அப்போ மிஸ்ஸானது... இப்போ நடக்கப்போவுது... - தனுஷுடன் முதன்முறையாக இணையும் வடிவேலு..!

நீண்ட இடைவேளைக்கு பிறகு நடிகர் வடிவேலு நடித்த நாய் சேகர் ரிட்டர்ன்ஸ் படம் கடந்த ஆண்டு டிசம்பரில் வெளியாகி எதிர்பார்த்த வெற்றியைப் பெறவில்லை.

வடிவேலு தற்போது மாமன்னன், சந்திரமுகி 2 ஆகிய படங்களில் முக்கிய வேடங்களில் நடித்திருக்கிறார்.

இதில் மாமன்னன் படத்தில் வடிவேலு குணச்சித்திர வேடத்தில் நடித்திருக்கிறாராம்.  உணர்வுப்பூர்வமான காட்சிகளில் நடிகர் வடிவேலு சிறப்பாக நடித்திருப்பதாக  இயக்குநர் மாரி செல்வராஜ் சமீபத்திய பேட்டியில் பகிர்ந்திருந்தார்.

இந்த நிலையில் புதிய படமொன்றில் தனுஷுடன் வடிவேலு இணைந்து நடிக்கவிருக்கிறாராம்.

தனுஷ் நடிப்பில் வெளியான படிக்காதவன் படத்தில் முதலில் வடிவேலு சில காட்சிகளில் நடித்தார். ஆனால் படக்குழுவினருடன்  ஏற்பட்ட பிரச்னை காரணமாக அவர் பாதியில் விலக அவருக்கு பதிலாக விவேக் நடித்தார்.

அசால்ட் ஆறுமுகம் என்ற விவேக் நடித்த கதாப்பாத்திரம் ரசிகர்களிடையே நல்ல வரவேற்பு பெற்றது. இந்தப் படத்தின் மூலம் தனுஷ் - விவேக் காம்போ உருவானது.

மாப்பிள்ளை, சீடன், உத்தமபுத்திரன், வேலையில்லா பட்டதாரி உள்ளிட்ட படங்களில் தனுஷ் - விவேக் காம்போ ரசிகர்களிடையே பெரும் வரவேற்பை பெற்றன.

இதனால் தனுஷ் - வடிவேலு இணைந்து நடிக்க வாய்ப்பில்லாமல் போனது.

இந்த நிலையில் கர்ணன் படத்துக்கு பிறகு மாரி செல்வராஜ் இயக்கத்தில் தனுஷ் புதிய படத்தில் நடிக்கவிருப்பதாக சமீபத்தில் அறிவிப்பு வெளியானது. இந்தப் படத்தில் தனுஷுடன் இணைந்து வடிவேலு நடிக்கவிருப்பதாக கூறப்படுகிறது.