ரஜினியை காட்டிக் கொடுத்த சிகரெட் வெளிச்சம்... தளபதி சுவாரஸ்ய கதை!

நடித்த படங்களில் தளபதி தனித்துவமானது. மணிரத்னம் இயக்கத்தில் ரஜினி நடித்த ஒரே படம். மணிரத்னத்தின் அண்ணன் மறைந்த ஜீ.வெங்கடேஸ்வரனும், ரஜினியும் நண்பர்கள். இணைந்து படம் செய்ய வேண்டும் என்று எண்பதுகளில் இருவரும் முடிவு செய்கிறார்கள்.

ரஜினி மறுப்பே சொல்ல முடியாத ஒரு கதையை தான் அவரிடம் சொல்ல வேண்டும் என்று மணிரத்னம் பிடிவாதமாக இருந்ததால் அவர்கள் இணையும் படம் தள்ளிப்போய், இறுதியில் தளபதி என்ற சுவாரஸியமான திரைப்படம் கிடைத்தது.

இந்தப் படத்தில் இடம்பெற்ற யமுனை ஆற்றிலே ஈர காற்றிலே பாடலைப் பற்றி சமீபத்தில் பேட்டியொன்றில் நடிகை ஷோபனா பேசினார். அவரை பேட்டியெடுத்த குட்டி பத்மனி, இந்தப் பாட்டை கேட்டு தான் யமுனை என்ற ஆறு இருப்பதே எனக்கு தெரியும் என்று சொல்ல, அதற்கு சற்றும் குறையாத விதத்தில் இருந்தது ஷோபனாவின் விளக்கமும்.

மணிரத்னம் காட்சியை படமாக்கியவிதமும், லைட்டிங்கும் தான் அந்தப் பாடலை மறக்க முடியாத பாடலாக்கியது என்றவர், முகத்தை சுழித்தபடி, யமுனை ஆற்றிலே பாடலைப் பார்த்தீங்கன்னா அதுவொரு சிம்பிள் சாங் என்று போகிற போக்கில் பேச, பொங்கி விட்டார்கள் இளையராஜா ரசிகர்கள். அது சிம்பிள் சாங்கா? இப்போ அந்த இசை இல்லாத  காட்சியை மட்டும் பாருங்க என்று மியூட் செய்யப்பட்ட பாடலை பகிர்ந்து ஷோபனாவை எண்ணைய் இல்லாமலே வறுத்தார்கள். 

மலையாள தனியார் சானலுக்கு அளித்த பேட்டியில் மீண்டும் தனது தளபதி மலரும் நினைவை பகிர்ந்திருக்கிறார் ஷோபனா. இந்தமுறை ரஜினி.

தளபதி படத்தின் பல காட்சிகளை அதிகாலையில் எடுத்தார் மணிரத்னம். பாடல் காட்சி ஒன்றிற்காக அதிகாலை நான்கு மணிக்கே ஸ்பாட்டுக்கு வரவேண்டும் என மணிரத்னம் சொல்லியிருக்கிறார். மற்ற 300 பேரும் வருவார்கள், ரஜினி அதிகாலை 4 மணிக்கே வருவாரா என்று அனைவருக்கும் ஐயம். 300 பேர் வரும்போது, 301-வது ஆளும் வரத்தானே செய்யணும் என்றிருக்கிறார் மணிரத்னம். ஆனால், யாருக்கும் ரஜினி அத்தனை அதிகாலையிலேயே ஸ்பாட்டுக்கு வருவாரா என்ற சந்தேகம் மட்டும் போகவில்லை.

மறுநாள் யூனிட் வண்டியில் அதிகாலை 4 மணிக்கு சென்றிருக்கிறார்கள். அது மலைப்பகுதி. அவர்கள் சென்ற போது தூரத்தில் ஒரு சிகரெட் வெளிச்சம் தெரிந்திருக்கிறது. அவர்களுக்கு முன்பே யாரோ அங்கு வந்திருக்கிறார்கள். போய் பார்த்தால் அது ரஜினி. எல்லோருக்கும் முன்பாகவே ரஜினி அங்கு வந்திருக்கிறார். தளபதியை மகாபாரத கதையை மனதில் வைத்து மணிரத்னம் உருவாக்கியிருந்தார். ரஜினி கர்ணன், மம்முட்டி துரியோதனன், ஷோபனா திரௌபதி, அரவிந்த்சாமி அர்ஜுனன், ஸ்ரீவித்யா குந்தி, ஓம் பூரி கண்ணன் என மகாபாரதத்தை நவீன சூழலுக்கேற்ப மாற்றியிருந்தார்.

முதலில் கர்ணனான ரஜினி இறப்பது போல் தான் கதையை மணிரத்னம் எழுதியிருந்தார். அப்படி எடுத்தால் ரஜினி ரசிகர்கள் ஒத்துக் கொள்ள மாட்டார்கள் என மம்முட்டி இறப்பது போல் மாற்றி எடுத்ததாக கூறுவர்.

தளபதியில் அரவிந்த்சாமி வேடத்தில் முதலில் ஜெயராம் தான் நடிப்பதாக இருந்தது. அவரது கால்ஷீட் தேதி ஒத்து வராததால் அரவிந்த்சாமியை அந்த வேடத்தில் மணிரத்னம் அறிமுகப்படுத்தினார்.

மம்முட்டி, ஷோபனா தவிர்த்து தளபதியில் நடித்த இன்னொரு பிரபல மலையாள நடிகர் மனோஜ் கே.ஜெயன். பெருந்தச்சன் படத்தில் அவரது நடிப்பைப் பார்த்து தளபதியில் அவரை மணிரத்னம் அறிமுகப்படுத்தினார். இவர் வேறு யாருமில்லை, தூள் படத்தில் வரும் நேர்மையான போலீஸ் அதிகாரி தான்.

தளபதிக்கு சந்தோஷ் சிவன் ஒளிப்பதிவு செய்திருந்தார். அவரது முதல் தமிழ்ப் படம் இது.