''நீ இப்படியே இரு... எப்பொழுதும் உனக்கு பின்னாடி நான் இருப்பேன்''- கவினுக்கு அபர்ணா சொன்ன மெசேஜ் - டவுட்டான ரசிகர்கள்

கணேஷ் கே.பாபு இயக்கத்தில் கவின், அபர்ணா தாஸ் இணைந்து நடித்துள்ள டாடா திரைப்படம் இன்று திரையரங்குகளில் வெளியாகி நல்ல விமர்சனங்களைப் பெற்றுவருகிறது. ஒலிம்பியா மூவிஸ் சார்பில் அம்பேத் குமார் தயாரித்துள்ள இந்தப் படத்தை ரெட் ஜெயண்ட் மூவிஸ் நிறுவனம் வெளியிட்டுள்ளது. இந்தப் படத்தில் பாக்யராஜ், ஐஸ்வர்யா பாஸ்கரன், விடிவி கணேஷ், பிரதீப் ஆண்டனி, ஹரிஷ் உள்ளிட்டோர் முக்கிய வேடங்களில் நடித்துள்ளனர். எழில் அரசு ஒளிப்பதிவு செய்துள்ள இந்தப் படத்துக்கு ஜென் மார்டின் இசையமைத்துள்ளார்.

இந்த நிலையில் கவின் குறித்து நெகிழ்ச்சியான பதிவு ஒன்றை நடிகை அபர்ணா தாஸ் தனது இன்ஸ்டாகிராம் பக்கத்தில் பகிர்ந்துள்ளார்.

அதில், ''எனக்காக எப்பொழுதும் துணை நிற்பதற்கு நன்றி கவின். சிறந்த சக நடிகராக இருந்ததற்கு நன்றி. நாளை நமக்கு மிக முக்கியமான நாள். அதற்காக வாழ்த்துகள். உன்னை ஒரு வருடத்துக்கு மேலாக தெரியும். டாடா படத்தை எனக்கு அளித்ததற்கு நன்றி.

இந்தப் படத்துக்காக நீ கடினமாக வேலை செய்ததை பார்த்திருக்கிறேன். படத்துக்காக எல்லா துறைகளிலும் நீ வேலை செய்திருக்கிறாய். தவறான விஷயங்களை உடனிருந்து சரி செய்திருக்கிறாய்.

நாம் எப்பொழுது பேசினாலும் அந்த நேரம் படத்தை சிறப்பாக்க வேலை செய்துகொண்டிருப்பாய். உன்னை கீழிறக்க பல விஷயங்கள் இருந்தன. ஆனால் வலுவான மனிதனாக நின்று அனைத்தையும் சமாளித்து அழகான படமாக இதனை நீ உருவாக்கி இருக்கிறாய்.

நிறைய பேட்டிகளிலும் மேடைகளிலும் இதனை சொல்ல நினைத்திருக்கிறேன். நீ மட்டும் இல்லையென்றால் இந்தப் படம் சிறிதும் நகர்ந்திருக்காது. எல்லாவற்றுக்கும் நன்றி.

நான் பல பேட்டிகளில் நீ கோபக்காரன் எனத் தெரிவித்தேன். ஆனால் இப்பொழுது சொல்கிறேன், நீ நல்ல விஷயங்களுக்காகவே சண்டையிட்டாய்.

இந்த அழகான படத்தை உருவாக்கியதற்கும் அதில் என்னை பங்கு பெற செய்ததற்கும் நன்றி.

நீ சிறந்த மனிதன். நீ சிறந்த நடிகன். எப்பொழுதும் இப்படியே இரு. நீ உயர்ந்த இடத்துக்கு செல்வாய். கடவுள் உன்னை ஆசிர்வதிப்பார்.

நீ என்ன செய்தாலும் அங்கு ஒரு நல்ல தோழியாக நான் உடனிருப்பேன். உனக்கு எது நல்லதோ அதனையே தொடர்ந்து செய். நான் எப்பொழுதும் உன் பின்னால் இருப்பேன். என்று குறிப்பிட்டுள்ளார். ஒருவேளை இருவரும் காதலிக்கிறார்களோ என சந்தேகத்துடன் கேள்வி எழுப்பிவருகின்றனர்.