளியிட்டன. மேலும் தமிழ் சினிமாவை அடுத்த தளத்திற்கு முன்னேற்றியதில் இயக்குநர் மகேந்திரனின் படங்களுக்கு என்றுமே தனி இடம் உண்டு.

ஆரம்பத்தில் பல திறமையான நடிகர்களை உருவாக்கிய மகேந்திரன், அவரே பல படங்களில் வில்லனாகவும் குணச்சித்திர நடிகராகவும் மிரட்டியவர்.

2007-ம் ஆண்டு அரவிந்த் சாமி நடிப்பில் வெளியான சாசனம் திரைப்படம்தான் இயக்குநர் மகேந்திரனின் இயக்கத்தில் வெளியான கடைசி படம். எனினும் இன்றைய இளம் தலைமுறை இயக்குநர்கள் வரை இயக்குநர் மகேந்திரனின் சாயல் இல்லாமல் படம் இயக்குவதில்லை.